ନୂଆଦିଲ୍ଲୀ: ରାଜଧାନୀ ଦିଲ୍ଲୀର ଜନ୍ତରମନ୍ତରରେ ବିକ୍ଷୋଭ ପ୍ରଦର୍ଶନ ଏବଂ ଉତ୍ତେଜନା ପ୍ରକାଶ ପାଇବା ମଧ୍ୟରେ ଏକ ବଡ଼ ଖବର ସାମ୍ନାକୁ ଆସିଛି। ଆନ୍ଦୋଳନରତ ନେତାମାନେ ସରକାରଙ୍କ ପ୍ରସ୍ତାବିତ ଆଲୋଚନାକୁ ପ୍ରତ୍ୟାଖ୍ୟାନ କରିଛନ୍ତି। ସରକାର ବାରମ୍ବାର କହୁଛନ୍ତି ଯେ ସେମାନେ ପ୍ରଦର୍ଶନକାରୀଙ୍କ ସହ କଥାବାର୍ତ୍ତା ପାଇଁ ପ୍ରସ୍ତୁତ, କିନ୍ତୁ ସୂତ୍ରରୁ ମିଳିଥିବା ସୂଚନା ଅନୁଯାୟୀ CJP ପ୍ରତିନିଧିମାନେ କେନ୍ଦ୍ରମନ୍ତ୍ରୀ ଜେ.ପି. ନଡ୍ଡାଙ୍କ ସହ ବୈଠକ କରିବାକୁ ମନା କରିଦେଇଛନ୍ତି।

ସରକାର ଏହି ବିବାଦୀୟ ପ୍ରସଙ୍ଗକୁ ଯଥାଶୀଘ୍ର ସମାଧାନ କରିବାକୁ ଚାହୁଁଥିବା ବେଳେ ଆନ୍ଦୋଳନକାରୀଙ୍କ ଏହି ଆଭିମୁଖ୍ୟ ପରିସ୍ଥିତିକୁ ଆହୁରି ଜଟିଳ କରିଦେଇଛି। ଏହି ସମୟରେ କେନ୍ଦ୍ରମନ୍ତ୍ରୀ ଗଜେନ୍ଦ୍ର ସିଂହ ଶେଖାୱତ ଯୁବବର୍ଗଙ୍କୁ ଆଶ୍ୱାସନା ଦେଇ କହିଛନ୍ତି, ମୁଁ ଯୁବପିଢ଼ିଙ୍କୁ କହିବାକୁ ଚାହେଁ ଯେ, ଆପଣଙ୍କ ଭାବନାକୁ ନେଇ କିଛି ଲୋକ ନିଜର ସ୍ୱାର୍ଥ ହାସଲ ପାଇଁ ଆନ୍ଦୋଳନକୁ ଉସକାଇବାକୁ ଚେଷ୍ଟା କରୁଛନ୍ତି। ସରକାର NEET ପ୍ରସଙ୍ଗରେ ବିସ୍ତୃତ ଆଲୋଚନା ପାଇଁ ସମ୍ପୂର୍ଣ୍ଣ ପ୍ରସ୍ତୁତ, କିନ୍ତୁ ବିରୋଧୀ ଦଳ ଏହି ଚର୍ଚ୍ଚାରୁ ଖସିଯିବାକୁ ଚେଷ୍ଟା କରୁଛନ୍ତି। ଦେଶର ଜନସାଧାରଣ ବିରୋଧୀଙ୍କ ଏହି ଆଚରଣକୁ ଭଲଭାବେ ବୁଝିପାରୁଛନ୍ତି।

ସଂସଦରେ ବି ଚର୍ଚ୍ଚା ପାଇଁ ପ୍ରସ୍ତୁତ ସରକାର

ଏହା ବ୍ୟତୀତ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ମଧ୍ୟ ସ୍ପଷ୍ଟ କରିଛନ୍ତି ଯେ, ସରକାର ଏହି ପ୍ରସଙ୍ଗ ଉପରେ ଗୃହ ଭିତରେ ମଧ୍ୟ ଆଲୋଚନା କରିବାକୁ ପ୍ରସ୍ତୁତ ଅଛନ୍ତି। ଅପରପକ୍ଷରେ, ଜନ୍ତରମନ୍ତରରେ ସୁରକ୍ଷା ବଳ ଏବଂ ପ୍ରଦର୍ଶନକାରୀଙ୍କ ମଧ୍ୟରେ ଧସ୍ତାଧସ୍ତି ଓ ଲାଠିଚାଳନା ପରେ ପରିସ୍ଥିତି ବେଶ୍ ଉତ୍ତେଜନାପୂର୍ଣ୍ଣ ରହିଛି। ସରକାରଙ୍କ ଶାନ୍ତି ପ୍ରସ୍ତାବକୁ CJP ନେତାମାନେ ପ୍ରତ୍ୟାଖ୍ୟାନ କରିବା ପରେ ଏହି ବିରୋଧ ପ୍ରଦର୍ଶନ କେଉଁ ମୋଡ଼ ନେଉଛି, ତାହା ଉପରେ ସମସ୍ତଙ୍କ ନଜର ରହିଛି।