ୱାଶିଂଟନ: ମଧ୍ୟପ୍ରାଚ୍ୟରେ ସଂଘର୍ଷ ଶେଷ କରିବା ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନ ସହିତ ଏକ ଚୁକ୍ତି ସ୍ୱାକ୍ଷର କରିଛନ୍ତି। ଆମେରିକା ଏବଂ ଇରାନ ମଧ୍ୟରେ ଯୁଦ୍ଧ ସମାପ୍ତ କରିବା ପାଇଁ ମଧ୍ୟବର୍ତ୍ତୀକାଳୀନ ଚୁକ୍ତିନାମାର ବିବରଣୀ ପ୍ରକାଶ ପାଇଛି। ଏହି ୧୪-ସୂତ୍ରୀ ଚୁକ୍ତିନାମା ଅନୁଯାୟୀ, ଇରାନ ତୁରନ୍ତ ହର୍ମୁଜ ପ୍ରଣାଳୀକୁ ପୁନଃ ଖୋଲିବା ପାଇଁ ପଦକ୍ଷେପ ନେବ। ପ୍ରତିବଦଳରେ ଏହାକୁ କୌଣସି ପ୍ରତିବନ୍ଧକ ବିନା ତେଲ ବିକ୍ରୟ କରିବାକୁ ଅନୁମତି ଦିଆଯିବ ଏବଂ ପରମାଣୁ ଅସ୍ତ୍ର ହାସଲ କରିପାରିବ ନାହିଁ। ଇରାନ ବୈଦେଶିକ ମନ୍ତ୍ରଣାଳୟ ସୂଚିତ କରିଛି ଯେ ଏହି ଚୁକ୍ତିନାମା ଉଭୟ ଦେଶର ରାଷ୍ଟ୍ରପତିଙ୍କ ଦ୍ୱାରା ସ୍ୱାକ୍ଷରିତ ହୋଇପାରିବ। ଏହି ଚୁକ୍ତିନାମାକୁ ଆମେରିକା ଏବଂ ଇରାନ ଇସଲାମିକ ଗଣରାଜ୍ୟ ମଧ୍ୟରେ ଇ-ସ୍ବାକ୍ଷରିତ ହୋଇଛି।

ଆମେରିକା ଏବଂ ଇରାନ ମଧ୍ୟରେ ସୋମବାର ଏହି ଚୁକ୍ତିନାମା ଉପରେ ସହମତ ହୋଇଛି ଏବଂ ଇ-ସ୍ବାକ୍ଷରିତ ହୋଇଛି। ନାମ ଗୋପନ ରଖିବା ସର୍ତ୍ତରେ ଆମେରିକୀୟ ଅଧିକାରୀମାନେ ଡ୍ରାଫ୍ଟ ଚୁକ୍ତିନାମା ବିଷୟରେ ସୂଚନା ପ୍ରଦାନ କରିଛନ୍ତି। ଚୁକ୍ତିନାମାରେ କୁହାଯାଇଛି ଯେ ଯୁଦ୍ଧ ପରବର୍ତ୍ତୀ ପୁନଃନିର୍ମାଣ ପାଇଁ ଇରାନକୁ ଅତି କମରେ ୩୦୦ ବିଲିୟନ ଡଲାର ମିଳିବ। ଇରାନର ପରମାଣୁ କାର୍ଯ୍ୟକ୍ରମ ସମ୍ପର୍କରେ ଏକ ଚୂଡ଼ାନ୍ତ ଚୁକ୍ତିନାମା ପରେ ଆମେରିକା ତେହେରାନ ଉପରେ ଲାଗୁ ହୋଇଥିବା ସମସ୍ତ ଆମେରିକା ଏବଂ ଜାତିସଂଘର କଟକଣା ଉଠାଇବା ପାଇଁ କାର୍ଯ୍ୟ କରିବ।

ଆମେରିକା ଏବଂ ଇସ୍ରାଏଲ ଫେବ୍ରୁଆରୀ ୨୮ ତାରିଖରେ ଇରାନ ବିରୁଦ୍ଧରେ ଯୁଦ୍ଧ ଆରମ୍ଭ କରିଥିଲେ। ତେହେରାନକୁ ପରମାଣୁ ଅସ୍ତ୍ର ହାସଲ କରିବାରୁ ରୋକିବା ପାଇଁ ଏହି ଯୁଦ୍ଧ ଆରମ୍ଭ କରାଯାଇଥିଲା ଏବଂ ଏପ୍ରିଲ ୭ ତାରିଖରେ ଏକ ଯୁଦ୍ଧବିରାମ ହୋଇଥିଲା। ଇରାନକୁ ତୁରନ୍ତ ମୁକ୍ତ ଭାବରେ ତେଲ ବିକ୍ରୟ କରିବାକୁ ଏବଂ ପରବର୍ତ୍ତୀ ସମୟରେ ପ୍ରତିବନ୍ଧକ ଉଠାଇବାକୁ ଆମେରିକାର ପ୍ରସ୍ତାବ ୨୦୧୫ ପରମାଣୁ ଚୁକ୍ତି ଅନୁଯାୟୀ ଇରାନକୁ ଦିଆଯାଇଥିବା ରିହାତି ଅପେକ୍ଷା ଅଧିକ ବୋଲି ବିବେଚନା କରାଯାଏ।

ଟ୍ରମ୍ପ ତାଙ୍କ ପ୍ରଥମ କାର୍ଯ୍ୟକାଳରେ ଏହି ଚୁକ୍ତିରୁ ଆମେରିକାକୁ ପ୍ରତ୍ୟାହାର କରି ଏହାକୁ ସବୁଠାରୁ ଖରାପ ଚୁକ୍ତି ବୋଲି କହିଥିଲେ। ଏହା ବିଶ୍ୱାସ କରାଯାଏ ଯେ ଏହି ନୂତନ ଚୁକ୍ତି ଆମେରିକାରେ କଠୋର ସମାଲୋଚନାର ସମ୍ମୁଖୀନ ହୋଇପାରେ ଏବଂ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ପାଇଁ ମଧ୍ୟ ଏକ ବଡ଼ ଆଘାତ ହୋଇପାରେ, ଯିଏ ଫେବ୍ରୁଆର ୨୮ ତାରିଖରେ ଟ୍ରମ୍ପଙ୍କ ସହିତ ଯୁଦ୍ଧ ଆରମ୍ଭ କରିଥିଲେ।

ଚୁକ୍ତିର ମୁଖ୍ୟ ବିନ୍ଦୁ

• ଏହି ଚୁକ୍ତି ସ୍ୱାକ୍ଷରିତ ହେବା ସହିତ, ଆମେରିକା, ଇରାନ ଏବଂ ସେମାନଙ୍କର ସହଯୋଗୀମାନେ ସମସ୍ତ ମୋର୍ଚ୍ଚାରେ ସାମରିକ କାର୍ଯ୍ୟକଳାପ ବନ୍ଦ କରିବେ 
• ଆମେରିକା ଏବଂ ଇରାନ ପରସ୍ପରର ସାର୍ବଭୌମତ୍ୱ ଏବଂ କ୍ଷେତ୍ରୀୟ ଅଖଣ୍ଡତାକୁ ସମ୍ମାନ କରିବେ ଏବଂ ପରସ୍ପରର ଆଭ୍ୟନ୍ତରୀଣ ବ୍ୟାପାରରେ ହସ୍ତକ୍ଷେପ କରିବେ ନାହିଁ 
• ଉଭୟ ପକ୍ଷ ୬୦ ଦିନର ଆଲୋଚନା ମଧ୍ୟରେ ଏକ ଚୂଡ଼ାନ୍ତ ଚୁକ୍ତିରେ ପହଞ୍ଚିବାକୁ ପ୍ରତିବଦ୍ଧ ହେବେ, ଯାହାକୁ ବଢ଼ାଯାଇପାରେ 
• ଇରାନ ପୁନର୍ବାର କହିଛି ଯେ ଏହା ପରମାଣୁ ଅସ୍ତ୍ର ହାସଲ କିମ୍ବା ବିକାଶ କରିବ ନାହିଁ।
• ଇରାନ ବିରୁଦ୍ଧରେ ଜାତିସଂଘ ଦ୍ୱାରା ଲାଗୁ ହୋଇଥିବା ସମସ୍ତ ପ୍ରତିବନ୍ଧକ ସମେତ ସମସ୍ତ ପ୍ରତିବନ୍ଧକକୁ ଉଠାଇ ନେବାକୁ ଆମେରିକା ପ୍ରତିଶ୍ରୁତି ଦେଇଛି

ଅଧିକ ପଢ଼ନ୍ତୁ: ଏବେ ପରୀକ୍ଷା କରିବାର ସମୟ ଆସିଛି: ତେହେରାନ