ଦୋହା: ପାଖାପାଖି ୧୫ ମାସ ଧରି ଚାଲିଥିବା ଇସ୍ରାଏଲ ଓ ହମାସ ମଧ୍ୟରେ ଚାଲିଥିବା ଯୁଦ୍ଧକୁ ଶେଷ କରିବା ପାଇଁ ପର୍ଯ୍ୟାୟକ୍ରମେ ଚୁକ୍ତି ହୋଇଛି। ଆମେରିକା ରାଷ୍ଟ୍ରପତି ଜୋ ବାଇଡେନ ଏବଂ ନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ଚୁକ୍ତିକୁ ନିଶ୍ଚିତ କରିଛନ୍ତି। ଟ୍ରମ୍ପ କହିଛନ୍ତି ଯେ ସେ ଏହି ଚୁକ୍ତିକୁ ଆବ୍ରାହମ ଚୁକ୍ତିର ସମ୍ପ୍ରସାରଣ ପାଇଁ ବ୍ୟବହାର କରିବେ। ଟ୍ରମ୍ପଙ୍କ ପ୍ରଥମ କାର୍ଯ୍ୟକାଳରେ ଆବ୍ରାହମ ଚୁକ୍ତି ସ୍ଥାପିତ ହୋଇଥିଲା। ଆମେରିକା ସମର୍ଥିତ ଏହି ଚୁକ୍ତି ଇସ୍ରାଏଲ ଏବଂ ଅନେକ ଆରବ ଦେଶ ମଧ୍ୟରେ ସମ୍ପର୍କକୁ ସ୍ୱାଭାବିକ କରିଛି। 

ତେବେ ଏହି ଚୁକ୍ତି ଜାନୁଆରୀ ୧୯ରୁ କାର୍ଯ୍ୟକାରୀ ହେବ ବୋଲି କତାର ପ୍ରଧାନମନ୍ତ୍ରୀ କହିଛନ୍ତି। ଇସ୍ରାଏଲ ଓ ହମାସ ମଧ୍ୟରେ ଅସ୍ତ୍ରବିରତି ରାଜିନାମା ହେବା ମାତ୍ରେ ଗାଜାର ଲୋକମାନେ ରାଜରାସ୍ତାକୁ ଓହ୍ଲାଇ ଉତ୍ସବ ପାଳନ କରିବା ଆରମ୍ଭ କରିଥିଲେ। ଚୁକ୍ତିର ବିବରଣୀ ଏପର୍ଯ୍ୟନ୍ତ ଆନୁଷ୍ଠାନିକ ଭାବେ ଘୋଷଣା କରାଯାଇ ନାହିଁ, କିନ୍ତୁ ଜଣେ ଅଧିକାରୀ କହିଛନ୍ତି ଯେ ପ୍ରାରମ୍ଭିକ ପର୍ଯ୍ୟାୟରେ ୬ ସପ୍ତାହର ପ୍ରାରମ୍ଭିକ ଅସ୍ତ୍ରବିରତି ହେବ, ଯେଉଁଥିରେ ଗାଜା ଉପତ୍ୟକାରୁ ଧୀରେଧୀରେ ଇସ୍ରାଏଲ ସେନା ପ୍ରତ୍ୟାହାର, ହାମାସ ଦ୍ୱାରା ବନ୍ଦୀ ଥିବା ଇସ୍ରାଏଲ ବନ୍ଦୀମାନଙ୍କୁ ମୁକ୍ତ କରିବା ଏବଂ ପାଲେଷ୍ଟାଇନ କଏଦୀମାନଙ୍କୁ ଇସ୍ରାଏଲ ହେପାଜତରୁ ମୁକ୍ତ କରିବା ଅନ୍ତର୍ଭୁକ୍ତ। ଏହି ପର୍ଯ୍ୟାୟରେ ୫୦ ବର୍ଷରୁ ଅଧିକ ବୟସର ସମସ୍ତ ମହିଳା, ଶିଶୁ ଏବଂ ପୁରୁଷଙ୍କୁ ମିଶାଇ ୩୩ ଜଣ ଇସ୍ରାଏଲ ବନ୍ଦୀଙ୍କୁ ମୁକ୍ତ କରାଯିବ। 

ପ୍ରଥମ ପର୍ଯ୍ୟାୟର ୧୬ତମ ଦିନରେ ଦ୍ବିତୀୟ ପର୍ଯ୍ୟାୟ କାର୍ଯ୍ୟକାରୀ କରିବା ପାଇଁ ଆଲୋଚନା ଆରମ୍ଭ ହେବ ଏବଂ ଏଥିରେ ସୈନିକଙ୍କ ସମେତ ଅବଶିଷ୍ଟ ସମସ୍ତ ବନ୍ଧକଙ୍କୁ ମୁକ୍ତ କରିବା, ସ୍ଥାୟୀ ଅସ୍ତ୍ରବିରତି ଏବଂ ଗାଜାରୁ ଇସ୍ରାଏଲ ସେନାକୁ ସମ୍ପୂର୍ଣ୍ଣ ପ୍ରତ୍ୟାହାର କରିବା ଅନ୍ତର୍ଭୁକ୍ତ ହେବାର ସମ୍ଭାବନା ରହିଛି।