ନୂଆଦିଲ୍ଲୀ: ଭାରତ-ପାକିସ୍ତାନ ଅସ୍ତ୍ରବିରତି କାର୍ଯ୍ୟକାରୀ ହେବାର କିଛି ଘଣ୍ଟା ପରେ, ପଞ୍ଜାବର ଫିରୋଜପୁର, ଗୁରୁଦାସପୁର, ମୁକ୍ତସର, ହୋସିଆରପୁର, ବର୍ଣ୍ଣାଲା, ମୋଗା, ପଠାନକୋଟ, ଫାଜିଲକା, କପୁରଥଲା ଏବଂ ଅନ୍ୟାନ୍ୟ ଜିଲ୍ଲାରେ ଶନିବାର ରାତିରେ ପୁଣି ଥରେ ବ୍ଲାକଆଉଟ୍ ଜାରି କରାଯାଇଛି।

ସେହିପରି ରାଜସ୍ଥାନର ପୋଖରାନ ଏବଂ ବାଡମେରରେ ଡ୍ରୋନ ଆକ୍ରମଣ କରାଯାଇଥିଲା, ଯାହାକୁ ମଝି ଆକାଶରେ ଧ୍ୱଂସ କରାଯାଇଥିଲା। ଏହା ପରେ, ସୀମାନ୍ତ ଜିଲ୍ଲାଗୁଡ଼ିକରେ ରେଡ୍ ଆଲର୍ଟ ଏବଂ ବାଡମେରରେ ହାଇ ରେଡ୍‌ଆଲର୍ଟ ଘୋଷଣା କରାଯାଇଥିଲା। ଯୋଧପୁରରେ ସମସ୍ତ ବଜାର ବନ୍ଦ ଥିଲା।

ଅସ୍ତ୍ରବିରତି ପରେ ପଞ୍ଜାବର ଜିଲ୍ଲାଗୁଡ଼ିକରେ ଶନିବାର ରାତିରେ ବ୍ଲାକଆଉଟ୍ ପ୍ରତ୍ୟାହାର ଘୋଷଣା କରାଯାଇଥିଲା। ବଠିଣ୍ଡାରେ ଲୋକମାନେ ନିଜେ ବ୍ଲାକଆଉଟ୍ ଲାଗୁ କରିଥିଲେ। ଅମୃତସରର ଶ୍ରୀ ଗୁରୁ ରାମଦାସ ଜୀ ଅନ୍ତର୍ଜାତୀୟ ବିମାନବନ୍ଦର ପାଖରେ ଡ୍ରୋନ୍ ଗତିବିଧି ଦେଖାଯାଇଥିଲା, ଯାହା ଫଳରେ ସୁରକ୍ଷା ଏଜେନ୍ସିଗୁଡ଼ିକ ସତର୍କ ହୋଇଯାଇଛନ୍ତି।

ପାକିସ୍ତାନ ପଞ୍ଜାବର ଅନେକ ସ୍ଥାନରେ ଶନିବାର ସକାଳୁ ଡ୍ରୋନ ମାଡ଼ କରିଥିଲା। ପଠାନକୋଟ ଏୟାରବେସ୍ ଏବଂ ସାମରିକ ଅଞ୍ଚଳ, ଜଳନ୍ଧରର ଆଦମପୁର ବିମାନବନ୍ଦର, ବିଏସଏଫ କ୍ୟାଣ୍ଟନମେଣ୍ଟ, ହରିକେ ହେଡ୍ ୱାର୍କସ, ଶ୍ରୀ ଗୋଇନ୍ଦୱାଲ ସାହିବରେ ଥର୍ମାଲ ପ୍ଲାଣ୍ଟ ଉପରେ ଆକ୍ରମଣ କରିବାକୁ ପାକିସ୍ତାନର ଉଦ୍ୟମକୁ ପଣ୍ଡ କରାଯାଇଥିଲା।

ଅମୃତସରର ଏକ ଘର ଉପରକୁ ପାକିସ୍ତାନୀ ଡ୍ରୋନ୍ ଗୁଳି ଚଳାଇଥିଲା। ଡ୍ରୋନ୍ ଆକ୍ରମଣ ଯୋଗୁଁ ଅତି କମରେ ଦୁଇଟି ଗାଁର କ୍ଷେତରେ ବଡ଼ ଗଭୀର ଗର୍ତ୍ତ ସୃଷ୍ଟି ହୋଇଥିଲା। 

ଶୁକ୍ରବାର-ଶନିବାର ରାତି ପ୍ରାୟ ୧:୧୫ ସମୟରେ, ବିମାନବନ୍ଦର ନିକଟରେ ଅନେକ ବିସ୍ଫୋରଣ ଶବ୍ଦ ଶୁଣା ଯାଇଥିଲା। ସକାଳେ, ସିକନ୍ଦରପୁର ଅଞ୍ଚଳର ଏକ ଘର ଭିତରେ ଡ୍ରୋନର ଖଣ୍ଡଗୁଡ଼ିକ ମିଳିଥିଲା, ଯେତେବେଳେ ମୁହାଦ୍ଦିପୁରର ଦୁଇଟି ସ୍ଥାନରେ ଅନ୍ୟ କିଛି ଅଂଶ ମିଳିଥିଲା ଏବଂ ଧଣ୍ଡୋର ଚକ୍ ଈଶ୍ୱରୱାଲର କ୍ଷେତରେ ଏକ କ୍ଷେପଣାସ୍ତ୍ର ପଡ଼ିଥିବା ଦେଖିବାକୁ ମିଳିଥିଲା।

ଅଧିକ ପଢ଼ନ୍ତୁ: କେନ୍ଦ୍ର ସରକାର ସେନାକୁ ଦେଲେ ଫ୍ରି ହ୍ୟାଣ୍ଡ