ନୂଆଦିଲ୍ଲୀ: ଜାତୀୟ ରାଜଧାନୀରେ ଗ୍ରୀଷ୍ମ ଋତୁ ଆରମ୍ଭ ହେବା ସହିତ ଅଗ୍ନିକାଣ୍ଡ ଘଟଣା ସଂଖ୍ୟା ବୃଦ୍ଧି ପାଉଛି। ଦିଲ୍ଲୀ ଅଗ୍ନିଶମ ସେବା ତଥ୍ୟ ଅନୁଯାୟୀ, ଚଳିତ ବର୍ଷ ଜାନୁଆରୀ ୧ ରୁ ମାର୍ଚ୍ଚ ୯ ତାରିଖ ପର୍ଯ୍ୟନ୍ତ ଅଗ୍ନିଶମ ବିଭାଗକୁ ୨,୯୮୮ କଲ୍ ମିଳିଥିଲା। ପ୍ରତିଦିନ ପ୍ରାୟ ୪୪ କଲ୍‌ ଆସୁଛି। ଏହି ଘଟଣାରେ ୧୫ ଜଣଙ୍କର ପୋଡ଼ି ମୃତ୍ୟୁ ହୋଇଥିଲା ବେଳେ ଅଗ୍ନିଶମ କର୍ମଚାରୀ ଅନ୍ୟ ୯୩ ଜଣଙ୍କୁ ଉଦ୍ଧାର କରିଥିଲେ।

ତଥ୍ୟ ଅନୁଯାୟୀ ଗତ ବର୍ଷର ପ୍ରଥମ ଦୁଇ ମାସରେ ଅଗ୍ନିଶମ ବିଭାଗକୁ ୨,୦୧୪ କଲ୍ ମିଳିଥିଲା, ଯେଉଁଥିରେ ୮ ଜଣଙ୍କର ପୋଡ଼ି ମୃତ୍ୟୁ ହୋଇଥିଲା। ଏହି ବର୍ଷ ଘଟଣା ଏବଂ ମୃତ୍ୟୁ ସଂଖ୍ୟା ବୃଦ୍ଧି ଚିନ୍ତାର କାରଣ।

ଅଗ୍ନିଶମ ବିଭାଗର ସୂଚନା ଅନୁଯାୟୀ, ସମ୍ପ୍ରତି ହୋଲିରେ ସଦର ବଜାରର ୧୨ ଟୁଟି ଚୌକରେ ଏକ ପାଞ୍ଚ ମହଲା କୋଠାରେ ଏକ ବଡ଼ ଅଗ୍ନିକାଣ୍ଡ ଘଟିଥିଲା। ଏହି ଦୁର୍ଘଟଣାରେ ଦୁଇ ଜଣ ଶ୍ରମିକ ପୋଡ଼ି ମୃତ୍ୟୁବରଣ କରିଥିଲେ। ନିଆଁ ଏତେ ଦ୍ରୁତ ଗତିରେ ବ୍ୟାପିଥିଲା ଯେ କୋଠା ଭିତରେ ଫସି ରହିଥିବା ଲୋକଙ୍କୁ ଖସିଯିବାର ସୁଯୋଗ ମଧ୍ୟ ମିଳିନଥିଲା। ଘଟଣା ସ୍ଥଳରେ ଅଗ୍ନିଶମ ବାହିନୀର ଅନେକ ଗାଡ଼ି ପହଞ୍ଚି ବହୁତ ଚେଷ୍ଟା ପରେ ନିଆଁକୁ ଆୟତ୍ତ କରିଥିଲେ।

ସେହି ଦିନ, ବାହ୍ୟ ଦିଲ୍ଲୀର ରିଥାଲା ଅଞ୍ଚଳରେ ଏକ ବଡ଼ ଅଗ୍ନିକାଣ୍ଡ ଘଭଥିଲା। ଶହେରୁ ଅଧିକ କୁଡ଼ିଆ ଘରେ ନିଆଁ ଲାଗିଯାଇଥିଲା, ଯାହା ଫଳରେ ଅଞ୍ଚଳରେ ଆତଙ୍କ ଖେଳିଯାଇଥିଲା।

ଏହି ଦୁର୍ଘଟଣାରେ ଜଣେ କିଶୋରଙ୍କ ମୃତ୍ୟୁ ହୋଇଥିଲା, ଯେତେବେଳେ ଅନେକ ପରିବାରର ଜିନିଷପତ୍ର ନଷ୍ଟ ହୋଇଯାଇଥିଲା। ଅଗ୍ନିଶମ ବାହିନୀର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଘଣ୍ଟା ଘଣ୍ଟା କଠିନ ପରିଶ୍ରମ ପରେ ନିଆଁକୁ ନିୟନ୍ତ୍ରଣ କରିଥିଲେ। ଅଗ୍ନିଶମ ବାହିନୀର ଅଧିକାରୀମାନେ ଜନସାଧାରଣଙ୍କୁ ଗ୍ରୀଷ୍ମ ଋତୁରେ ସତର୍କତାର ସହିତ ବୈଦ୍ୟୁତିକ ଉପକରଣ ବ୍ୟବହାର କରିବାକୁ ଏବଂ ଏପରି ଘଟଣା ରୋକିବା ପାଇଁ ଅଗ୍ନି ନିରାପତ୍ତା ବ୍ୟବସ୍ଥା ଗ୍ରହଣ କରିବାକୁ ନିବେଦନ କରିଥିଲେ।

ଅଧିକ ପଢ଼ନ୍ତୁ: ଦୁବାଇ ଉପରେ ପୁଣି ଆକ୍ରମଣ କଲା ଇରାନ