ଢାକା: ଦୀର୍ଘ ୩୬ ବର୍ଷ ପରେ ବାଂଲାଦେଶକୁ ମିଳିଛି ପୁରୁଷ ପ୍ରଧାନମନ୍ତ୍ରୀ । ମଙ୍ଗଳବାର ବାଂଲାଦେଶ ନ୍ୟାସନାଲିଷ୍ଟ ପାର୍ଟି ମୁଖ୍ୟ ତାରିକ ରହମାନ ବାଂଲାଦେଶର ନୂତନ ପ୍ରଧାନମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି । ଶପଥ ସମାରୋହରେ ଯୋଗଦେବା ପାଇଁ ବିଭିନ୍ନ ଦେଶର ପ୍ରତିନିଧି ଢାକାରେ ପହଞ୍ଚିଛନ୍ତି । ଭାରତ ପକ୍ଷରୁ ଲୋକସଭା ବାଚସ୍ପତି ଓମ୍ ବିର୍ଲା ସାମିଲ ହୋଇଛନ୍ତି । 

ସଂସଦ ସଂକଳନର ଦକ୍ଷିଣ ପ୍ଲାଜାରେ ଶପଥ ଗ୍ରହଣ ସମାରୋହ ଅନୁଷ୍ଠିତ ହୋଇଥିଲା। ମୁଖ୍ୟ ନିର୍ବାଚନ କମିଶନର ଏଏମଏମ ନାସିର ଉଦ୍ଦିନ ସକାଳ ପ୍ରାୟ ୧୦:୪୨ ରେ ନବନିର୍ବାଚିତ ସାଂସଦମାନଙ୍କୁ ଶପଥ ପାଠ କରାଇଥିଲେ। ସାମ୍ବିଧାନିକ ବ୍ୟବସ୍ଥା ଅନୁଯାୟୀ, ମୁଖ୍ୟ ନିର୍ବାଚନ କମିଶନର ବାଚସ୍ପତି କିମ୍ବା ଉପବାଚସ୍ପତିଙ୍କ ଅନୁପସ୍ଥିତିରେ ଏହି ଦାୟିତ୍ୱ ନିର୍ବାହ କରନ୍ତି । ତାରିକଙ୍କ ସହିତ ମୋଟ ୨୫ ଜଣ ମନ୍ତ୍ରୀ ପଦରେ ଶପଥ ନେଇଛନ୍ତି । ବାଂଲାଦେଶ ୩୬ ବର୍ଷ ପରେ ଜଣେ ପୁରୁଷ ପ୍ରଧାନମନ୍ତ୍ରୀ ପାଇଲା।

ତାରିକ ରହମାନ ୧୭ ବର୍ଷ ନିର୍ବାସନ ପରେ ସ୍ୱଦେଶ ଫେରିଥିଲେ । ଫେବୃଆରୀ ୧୨ ତାରିଖରେ ବାଂଲାଦେଶରେ ଅନୁଷ୍ଠିତ ଜାତୀୟ ନିର୍ବାଚନରେ ତାଙ୍କ ଦଳ ବିଏନପିକୁ ଏକ ବିଶାଳ ବିଜୟ ହାସଲ କରାଇଥିଲେ। ବାଂଲାଦେଶ ନ୍ୟାସନାଲିଷ୍ଟ ପାର୍ଟି ନେତୃତ୍ୱାଧୀନ ମେଣ୍ଟ ୨୯୭ ଆସନ ମଧ୍ୟରୁ ୨୧୧ ଆସନ ଜିତିଥିଲା । ବାଂଲାଦେଶ ଜମାତ-ଏ-ଇସଲାମି ନେତୃତ୍ୱାଧୀନ ୧୧-ଦଳୀୟ ମେଣ୍ଟ ୭୭ ଆସନ ଜିତିଥିଲା। ସ୍ୱାଧୀନ ପ୍ରାର୍ଥୀମାନେ ସାତଟି ଆସନ ଜିତିଥିଲେ । କେବଳ ବିଏନପି ୨୦୯ ଆସନ ଜିତିଥିବାବେଳେ ଜମାତ-ଏ-ଇସଲାମି ୬୮ ଆସନ ଜିତିଥିଲା। ପୂର୍ବତନ ପ୍ରଧାନମନ୍ତ୍ରୀ ଶେଖ ହାସିନାଙ୍କ ଦଳ, ଆୱାମୀ ଲିଗ୍, ନିର୍ବାଚନ ଲଢ଼ିବାକୁ ଅନୁମତି ପାଇନଥିଲା।