ଅଯୋଧ୍ୟା : ରାମ ମନ୍ଦିରରେ ଏକ ଦୀର୍ଘଦିନର ପରମ୍ପରାକୁ ପରିବର୍ତ୍ତନ କରି ଏକ ନୂତନ ପରମ୍ପରାର ଶୁଭାରମ୍ଭ କରାଯାଇଛି। ଚଳିତ ବର୍ଷ ପ୍ରଥମ ଥର ପାଇଁ ତୃତୀୟା ତିଥିରେ ରାମ ଲଲ୍ଲାଙ୍କ 'ଝୁଲଣୋତ୍ସବ' ଆରମ୍ଭ ହୋଇଛି। ଏହି ଅବସରରେ ଏକ ଭବ୍ୟ 'ପାଲକି ଯାତ୍ରା' ବାହାର କରାଯାଇଥିଲା। ରାମନଗରୀର ପାରମ୍ପରିକ ଝୁଲଣୋତ୍ସବ ଆଜିଠାରୁ ଅଗଷ୍ଟ ୨୬ ତାରିଖ ପର୍ଯ୍ୟନ୍ତ ପାଳନ କରାଯିବ। 

ବୈଦିକ ମନ୍ତ୍ରୋଚ୍ଚାରଣ, ଶଙ୍ଖଧ୍ୱନି ଏବଂ ପାରମ୍ପାରିକ ବାଦ୍ୟଯନ୍ତ୍ରର ଶୁଭ ଧ୍ୱନି ମଧ୍ୟରେ ଅନୁଷ୍ଠିତ ଏହି ଶୋଭାଯାତ୍ରାରେ ଆସ୍ଥା ଓ ଭକ୍ତିର ଏକ ଅପୂର୍ବ ସମାଗମ ଦେଖିବାକୁ ମିଳିଥିଲା। ରାମ ମନ୍ଦିର ଟ୍ରଷ୍ଟର ଟ୍ରଷ୍ଟି ମହନ୍ତ ଦିନେନ୍ଦ୍ର ଦାସଙ୍କ ତତ୍ତ୍ୱାବଧାନରେ ଆୟୋଜିତ ଏହି 'ପାଲକି ଯାତ୍ରା'ରେ, ନିର୍ଦ୍ଧାରିତ ରୀତିନୀତି ଅନୁଯାୟୀ ଉତ୍ସବ-ମୂର୍ତ୍ତିକୁ କୁବେର ଟିଲାକୁ ନିଆଯାଇଥିଲା।ସେଠାରେ ଥିବା ଏକ ପ୍ରାଚୀନ ବୃକ୍ଷରେ ଭଗବାନ ରାମ ଲଲ୍ଲାଙ୍କୁ ଏକ ଦୋଳିରେ ବିରାଜମାନ କରାଯାଇ ସ୍ୱତନ୍ତ୍ର ପୂଜାର୍ଚ୍ଚନା କରାଯାଇଥିଲା। ପୂର୍ବରୁ ରାମ ମନ୍ଦିରରେ 'ଶ୍ରାବଣ ଶୁକ୍ଳ ପଞ୍ଚମୀ' ତିଥିରୁ ଝୁଲଣ ଉତ୍ସବ ପାଳନ କରିବାର ପରମ୍ପରା ଥିଲା, କିନ୍ତୁ ଚଳିତ ବର୍ଷ ଏହି ଉତ୍ସବ 'ଶ୍ରାବଣ ଶୁକ୍ଳ ତୃତୀୟା' ତିଥିରୁ ଆରମ୍ଭ ହୋଇଛି। ମନ୍ଦିର ପ୍ରଶାସନ ଅନୁଯାୟୀ, ଆଗାମୀ ବର୍ଷଗୁଡ଼ିକରେ ମଧ୍ୟ ଏହି ନୂତନ ପରମ୍ପରା ଜାରି ରହିବ। କୁବେର ଟିଳା ଠାରେ ଉଦ୍ଘାଟନୀ ଝୁଲଣ ଉତ୍ସବ ପରେ, ଆସନ୍ତା ଅଗଷ୍ଟ ୧୬ ତାରିଖରୁ ପ୍ରତିଦିନ ମନ୍ଦିରର ଗର୍ଭଗୃହରେ ରାମ ଲଲ୍ଲାଙ୍କ 'ଉତ୍ସବ ମୂର୍ତ୍ତି'କୁ ଦୋଳିରେ ବିରାଜମାନ କରାଯିବ, ଯାହା ଫଳରେ ଭକ୍ତମାନେ ଦର୍ଶନ କରିପାରିବେ।

ଅଯୋଧ୍ୟାରେ ଝୂଲଣୋତ୍ସବ ହେଉଛି ଶ୍ରାବଣ ମାସରେ ଭଗବାନ ରାମଙ୍କ ଶିଶୁ ରୂପକୁ ଝୁଲାରେ ରଖିବାର ଏକ ଭକ୍ତିପୂର୍ଣ୍ଣ ପରମ୍ପରା। ରାମ ଲଲ୍ଲାଙ୍କ ପାଇଁ ଏକ ସୁନ୍ଦର ଭାବରେ ସଜ୍ଜିତ ଝୁଲା ବିଶେଷ ଭାବରେ ସଜାଯାଇଥାଏ, ଏବଂ ସେ ଏଥିରେ ବିରାଜିତ ହୁଅନ୍ତି। ମନ୍ଦିର ଗୁଡ଼ିକ ରାମ ଭଜନ, ପାରମ୍ପରିକ ସଙ୍ଗୀତ, ଆରତୀ, ନୈବେଦ୍ୟ ଏବଂ ଧାର୍ମିକ ରୀତିନୀତି ମଧ୍ୟରେ ଝୂଲଣୋତ୍ସବ ପାଳନ କରନ୍ତି। ଅନେକ ସ୍ଥାନରେ, ଦେବତାଙ୍କ ପାଳକିନ ଶୋଭାଯାତ୍ରା ମଧ୍ୟ ଆୟୋଜନ କରାଯାଏ।