ସିଓଲ: ରାଷ୍ଟ୍ରପତି ୟୁନ୍ ସୁକ୍ ୟୁଲ୍ ମଙ୍ଗଳବାର ରାତିରେ ମାର୍ଶାଲ ଲ' ଘୋଷଣା କରିବା ପରେ ଦକ୍ଷିଣ କୋରିଆବାସୀ ଆଶ୍ଚର୍ଯ୍ୟ ହୋଇଯାଇଛନ୍ତି ଏବଂ ସୈନିକମାନେ ସଂସଦ ଭିତରକୁ ପ୍ରବେଶ କରିବାକୁ ଚେଷ୍ଟା କରିଛନ୍ତି। ୧୯୮୦ ଦଶକ ପରେ ଦେଶର ଗଣତନ୍ତ୍ର ପ୍ରତି ସବୁଠାରୁ ଗମ୍ଭୀର ଚ୍ୟାଲେଞ୍ଜକୁ ବିରୋଧ କରି ସାଂସଦ ଓ ବିକ୍ଷୋଭକାରୀମାନେ ପ୍ରତିବାଦ କରିଛନ୍ତି।

ସଂସଦର ବାଚସ୍ପତି ମାର୍ଶାଲ ଲ' ଘୋଷଣାକୁ ଅବୈଧ ଘୋଷଣା କରିଥିଲେ ଏବଂ ସାଂସଦମାନେ ଏହାକୁ ପ୍ରତ୍ୟାଖ୍ୟାନ କରିବାକୁ ଭୋଟ୍ ଦେଇଥିଲେ। ଏକ ସ୍ଥାନୀୟ ନ୍ୟୁଜ୍ ପୋର୍ଟାଲରେ ପ୍ରକାଶିତ ରିପୋର୍ଟ ଅନୁଯାୟୀ, ଦକ୍ଷିଣ କୋରିଆର ସେନା କହିଛି ଯେ ରାଷ୍ଟ୍ରପତି ୟୁନ୍ ସୁକ-ୟିଓଲ୍ ଏହାକୁ ହଟାଇବାକୁ ନିର୍ଦ୍ଦେଶ ନଦେବା ପର୍ଯ୍ୟନ୍ତ ସେମାନେ ମାର୍ଶାଲ ଲ' ବଜାୟ ରଖିବେ।

ସାମରିକ ଆଇନ ଜାରି ରଖିବାକୁ ସେନାର ନିଷ୍ପତ୍ତିକୁ ନେଇ ଅଧିକ ବିତର୍କ ଆରମ୍ଭ ହୋଇଛି ଏବଂ ବିରୋଧୀ ଦଳ ନେତା ଲି ଜେ-ମୟୁଙ୍ଗ ବେଆଇନ ଭାବେ ଏହି ପଦକ୍ଷେପକୁ ନିନ୍ଦା କରିବା ସହ ଏଭଳି ଶାସନ ଅଧୀନରେ ଆଦେଶ ପାଳନ କରିବା ଆଇନର ଉଲ୍ଲଂଘନ ହେବ ବୋଲି ଦାବି କରିଛନ୍ତି। ଲିଙ୍କ ବୟାନରେ କୁହାଯାଇଛି ଯେ ସାମ୍ପ୍ରତିକ ପରିସ୍ଥିତିରେ ମାର୍ଶାଲ ଲ' ବେଆଇନ।

ଘୋଷଣାର ମାତ୍ର ଅଢ଼େଇ ଘଣ୍ଟା ମଧ୍ୟରେ ନ୍ୟାସନାଲ ଆସେମ୍ବ୍ଲିର ୧୯୦ ଜଣ ସଦସ୍ୟ ମାର୍ଶାଲ ଲ' ହଟାଇବା ପାଇଁ ଭୋଟ୍ ଦେଇଥିଲେ। ଦକ୍ଷିଣ କୋରିଆରେ ଏହି ଆଦେଶ ବିରୋଧରେ ହଜାର ହଜାର ଲୋକ ରାଜରାସ୍ତାକୁ ଓହ୍ଲାଇଛନ୍ତି। ଏହା ସତ୍ତ୍ୱେ ରାଷ୍ଟ୍ରପତି ତାଙ୍କ ନିଷ୍ପତ୍ତିରେ ଅଟଳ ରହିଛନ୍ତି। ମଧ୍ୟରାତ୍ରିରେ ସେଠାକାର ସ୍ଥିତି ଏତେ ଖରାପ ହୋଇଯାଇଥିଲା ଯେ ରାଷ୍ଟ୍ରପତିଙ୍କୁ ରାସ୍ତାରେ ଟ୍ୟାଙ୍କ ନେବାକୁ ପଡ଼ିଥିଲା।

ବ୍ରିଟେନ ସରକାର ଦକ୍ଷିଣ କୋରିଆରେ ବିକ୍ଷୋଭ ନ କରିବାକୁ ବ୍ରିଟିଶ ଲୋକଙ୍କୁ ଅନୁରୋଧ କରିଛନ୍ତି ଏବଂ ପରିସ୍ଥିତି ଉପରେ ତୀକ୍ଷ୍ଣ ନଜର ରଖିଛନ୍ତି ବୋଲି କହିଛନ୍ତି। ପ୍ରଧାନମନ୍ତ୍ରୀ କିର ଷ୍ଟାରମରଙ୍କ ଉପ ମୁଖପାତ୍ର ସାମ୍ବାଦିକମାନଙ୍କୁ କହିଛନ୍ତି ଯେ ଆମେ ସମସ୍ତ ବ୍ରିଟିଶ ନାଗରିକଙ୍କୁ ପରାମର୍ଶ ଦେବୁ ଯେ ସେମାନେ ଅପଡେଟ୍ ପାଇଁ ବ୍ରିଟେନକୁ ସେମାନଙ୍କଯାତ୍ରା ପରାମର୍ଶ ଉପରେ ନଜର ରଖନ୍ତୁ ଏବଂ ସ୍ଥାନୀୟ କର୍ତ୍ତୃପକ୍ଷଙ୍କ ପରାମର୍ଶ ଅନୁସରଣ କରନ୍ତୁ।

ଦକ୍ଷିଣ କୋରିଆର ବିରୋଧୀ ଦଳ ନେତା ଲି ଜେ-ମୟୁଙ୍ଗ ଘୋଷଣା କରିଛନ୍ତି ଯେ ମାର୍ଶାଲ ଲ' ପରିପ୍ରେକ୍ଷୀରେ ରାଷ୍ଟ୍ରପତି ୟୁନ୍ ସୁକ-ୟୁଲ୍ ଏବଂ ସାମରିକ କମାଣ୍ଡରଙ୍କ ଦ୍ୱାରା ଜାରି ନିର୍ଦ୍ଦେଶକୁ ଯିଏ ବି ପାଳନ କରିବ ସେ ବେଆଇନ ଭାବେ କାର୍ଯ୍ୟ କରିବ। ବର୍ତ୍ତମାନର ପ୍ରଶାସନ ଅଧୀନରେ ଯଦି ମାର୍ଶାଲ ଲ' ଘୋଷଣା କରାଯାଏ, ତେବେ ଏହାର ଆଇନଗତ ବୈଧତା ରହିବ ନାହିଁ ବୋଲି ଲି କହିଛନ୍ତି।

ଦେଶରେ ବଢୁଥିବା ରାଜନୈତିକ ଉତ୍ତେଜନା ମଧ୍ୟରେ ଲିଙ୍କ ଏହି ମନ୍ତବ୍ୟ ଆସିଛି। ଅସାମ୍ବିଧାନିକ ନିର୍ଦ୍ଦେଶ ପାଳନ କରିବା ଦ୍ୱାରା ବ୍ୟକ୍ତି ଜଣକ ଆଇନର ଭୁଲ ପାର୍ଶ୍ୱରେ ରହିବେ ବୋଲି ସେ ଗୁରୁତ୍ୱାରୋପ କରିଥିଲେ। ଏଭଳି ପରିପ୍ରେକ୍ଷୀରେ ଲାଗୁ ହୋଇଥିବା ମାର୍ଶାଲ ଲ' ଅବୈଧ। ଏଭଳି ଆଦେଶ ପାଳନ କରିବା ଆଇନର ଉଲ୍ଲଂଘନ।

ଏହି ଘୋଷଣା ଶାସକ ଓ ବିରୋଧୀ ଗୋଷ୍ଠୀଙ୍କ ମଧ୍ୟରେ ସଂଘର୍ଷକୁ ବଢ଼ାଇ ଦେଇଛି ଏବଂ ପ୍ରଶାସନ ଗଣତାନ୍ତ୍ରିକ ନୀତିକୁ କ୍ଷୁଣ୍ଣ କରୁଛି ବୋଲି ବିରୋଧୀ ଗୋଷ୍ଠୀ ଅଭିଯୋଗ କରିଛନ୍ତି। ଲି ସେନା ଓ ସାଧାରଣ ନାଗରିକଙ୍କୁ ଆଇନର ଶାସନକୁ ପ୍ରାଥମିକତା ଦେବାକୁ ଅନୁରୋଧ କରିବା ସହ ବର୍ତ୍ତମାନର ସରକାର ଜରୁରୀକାଳୀନ କ୍ଷମତାର ସମ୍ଭାବ୍ୟ ଅପବ୍ୟବହାର ବିରୋଧରେ ଚେତାବନୀ ଦେଇଛନ୍ତି।