ନୂଆଦିଲ୍ଲୀ: ଆମେରିକାର ବାଣିଜ୍ୟ ମନ୍ତ୍ରୀ ହାୱାର୍ଡ ଲୁଟନିକ୍ ଶୁଳ୍କ ଉପରେ ଡୋନାଲ୍ଡ ଟ୍ରମ୍ପଙ୍କ ଜିଦଖୋର  ମନୋଭାବକୁ ସମର୍ଥନ କରିଛନ୍ତି। ସେ କହିଛନ୍ତି ଭାରତକୁ କ୍ଷମା ମାଗିବାକୁ ପଡିବ। ଭାରତୀୟ ବ୍ୟବସାୟୀମାନେ ଅନୁଭବ କରିଛନ୍ତି ଯେ ସେମାନେ ଆମେରିକା ବଜାର ବିନା କିଛି କରିପାରିବେ ନାହିଁ। ଏକ କଡ଼ା ବାର୍ତ୍ତା ଦେଇ ସେ କହିଛନ୍ତି ଯେ ଭାରତ କ୍ଷମା ମାଗିବ ଏବଂ ରାଷ୍ଟ୍ରପତି ଟ୍ରମ୍ପଙ୍କ ସହ ବୁଝାମଣା କରିବ। ଆମେରିକା ମନ୍ତ୍ରୀଙ୍କ ଏମିତି ବୟାନ ଦେଖି ଲାଗୁଛି ସେ ଅଲଗା ଦୁନିଆରେ ରହୁଛନ୍ତି।

'ଭାରତ କ୍ଷମା ମାଗି ଆଲୋଚନା ଟେବୁଲକୁ ଆସିବ'

ବ୍ଲୁମବର୍ଗକୁ ଏକ ସାକ୍ଷାତକାରରେ, ହାୱାର୍ଡ ଲୁଟନିକ୍ ଭାରତକୁ କାନାଡା ସହିତ ତୁଳନା କରିଛନ୍ତି। ସେ କହିଛନ୍ତି, "ଯେତେବେଳେ କାନାଡା ଅନୁଭବ କଲା ଯେ ଏହାର ଅର୍ଥନୀତି ବୁଡ଼ି ଯାଉଛି, ସେମାନେ ବାଣିଜ୍ୟ ଚୁକ୍ତି ଉପରେ ନିଜର ଆଭିମୁଖ୍ୟ ପରିବର୍ତ୍ତନ କରିଥିଲେ। ଏହି କାରଣରୁ ମୁଁ ଭାବୁଛି ଭାରତ ମଧ୍ୟ ମାସେ କିମ୍ବା ଦୁଇ ମାସ ମଧ୍ୟରେ ଆଲୋଚନା ଟେବୁଲକୁ ଆସିବ। ସେମାନେ କ୍ଷମା ମାଗିବେ ଏବଂ ରାଷ୍ଟ୍ରପତି ଟ୍ରମ୍ପଙ୍କ ସହ ଆଲୋଚନା କରିବାକୁ ଚେଷ୍ଟା କରିବେ। ସେ କହିଛନ୍ତି ଯେ ଏହା ସମ୍ପୂର୍ଣ୍ଣ ଭାବରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଉପରେ ନିର୍ଭର କରିବ ଯେ ସେ ପ୍ରଧାନମନ୍ତ୍ରୀ ମୋଦୀଙ୍କ ସହ କିପରି ଡିଲ୍ କରିବାକୁ ଚାହାଁନ୍ତି।

'ଭାରତ ବ୍ରିକ୍ସର ଅଂଶ ହେବା ବନ୍ଦ କରିବା ଉଚିତ'

ସେ ବ୍ରିକ୍ସ ଦେଶଗୁଡ଼ିକୁ ଚେତାବନୀ ଦେଇ କହିଛନ୍ତି, "ଭାରତକୁ ଆମେରିକାକୁ ସମର୍ଥନ କରିବା କିମ୍ବା ରୁଷ ଏବଂ ଚୀନ ସହିତ ମିତ୍ରତା ମଧ୍ୟରୁ ଗୋଟିଏ ବାଛିବାକୁ ପଡିବ। ବ୍ରିକ୍ସ ହେଉଛି ରୁଷ ଏବଂ ଚୀନ୍ ମଧ୍ୟରେ ସଂଯୋଗ। ଯଦି ଭାରତ ବ୍ରିକ୍ସ ସହିତ ଯିବାକୁ ଚାହୁଁଛି ତେବେ ଆଗକୁ ବଢୁ। ଦେଖିବା ଏହା କେତେ ଦିନ ଚାଲିବ। ଲୁଟନିକ୍ ଚେତାବନୀ ଦେଇଛନ୍ତି, ଭାରତ ରୁଷ ତେଲ କିଣିବା ବନ୍ଦ କରିବା ଉଚିତ। ବ୍ରିକ୍ସର ଅଂଶ ହେବା ବନ୍ଦ କରିବା ଉଚିତ୍। ଆମେରିକା ଏବଂ ଡଲାରକୁ ସମର୍ଥନ କରନ୍ତୁ, ନଚେତ୍ ୫୦ ପ୍ରତିଶତ ଶୁଳ୍କ ସାମ୍ନା କରିବାକୁ ପ୍ରସ୍ତୁତ ରୁହନ୍ତୁ।

'ଭାରତ ଏବଂ ଚୀନ ପରସ୍ପରକୁ ସାମଗ୍ରୀ ବିକ୍ରି କରିପାରିବେ ନାହିଁ'

ସେ କହିଛନ୍ତି ଭାରତ ଏବଂ ଚୀନ ପରସ୍ପରକୁ ସାମଗ୍ରୀ ବିକ୍ରି କରିପାରିବେ ନାହିଁ। ଶେଷରେ ସେମାନଙ୍କୁ ଆମେରିକାର ଶରଣରେ ଆସିବାକୁ ପଡିବ। ଭାରତ-ଆମେରିକା ବାଣିଜ୍ୟ ଆଲୋଚନାର ସମ୍ଭାବନା ସମ୍ପର୍କରେ ସେ କହିଛନ୍ତି, ଆମେ ସବୁବେଳେ ଆଲୋଚନା ପାଇଁ ପ୍ରସ୍ତୁତ। ଭାରତ ଏବଂ ଚୀନ ପରି ଦେଶଗୁଡ଼ିକ ଶେଷରେ ଆମେରିକୀୟ ବଜାର ଉପରେ ନିର୍ଭର କରନ୍ତି। ଲୋକଙ୍କୁ ମନେ ରଖିବାକୁ ପଡିବ ଯେ ଆମର ୩୦ ଟ୍ରିଲିୟନ ଡଲାର ଅର୍ଥନୀତି ବିଶ୍ୱର ଗ୍ରାହକ।