ଓଲଟିଲା ବସ୍,୧୦ ଯବାନ ଆହତ । ନିର୍ବାଚନ ଡ୍ୟୁଟି ସାରି ଫେରିଲା ବେଳେ ଘଟିଗଲା ଦୁର୍ଘଟଣା । ଭାରସାମ୍ୟ ହରାଇ ରାସ୍ତା କଡ଼କୁ ଓଲଟିଲା ବସ୍ । ଏହି ଦୁର୍ଘଟଣାରେ ୧୦ ଜଣ ଯବାନ ଆହତ ହୋଇଥିଲାବେଳେ ୩ ଜଣ ଯବାନଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ହୋଇଯାଇଛି । ସାଧାରଣ ଜନତାଙ୍କ ସେବାରେ ଥିଲା ଯବାନମାନେ ନିଜ ନିଜର କାର୍ଯ୍ୟ ସାରି ଆନନ୍ଦର ସହ ଫେରୁଥିଲେ କିନ୍ତୁ କିଏ ଜାଣିଥିଲା ଅଧାବାଟରେ ଏଭଳି ଦୁର୍ଘଟଣା ଘଟିବ ବୋଲି । ଗୁରୁତର ଯବାନମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି । ଏଭଳି ଅଭାବନୀୟ ଘଟଣା ଘଟିଛି ଛତିଶଗଡ଼ରେ ।  

ସୂଚନା ଅନୁଯାୟୀ, ଛତିଶଗଡ ବସ୍ତର ଜିଲ୍ଲା ଦନ୍ତେୱାଡ଼ା ସ୍ଥିତ ଫରସପାଲିରୁ ନିର୍ବାଚନ କାମ ସାରି ଜଗଦଲପୁର ମୁଖ୍ୟ କାର୍ଯ୍ୟାଳୟକୁ ଏକ ବସ୍ ଯୋଗେ ଯବାନମାନେ ଫେରୁଥିଲେ । ଏହି ବସରେ ପ୍ରାୟ ୩୨ ଜଣ ଯବାନ ଯାଉଥିଲେ । ସେହି ସମୟରେ ବସ୍ ସାମ୍ନାକୁ ଗୋରୁପଲ ଆସିଯାଇଥିଲେ । ଏହାପରେ ବସ ଡ୍ରାଇଭର ଜଣକ ନିୟନ୍ତ୍ରଣ ହରାଇଥିଲେ । ଯାହାଫଳରେ ବସଟି ରାସ୍ତା କଡ଼କୁ ଓଲଟିପଡିଥିଲା । 

ଏହି ଦୁର୍ଘଟଣାର ଖବର ସୁରକ୍ଷା ବାହିନୀ ଜାଣିବା ପରେ ସେମାନେ ଘଟଣା ସ୍ଥଳରେ ପହଂଚି ଆହତ ଯବାନମାନଙ୍କୁ   ଉଦ୍ଧାର କରିଥିଲେ । ଏହି ଦୁର୍ଘଟଣାରେ ୧୦ ଜଣ ଯବାନ ଆହତ ହୋଇଥିବା ବେଳେ  ସେଥିମଧ୍ୟରୁ ତିନିଜଣ ଯବାନ  ଗୁରୁତର ଅଛନ୍ତି । ଆହତ ଯବାନ ମାନଙ୍କୁ  ଚିକିତ୍ସା ପାଇଁ ଧିମ୍ରାପାଲ ହସ୍ପିଟାଲକୁ ସ୍ଥାନାନ୍ତରିତ କରାଯାଇଛି । ଆଉ କିଛି ଯବାନ କମ୍ୟୁନିଟି ହେଲଥ ସେଣ୍ଟର ତୁକାପାଲର ଡାକ୍ତରଖାନା ରେ ଚିକିତ୍ସିତ ହେଉଛନ୍ତି।