ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର 'ମନ କି ବାତ'ର ୧୨୨ତମ ସଂସ୍କରଣକୁ ସମ୍ବୋଧିତ କରିଛନ୍ତି। ଏହି ଅବସରରେ ସେ ‘ଅପରେସନ ସିନ୍ଦୂର’ ବିଷୟରେ ଆଲୋଚନା କରିଛନ୍ତି। ପ୍ରଧାନମନ୍ତ୍ରୀ କହିଛନ୍ତି, ଅପରେସନ ସିନ୍ଦୂର ସାରା ବିଶ୍ୱରେ ଆତଙ୍କବାଦ ବିରୋଧରେ ଲଢ଼େଇକୁ ନୂତନ ଆତ୍ମବିଶ୍ୱାସ ଏବଂ ଉତ୍ସାହ ଦେଇଛି। ଏହା କେବଳ ଏକ ସାମରିକ ମିଶନ ନୁହେଁ। ବରଂ ଏହା ଆମର ସଂକଳ୍ପ, ସାହସ ଏବଂ ପରିବର୍ତ୍ତନଶୀଳ ଭାରତର ଏକ ପ୍ରତିଛବି।

ପ୍ରଧାନମନ୍ତ୍ରୀ କହିଛନ୍ତି, ଆମର ସୈନିକମାନେ ଆତଙ୍କବାଦୀ ଶିବିରଗୁଡ଼ିକୁ ଧ୍ୱଂସ କରିଛନ୍ତି। ଏହା ଥିଲା ସେମାନଙ୍କର ଅଦମ୍ୟ ସାହସ ଏବଂ ଭାରତୀୟ ନିର୍ମିତ ଅସ୍ତ୍ରଶସ୍ତ୍ର, ଉପକରଣ ଏବଂ ପ୍ରଯୁକ୍ତିର ଶକ୍ତି। ଏକ ଆତ୍ମନିର୍ଭରଶୀଳ ଭାରତ ପାଇଁ ସଂକଳ୍ପ ମଧ୍ୟ ଥିଲା। ଏହି ଅଭିଯାନ ପରେ ସାରା ଦେଶରେ ଭୋକାଲ୍ ଫର୍ ଲୋକାଲକୁ ନେଇ ନୂତନ ଶକ୍ତି ଦେଖିବାକୁ ମିଳୁଛି।

ଆଜି ସମଗ୍ର ଦେଶ ଆତଙ୍କବାଦ ବିରୁଦ୍ଧରେ ଏକତ୍ରିତ, କ୍ରୋଧରେ ପରିପୂର୍ଣ୍ଣ ଏବଂ ଦୃଢ଼ ସଂକଳ୍ପବଦ୍ଧ ଅଛନ୍ତି। ଏହା ପ୍ରତ୍ୟେକ ଭାରତୀୟଙ୍କ ସଂକଳ୍ପ। ଆମକୁ ଆତଙ୍କବାଦକୁ ଶେଷ କରିବାକୁ ପଡ଼ିବ।  ‘ଅପରେସନ୍ ସିନ୍ଦୂର’ ସମୟରେ ଆମ ସେନା ଦ୍ୱାରା ପ୍ରଦର୍ଶିତ ବୀରତ୍ୱ ପ୍ରତ୍ୟେକ ଭାରତୀୟଙ୍କୁ ଗର୍ବିତ କରିଛି। 

-ନରେନ୍ଦ୍ର ମୋଦୀ, ପ୍ରଧାନମନ୍ତ୍ରୀ

ମାଓବାଦ ଉପରେ ଆଲୋଚନା କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି, ମହାରାଷ୍ଟ୍ରର ଗଡଚିରୋଲି ଜିଲ୍ଲାର କାଟେଝରୀ ଗାଁର ଲୋକମାନେ ବର୍ଷ ବର୍ଷ ଧରି ଏହି ଦିନକୁ ଅପେକ୍ଷା କରିଥିଲେ। ପୂର୍ବରୁ ଏଠାରେ କେବେବି ବସ୍ ଚାଲିପାରିନଥିଲା। କାରଣ ଏହି ଗାଁଟି ମାଓ ହିଂସା ଦ୍ୱାରା ପ୍ରଭାବିତ ହୋଇଥିଲା ଏବଂ ଯେତେବେଳେ ବସ୍‌ଟି ପ୍ରଥମ ଥର ପାଇଁ ଗାଁରେ ପହଞ୍ଚିଲା। ଲୋକମାନେ ଡ୍ରମ୍ ବଜାଇ ଏହାକୁ ସ୍ୱାଗତ କରିଥିଲେ।

ପ୍ରଧାନମନ୍ତ୍ରୀ କହିଛନ୍ତି, ଗତ ୫ ବର୍ଷ ମଧ୍ୟରେ ଗୁଜରାଟର ଗିରରେ ସିଂହ ସଂଖ୍ୟା ୬୭୪ରୁ ୮୯୧କୁ ବୃଦ୍ଧି ପାଇଛି। ସିଂହଙ୍କ ଏହି ସଂଖ୍ୟା ବହୁତ ଉତ୍ସାହଜନକ। ୧୧ଟି ଜିଲ୍ଲାର ୩୫ ହଜାର ବର୍ଗ କିଲୋମିଟର ଅଞ୍ଚଳରେ ସିଂହ ଗଣନା କରାଯାଇଥିଲା, ଯାହା ପାଇଁ ଦଳଗୁଡ଼ିକ ୨୪ ଘଣ୍ଟା ଏହି ଅଞ୍ଚଳଗୁଡ଼ିକ ଉପରେ ନଜର ରଖିଥିଲେ। କିଛି ଦଶନ୍ଧି ପୂର୍ବେ, ଗିରରେ ପରିସ୍ଥିତି ବହୁତ ଚ୍ୟାଲେଞ୍ଜିଂ ଥିଲା। କିନ୍ତୁ ସେଠାକାର ଲୋକମାନେ ପରିବର୍ତ୍ତନ ଆଣିବା ପାଇଁ ଏକାଠି ହୋଇଥିଲେ। ସେଠାରେ ସର୍ବଶେଷ ପ୍ରଯୁକ୍ତିବିଦ୍ୟା ଏବଂ ବିଶ୍ୱସ୍ତରୀୟ ସର୍ବୋତ୍ତମ ଅଭ୍ୟାସ ଗ୍ରହଣ କରାଯାଇଥିଲା।

ଡ୍ରୋନ୍ ଦିଦିଙ୍କ ବିଷୟରେ ଆଲୋଚନା କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି, ଆଜି ଏପରି ଅନେକ ମହିଳା ଅଛନ୍ତି ଯେଉଁମାନେ କ୍ଷେତରେ କାମ କରିବା ସହିତ ଆକାଶର ଉଚ୍ଚତାରେ ମଧ୍ୟ କାମ କରୁଛନ୍ତି। ଏବେ ଗାଁର ମହିଳାମାନେ ଡ୍ରୋନ୍ ଦିଦି ହୋଇ ଡ୍ରୋନ୍ ଉଡ଼ାଉଛନ୍ତି ଏବଂ କୃଷି କ୍ଷେତ୍ରରେ ଏକ ନୂତନ ବିପ୍ଳବ ଆଣୁଛନ୍ତି। କିଛି ସମୟ ପୂର୍ବରୁ, ତେଲେଙ୍ଗାନାର ସାଙ୍ଗାରେଡ୍ଡିର ମହିଳାମାନଙ୍କୁ ଅନ୍ୟମାନଙ୍କ ଉପରେ ନିର୍ଭର କରିବାକୁ ପଡୁଥିଲା। ଆଜି ସେହି ମହିଳାମାନେ ଡ୍ରୋନ୍ ସାହାଯ୍ୟରେ ୫୦ ଏକର ଜମିରେ ଔଷଧ ସିଞ୍ଚନ କରୁଛନ୍ତି। ଏବେ ଏହି ମହିଳାମାନେ ଡ୍ରୋନ୍ ଅପରେଟର ଭାବରେ ନୁହେଁ ବରଂ ଆକାଶ ଯୋଦ୍ଧା ଭାବରେ ଜଣାଶୁଣା।

ଅଧିକ ପଢ଼ନ୍ତୁ: ଅପରେସନ ସିନ୍ଦୁର ପରେ ପାକିସ୍ତାନ ଭୟଭୀତ