ଇରାନ ଏବଂ ଆମେରିକା ମଧ୍ୟରେ ଚାଲିଥିବା ଉଚ୍ଚସ୍ତରୀୟ ଆଲୋଚନା କୌଣସି ନିଷ୍କର୍ଷ ବିନା ଶେଷ ହୋଇଛି। ଏହାର ପ୍ରଭାବ ସୋମବାର (୧୩ ଏପ୍ରିଲ) ବଜାର ଖୋଲିବା ମାତ୍ରେ ଦେଖିବାକୁ ମିଳିପାରେ। ବିଶେଷଜ୍ଞଙ୍କ ଅନୁସାରେ, ପଶ୍ଚିମ ଏସିଆର ଉତ୍ତେଜନା, ଅଶୋଧିତ ତୈଳ ଦର, ମୁଦ୍ରାସ୍ଫୀତି ପରିସଂଖ୍ୟାନ ଏବଂ କମ୍ପାନୀଗୁଡ଼ିକର ଚତୁର୍ଥ ତ୍ରୈମାସିକ ଫଳାଫଳ ଆଗାମୀ ସପ୍ତାହରେ ବଜାରର ଗତିପଥ ସ୍ଥିର କରିବ।

ବଜାର ଉପରେ କାହିଁକି ପଡ଼ିବ ପ୍ରଭାବ?

ଗତ ସପ୍ତାହରେ ସେନସେକ୍ସ ଏବଂ ନିଫ୍ଟିରେ ୫% ରୁ ଅଧିକ ବୃଦ୍ଧି ଦେଖିବାକୁ ମିଳିଥିଲା। କିନ୍ତୁ ଆମେରିକା ଉପରାଷ୍ଟ୍ରପତି ଜେଡି ଭେନ୍ସ ଏବଂ ଇରାନ ପ୍ରତିନିଧିଙ୍କ ମଧ୍ୟରେ କୌଣସି ସ୍ଥାୟୀ ଚୁକ୍ତି ହୋଇପାରି ନାହିଁ। ଆମେରିକା ଅଭିଯୋଗ କରିଛି ଯେ ଇରାନ ନିଜର ପରମାଣୁ କାର୍ଯ୍ୟକ୍ରମରୁ ଓହରିବାକୁ ପ୍ରସ୍ତୁତ ନୁହେଁ। ଏହି ଅନିଶ୍ଚିତତା ଯୋଗୁଁ ନିବେଶକମାନେ ସତର୍କ ହୋଇଯାଇଛନ୍ତି।

ଏହି ୫ଟି କାରଣ ଉପରେ ରହିବ ନଜର:

୧. ଭୂ-ରାଜନୈତିକ ଉତ୍ତେଜନା: ଇରାନ-ଆମେରିକା ବିବାଦ ବଢ଼ିଲେ ବଜାରରେ ବିକ୍ରି ଚାପ (ବଢ଼ିପାରେ। ୨. ତୈଳ ଦର: ହୋର୍ମୁଜ ପ୍ରଣାଳୀରେ ଯଦି କୌଣସି କଟକଣା ଲାଗେ, ତେବେ ଅଶୋଧିତ ତୈଳ ଦର ଆକାଶଛୁଆଁ ହୋଇପାରେ, ଯାହା ଭାରତ ଭଳି ତୈଳ ଆମଦାନୀକାରୀ ଦେଶ ପାଇଁ ଚିନ୍ତାର ବିଷୟ। ୩. ମୁଦ୍ରାସ୍ଫୀତି ଡାଟା: ୧୩ ଏପ୍ରିଲରେ ଉପଭୋକ୍ତା ମୂଲ୍ୟ ସୂଚକାଙ୍କ (CPI) ଏବଂ ୧୪ ଏପ୍ରିଲରେ ପାଇକାରୀ ମୂଲ୍ୟ ସୂଚକାଙ୍କ (WPI) ରିପୋର୍ଟ ପ୍ରକାଶ ପାଇବ। ୪. କମ୍ପାନୀ ରେଜଲ୍ଟ: ୱିପ୍ରୋ, HDFC ବ୍ୟାଙ୍କ ଏବଂ ICICI ବ୍ୟାଙ୍କ ଭଳି ବଡ଼ କମ୍ପାନୀଗୁଡ଼ିକର ଫଳାଫଳ ଉପରେ ନିବେଶକଙ୍କ ନଜର ରହିବ। ୫. ଛୁଟି: ଏହି ସପ୍ତାହଟି ଛୋଟ ରହିବ, କାରଣ ୧୪ ଏପ୍ରିଲ (ମଙ୍ଗଳବାର) ଆମ୍ବେଦକର ଜୟନ୍ତୀ ପାଇଁ ବଜାର ବନ୍ଦ ରହିବ।

ଏକ୍ସପର୍ଟଙ୍କ ମତ:

ରିସର୍ଚ୍ଚ ଏନାଲିଷ୍ଟଙ୍କ ଅନୁସାରେ, ନିଫ୍ଟି-୫୦ ଏବେ ୨୪,୦୦୦ ଅଙ୍କର ଗୁରୁତ୍ୱପୂର୍ଣ୍ଣ ସ୍ତରରେ ଅଛି। ସୋମବାର ବଜାର ହ୍ରାସ ସହ ଖୋଲିବାର ଆଶଙ୍କା ରହିଛି। ବିଶେଷ କରି ବ୍ୟାଙ୍କିଙ୍ଗ ଏବଂ ଆଇଟି ସେକ୍ଟରରେ ଅଧିକ ଅସ୍ଥିରତା ଦେଖାଯାଇପାରେ।