ହାଇଦ୍ରାବାଦ/ବିଶାଖାପାଟଣା: ତେଲେଙ୍ଗାନା ଓ ଆନ୍ଧ୍ରପ୍ରଦେଶରେ ଲଗାତାର ଦ୍ବିତୀୟ ଦିନ ପାଇଁ ସୋମବାର ପ୍ରବଳ ବର୍ଷା ହୋଇଥିବା ବେଳେ ସେପ୍ଟେମ୍ବର ୧ ତାରିଖ ରବିବାର ସନ୍ଧ୍ୟା ସୁଦ୍ଧା ବର୍ଷା ଯୋଗୁଁ ଆନ୍ଧ୍ରପ୍ରଦେଶରେ ୧୫ ଜଣ ଓ ତେଲେଙ୍ଗାନାରେ ୯ ଜଣଙ୍କ ମୃତ୍ୟୁ ଘଟିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ଏବଂ ତେଲେଙ୍ଗାନା ମୁଖ୍ୟମନ୍ତ୍ରୀ ଏ ରେବନ୍ତ ରେଡ୍ଡୀଙ୍କ ସହ କଥା ହୋଇଛନ୍ତି। କିଛି ଜିଲ୍ଲାରେ ସ୍କୁଲ-କଲେଜ ଛୁଟି ଘୋଷଣା କରାଯାଇଛି।

ବର୍ଷା ଓ ବନ୍ୟା ମୁକାବିଲା ପାଇଁ ଉଭୟ ରାଜ୍ୟରୁ ସମସ୍ତ ପ୍ରକାର ସହାୟତା ଯୋଗାଇ ଦେବାକୁ କେନ୍ଦ୍ର ସରକାର ପ୍ରତିଶ୍ରୁତି ଦେଇଛନ୍ତି। ବନ୍ୟା ମୁକାବିଲା ଓ ଉଦ୍ଧାର କାର୍ଯ୍ୟ ପାଇଁ ଜାତୀୟ ବିପର୍ଯ୍ୟୟ ମୁକାବିଲା ବାହିନୀ (ଏନଡିଆରଏଫ)ର ୨୬ଟି ଟିମ୍ ନିୟୋଜିତ ହୋଇଛନ୍ତି। ଅଧିକାରୀଙ୍କ ସୂଚନା ଅନୁଯାୟୀ, ଦୁଇ ରାଜ୍ୟରେ ୧୨ଟି ଟିମ୍ ମୁତୟନ ଅଛନ୍ତି। ଏହାବ୍ୟତୀତ ସେଠାରେ ୧୪ଟି ଟିମ୍ ପଠାଯାଇଛି। ଦେଶର ବିଭିନ୍ନ ସ୍ଥାନରୁ ଏହି ଟିମ୍ ସେଠାରେ ପହଞ୍ଚୁଛନ୍ତି। ଏନଡିଆରଏଫ ଅଧିକାରୀଙ୍କ କହିବା ନୁଯାୟୀ, ଦୁଇ ପଡ଼ୋଶୀ ରାଜ୍ୟରେ ନିୟୋଜିତ ଉଦ୍ଧାରକାରୀ ଦଳ ବିଭିନ୍ନ ଉପକରଣରେ ସଜ୍ଜିତ ଅଛନ୍ତି।

ପ୍ରବଳ ବର୍ଷା ଏବଂ ଅନେକ ସ୍ଥାନରେ ଟ୍ରାକ୍‌ରେ ପାଣି ଜମି ରହିବା କାରଣରୁ ୯୯ଟି ଟ୍ରେନ୍ ବାତିଲ ହୋଇଥିବା ବେଳେ ୪ଟି ଆଂଶିକ ବାତିଲ କରାଯାଇଛି ବୋଲି ଦକ୍ଷିଣ କେନ୍ଦ୍ରୀୟ ରେଳବାଇର ଜଣେ ଅଧିକାରୀ କହିଛନ୍ତି। ସେହିପରି ୫୪ଟି ଟ୍ରେନର ରୁଟ୍ ପରିବର୍ତ୍ତନ କରାଯାଇଛି। ଉଭୟ ରାଜ୍ୟର ନଦୀଗୁଡ଼ିକରେ ବନ୍ୟା ପରିସ୍ଥିତି ସୃଷ୍ଟି ହୋଇଛି ଏବଂ ଜାତୀୟ ଓ ରାଜ୍ୟ ବିପର୍ଯ୍ୟୟ ମୁକାବିଲା ବାହିନୀ ବନ୍ୟା ପ୍ରଭାବିତ ଅଞ୍ଚଳରୁ ହଜାର ହଜାର ଲୋକଙ୍କୁ ରିଲିଫ୍ କ୍ୟାମ୍ପକୁ ସ୍ଥାନାନ୍ତର କରିଛନ୍ତି। 

ତେଲେଙ୍ଗାନା ରାଜସ୍ୱ ମନ୍ତ୍ରୀ ପଙ୍ଗୁଲେଟି ଶ୍ରୀନିବାସ ରେଡ୍ଡୀ କହିଛନ୍ତି ଯେ ଠିକ୍ ସମୟରେ ସତର୍କତାମୂଳକ ପଦକ୍ଷେପ ଯୋଗୁଁ ଧନଜୀବନ ହାନି ହ୍ରାସ ପାଇଛି। ଏସବୁ କଟକଣା ସତ୍ତ୍ୱେ ରାଜ୍ୟର ବିଭିନ୍ନ ସ୍ଥାନରେ ବର୍ଷା ଜନିତ ବିଭିନ୍ନ ଘଟଣାରେ ୯ ଜଣଙ୍କ ମୃତ୍ୟୁ ଘଟିଛି। ସେହିପରି ମହବୁବାବାଦ ଓ ଖମ୍ମାମ ଜିଲ୍ଲାରେ ୩ ଜଣ ଭାସି ଯାଇଥିବା ସନ୍ଦେହ କରାଯାଉଛି। ସୂର୍ଯ୍ୟପେଟ, ଭଦ୍ରାଦ୍ରି କୋଠାଗୁଡେମ, ମହାବୁବାବାଦ ଓ ଖମ୍ମାମ ଭଳି ଜିଲ୍ଲାର କର୍ତ୍ତୃପକ୍ଷ ବନ୍ୟା ପ୍ରଭାବିତ ବିଭିନ୍ନ ଗ୍ରାମର ବାସିନ୍ଦାଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିଛନ୍ତି। 

ତେଲେଙ୍ଗାନା ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀ ସେପ୍ଟେମ୍ବର ୨ ତାରିଖ ସୋମବାର ସକାଳ ସାଢ଼େ ୧୦ଟାରେ ହାଇଦ୍ରାବାଦସ୍ଥିତ ଇଣ୍ଟିଗ୍ରେଟେଡ୍ କମାଣ୍ଡ କଣ୍ଟ୍ରୋଲ ସେଣ୍ଟରରେ ଅଧିକାରୀଙ୍କ ସହ ବୈଠକ କରିବେ ଏବଂ ଅଧିକାରୀଙ୍କ ସହ ବର୍ଷା/ବର୍ଷା ସ୍ଥିତି ସମ୍ପର୍କରେ ଆଲୋଚନା କରିବେ। ବନ୍ୟା ପରିସ୍ଥିତିର ସମୀକ୍ଷା କରିବେ।

ହାଇଦ୍ରାବାଦରେ ମଧ୍ୟ ପ୍ରବଳ ବର୍ଷା ହୋଇଛି ଏବଂ ରାତି ସାରା ବର୍ଷା ଯୋଗୁଁ ସହରର ଅନେକ ସ୍ଥାନରେ ଜଳବନ୍ଦୀ ପରିସ୍ଥିତି ସୃଷ୍ଟି ହୋଇଛି। ଅଧିକ ପ୍ରବଳ ବର୍ଷା ଯୋଗୁଁ ସେପ୍ଟେମ୍ବର ୨ ରେ ହାଇଦ୍ରାବାଦ ଜିଲ୍ଲାର ସମସ୍ତ ସ୍କୁଲଛୁଟି ଘୋଷଣା କରାଯାଇଛି।  

ଅଧିକ ପଢ଼ନ୍ତୁ: ଜ୍ଞାନବାପି ମାମଲା: ଆଜି ହେବ ପୁନର୍ବିଚାର ଆବେଦନର ଶୁଣାଣି