ନୂଆ ଦିଲ୍ଲୀ: ମୁମ୍ବାଇ ଆତଙ୍କବାଦୀ ଆକ୍ରମଣ ଘଟଣାର ମାଷ୍ଟରମାଇଣ୍ଡ ଏବଂ ଦେଶର ସବୁଠାରୁ ବଡ଼ ଶତ୍ରୁ ଆତଙ୍କବାଦୀ ତହୱୁର ରାଣାକୁ ଆଜି ଭାରତ ଅଣାଯାଇପାରେ। ଏଥି ପାଇଁ ଦିଲ୍ଲୀ ଏବଂ ମୁମ୍ବାଇର ଜେଲଗୁଡ଼ିକୁ ପ୍ରସ୍ତୁତ କରାଯାଉଛି। ଏଠାକାର ଜେଲଗୁଡ଼ିକରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। କୁହାଯାଉଛି ଯେ ରାଣାଙ୍କୁ ଭାରତ ଅଣାଯିବା ପରେ ତୁରନ୍ତ ଜାତୀୟ ତଦନ୍ତ ସଂସ୍ଥା (ଏନ୍ଆଇଏ)କୁ ହସ୍ତାନ୍ତର କରାଯିବ। ଏନ୍ଆଇଏ ତାକୁ କିଛି ସପ୍ତାହ ପାଇଁ ନିଜ ହେପାଜତରେ ରଖି ପଚରାଉଚରା କରିବ। ପାକିସ୍ତାନୀ ବଂଶୋଦ୍ଭବ ତହୱୁର ରାଣା ଲସ୍କର-ଏ-ତୈବାର ସଦସ୍ୟ ଥିଲା। ସେ ୨୬/୧୧ ମୁମ୍ବାଇ ଆକ୍ରମଣରେ ଆମେରିକୀୟ ଆତଙ୍କବାଦୀ ଡେଭିଡ୍ ହେଡଲିକୁ ସାହାଯ୍ୟ କରିଥିଲା।
ତହୱୁର ରାଣାଙ୍କର କାନାଡିୟ ନାଗରିକତା ଅଛି। ସେ ପାକିସ୍ତାନର ଗୁଇନ୍ଦା ସଂସ୍ଥା ଆଇଏସ୍ଆଇ ସହିତ ମିଶି ମୁମ୍ବାଇ ଆକ୍ରମଣ କରିବାକୁ ଷଡ଼ଯନ୍ତ୍ର କରିଥିଲା। ରାଣା ଦାଉଦ ଗିଲାନି ଓରଫ ଡେଭିଡ୍ କୋଲମ୍ୟାନ୍ ହେଡଲିକୁ ଭାରତ ଯାତ୍ରା କରିବାରେ ସାହାଯ୍ୟ କରିଥିଲା।
ମୁମ୍ବାଇ ଆକ୍ରମଣରେ ନିହତ ଆତଙ୍କବାଦୀଙ୍କୁ ମରଣୋତ୍ତର ସର୍ବୋଚ୍ଚ ସାମରିକ ସମ୍ମାନ ଦେବାକୁ ରାଣା ପାକିସ୍ତାନଠାରୁ ଦାବି କରିଥିଲା। ସେ ତାଙ୍କ ପ୍ରତ୍ୟର୍ପଣ ବିରୁଦ୍ଧରେ ଆମେରିକୀୟ ଅଦାଲତରେ ଅନେକ ଥର ଆବେଦନ କରିଥିଲା। କିନ୍ତୁ ସୁପ୍ରିମକୋର୍ଟଙ୍କ ଦ୍ୱାରା ଆବେଦନ ଖାରଜ ହେବା ପରେ, ଭାରତ ଆସିବାର ପଥ ପରିଷ୍କାର ହୋଇଗଲା।
ଫେବୃଆରୀରେ ପ୍ରଧାନମନ୍ତ୍ରୀ ମୋଦୀଙ୍କ ଆମେରିକା ଗସ୍ତ ସମୟରେ ଡୋନାଲ୍ଡ ଟ୍ରମ୍ପ ତହୱୁର ରାଣାର ପ୍ରତ୍ୟର୍ପଣ ଘୋଷଣା କରିଥିଲେ। ଭାରତ ସରକାର ୨୦୧୯ ମସିହାରୁ ଆତଙ୍କବାଦୀ ରାଣାକୁ ପ୍ରତ୍ୟର୍ପଣ କରିବାକୁ ଚେଷ୍ଟା କରୁଥିଲେ। ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ଏବଂ ଗୃହ ମନ୍ତ୍ରଣାଳୟ ତହୱୁର ରାଣାକୁ ଆମେରିକାରୁ ଭାରତ ଆଣିବା ଉପରେ ନଜର ରଖିଛନ୍ତି।
ଆମେରିକା କୋର୍ଟରେ ଉପସ୍ଥାପିତ ଦଲିଲ ଅନୁଯାୟୀ, ରାଣା ଏବଂ ଡେଭିଡ୍ ହେଡଲି ମୁମ୍ବାଇ ଆକ୍ରମଣର ମୁଖ୍ୟ ଷଡଯନ୍ତ୍ରକାରୀ ଥିଲେ। ଉଭୟଙ୍କର ଆଇଏସ୍ଆଇ ଅଧିକାରୀ ମେଜର ଇକବାଲଙ୍କ ସହିତ ଘନିଷ୍ଠ ସମ୍ପର୍କ ଥିଲା। ତଦନ୍ତରୁ ଏହା ମଧ୍ୟ ଜଣାପଡିଛି ଯେ ତହୱୁର ରାଣା ଦୁବାଇରୁ ମୁମ୍ବାଇ ଯାତ୍ରା କରିଥିଲେ। ପୁଲିସ ତଦନ୍ତ ରିପୋର୍ଟରୁ ଜଣାପଡିଛି ଯେ ସେ ନଭେମ୍ବର ୧୧ ରୁ ୨୧, ୨୦୦୮ ପର୍ଯ୍ୟନ୍ତ ପୱାଇର ରେନେସାନ୍ସ ହୋଟେଲରେ ରହିଥିଲେ। ତାଙ୍କ ପ୍ରସ୍ଥାନର ପାଞ୍ଚ ଦିନ ପରେ, ଅର୍ଥାତ୍ ୨୬ ନଭେମ୍ବରରେ, ମୁମ୍ବାଇ ଆତଙ୍କବାଦୀ ଆକ୍ରମଣରେ ଥରି ଉଠିଥିଲା।
ଅଧିକ ପଢ଼ନ୍ତୁ: ୨୧ ଦିନିଆ ପାରୋଲରେ ଆସିଲେ ଗୁରମୀତ ରାମ ରହିମ