ୱାଶିଂଟନ୍: କାଶ ପଟେଲ୍‌ଙ୍କୁ ଯେକୌଣସି ସମୟରେ ଏଫ୍‌ବିଆଇ ନିର୍ଦ୍ଦେଶକ ପଦରୁ ବରଖାସ୍ତ କରାଯାଇପାରେ। ‘ପଲିଟିକୋ’ର ଏକ ନୂଆ ରିପୋର୍ଟରେ ହ୍ୱାଇଟ୍ ହାଉସ୍‌ର ସୂତ୍ରକୁ ଆଧାର କରି ଏହି ଦାବି କରାଯାଇଛି। ଏହି ରିପୋର୍ଟ ଆମେରିକାର ସଂଘୀୟ ସଂସ୍ଥା ମଧ୍ୟରେ ବଢ଼ୁଥିବା ଆନ୍ତରିକ ଅସନ୍ତୋଷ ଆଡ଼କୁ ଇସାରା କରୁଛି। ପଲିଟିକୋ ନିଜ ରିପୋର୍ଟରେ ଜଣାଇଛି ଯେ, କାଶ ପଟେଲ୍‌ଙ୍କ ପଦବୀକୁ ନେଇ ବିରୋଧ ବଢ଼ୁଛି। ଜଣେ ଅଜ୍ଞାତ ଅଧିକାରୀ ସଙ୍କେତ ଦେଇଛନ୍ତି ଯେ, ତାଙ୍କର କାର୍ଯ୍ୟକାଳ ସୀମିତ ହୋଇପାରେ।

ପଲିଟିକୋର ବର୍ଣ୍ଣସ୍ ସୋସିଆଲ ମିଡିଆ ‘X’ ରେ ଲେଖିଛନ୍ତି, “ହ୍ୱାଇଟ୍ ହାଉସ୍‌ର ଜଣେ ଶୀର୍ଷ ଅଧିକାରୀ ମତେ କହିଛନ୍ତି ଯେ, କାଶ ପଟେଲ୍ ହୁଏତ କ୍ୟାବିନେଟ୍ ସ୍ତରର ପରବର୍ତ୍ତୀ ଅଧିକାରୀ ହେବେ ଯିଏ ପଦ ଛାଡ଼ିବେ। ଏହି ସମ୍ବେଦନଶୀଳ ମାମଲା ଉପରେ ଆଲୋଚନା କରିବା ପାଇଁ ନିଜ ପରିଚୟ ଗୋପନ ରଖିବା ସର୍ତ୍ତରେ ଅଧିକାରୀଜଣକ ମତେ କହିଛନ୍ତି ଯେ, ଏବେ ତ’ ଏହା କେବଳ ସମୟର କଥା।” ସେହି ସୂତ୍ରରୁ ଆହୁରି ଜଣାପଡ଼ିଛି ଯେ, ପ୍ରଶାସନ ମଧ୍ୟରେ ଥିବା ଚିନ୍ତାଗୁଡ଼ିକ ମଧ୍ୟରେ ପଟେଲ୍‌ଙ୍କ ସହ ଜଡ଼ିତ ନକାରାତ୍ମକ ପ୍ରସାରଣ ମଧ୍ୟ ସାମିଲ ଅଛି, ଯାହାକୁ ସେ ଜଣେ ବରିଷ୍ଠ ଅଧିକାରୀଙ୍କ ଭାବମୂର୍ତ୍ତି ପାଇଁ କ୍ଷତିକାରକ ବୋଲି କହିଛନ୍ତି।

କାଶ ପଟେଲ୍‌ଙ୍କୁ ନେଇ ବଢ଼ୁଛି ଅସନ୍ତୋଷ

ବର୍ଣ୍ଣସ୍ ଆଗକୁ ଲେଖିଛନ୍ତି, “ଅଧିକାରୀଙ୍କ ଅନୁଯାୟୀ ଏହାର ଅନେକ କାରଣ ଅଛି, କିନ୍ତୁ ସେଗୁଡ଼ିକ ମଧ୍ୟରେ ସବୁଠାରୁ ଗୁରୁତ୍ୱପୂର୍ଣ୍ଣ ହେଉଛି ପଟେଲ୍‌ଙ୍କ ଉପରେ କେନ୍ଦ୍ରିତ ନକାରାତ୍ମକ ଖବରର ସଂଖ୍ୟା, ଯାହା କୌଣସି କ୍ୟାବିନେଟ୍ ସଚିବଙ୍କ ପାଇଁ ଭଲ କଥା ନୁହେଁ ଏବଂ ଟ୍ରମ୍ପ ଏଭଳି ବିଭ୍ରାଟରେ ଅତିଷ୍ଠ ହୋଇସାରିଛନ୍ତି।” ଯଦିଓ ହ୍ୱାଇଟ୍ ହାଉସ୍ ସାର୍ବଜନୀନ ଭାବେ ଏଭଳି କୌଣସି ରିପୋର୍ଟକୁ ନିଶ୍ଚିତ କରିନାହିଁ। ଏହି ରିପୋର୍ଟ ଏପରି ସମୟରେ ଆସିଛି ଯେତେବେଳେ ପଟେଲ୍ ପୂର୍ବରୁ ହିଁ ଆଇନଗତ ଯାଞ୍ଚ ଏବଂ ଗଣମାଧ୍ୟମ ଟ୍ରାଏଲର ସାମ୍ନା କରୁଛନ୍ତି। ସେ ଏକ ନକାରାତ୍ମକ ଖବର ପରେ ‘ଦି ଆଟଲାଣ୍ଟିକ’  ବିରୋଧରେ ୨୫୦ ମିଲିୟନ ଡଲାରର ମାନହାନି ମକଦ୍ଦମା ଦାୟର କରିଛନ୍ତି।

ସେହି ଲେଖାରେ ଅଭିଯୋଗ କରାଯାଇଥିଲା ଯେ, ପଟେଲ୍ ଅତ୍ୟଧିକ ମଦ୍ୟପାନ କରନ୍ତି ଏବଂ ଦପ୍ତରରେ ନିଜ ସହକର୍ମୀମାନଙ୍କୁ ଅସହଜ ଅନୁଭବ କରାଉଥିଲେ। ସେ ପ୍ରାୟତଃ ଗୁରୁତ୍ୱପୂର୍ଣ୍ଣ ବୈଠକଗୁଡ଼ିକରେ ଅନୁପସ୍ଥିତ ରହୁଛନ୍ତି। ଏକ ଘଟଣା ଅନୁଯାୟୀ, କାଶ ପଟେଲ୍‌ଙ୍କୁ ନିଜର ଏଫ୍‌ବିଆଇ କମ୍ପ୍ୟୁଟର ସିଷ୍ଟମରେ ପ୍ରବେଶ କରିବାରେ ଅସୁବିଧା ହେଲା ଏବଂ ସେ ଭୁଲବଶତଃ ଏହା ଭାବିନେଲେ ଯେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କୁ ଚାକିରିରୁ ବାହାର କରିଦେଇଛନ୍ତି। ‘ଦି ଆଟଲାଣ୍ଟିକ’ ଏହି ଦାବିଗୁଡ଼ିକୁ ଖାରଜ କରି କହିଛି, “ଆମେ କାଶ ପଟେଲ୍‌ଙ୍କ ଉପରେ ନିଜର ରିପୋର୍ଟିଂରେ ଅଟଳ ଅଛୁ ଏବଂ ଆମେ ଏହି ଭିତ୍ତିହୀନ ମକଦ୍ଦମା ବିରୋଧରେ ‘ଦି ଆଟଲାଣ୍ଟିକ’ ଏବଂ ନିଜ ସାମ୍ବାଦିକମାନଙ୍କର ପୁରା ମଜବୁତ ସହିତ ସୁରକ୍ଷା କରିବୁ।”

ହ୍ୱାଇଟ୍ ହାଉସ୍‌ର ପ୍ରତିନିଧିଙ୍କର ରାତ୍ରୀଭୋଜନ ‌ବେଳେ ଗୁଳିମାଡ଼: ଅଭିଯୁକ୍ତ ଆକ୍ରମରକାରୀ ଗିରଫ

କାଶ ପଟେଲ୍‌ଙ୍କ ବିରୋଧରେ ୧୦ ଟି ବଡ଼ ଅଭିଯୋଗ:

1. ‘ଆଟଲାଣ୍ଟିକ’ର ରିପୋର୍ଟରେ ତାଙ୍କ ଉପରେ ମଦ୍ୟପାନ କରିବା ଏବଂ ଏଫ୍‌ବିଆଇର ନିର୍ଦ୍ଧାରିତ ବୈଠକଗୁଡ଼ିକରୁ ଗାୟବ ରହିବା ଅଭିଯୋଗ ଲଗାଯାଇଛି।

2. ନିକଟରେ ଜଣାପଡ଼ିଛି ଯେ, ୨୦୦୫ ରେ ଯେତେବେଳେ ସେ ଛାତ୍ର ଜୀବନରେ ହିଁ ଥିଲେ, ସେତେବେଳେ ତାଙ୍କୁ ସର୍ବସାଧାରଣରେ ପରିସ୍ରା କରିବା ଏବଂ ମଦ୍ୟପାନ କରିବା ପାଇଁ ଗିରଫ କରାଯାଇଥିଲା।

3. ଏପ୍ରିଲ୍ ୨୦୨୬ ରେ ଏକ ଯାନ୍ତ୍ରିକ ତ୍ରୁଟି କାରଣରୁ ତାଙ୍କ କମ୍ପ୍ୟୁଟର ଲକ୍ ହୋଇଗଲା, ଯାହାଦ୍ୱାରା ସେ ଭୟଭୀତ ହୋଇଗଲେ ଏବଂ ତାଙ୍କୁ ଲାଗିଲା ଯେ ତାଙ୍କୁ ଚାକିରିରୁ ବାହାର କରିଦିଆଯାଇଛି। ଏହି ଘଟଣାକୁ ତାଙ୍କର “ଅସୁରକ୍ଷା” ଭାବରେ ଦେଖାଗଲା।

4. ୨୦୧୮ ରେ ଡେଭିନ୍ ନୁନେସଙ୍କ ସହଯୋଗୀ ଭାବରେ ସେ ଏକ ବିବାଦୀୟ ସ୍ମାରକପତ୍ର (Memo) ଲେଖିଥିଲେ। ଯେଉଁଥିରେ ଏଫ‌ବିଆଇ ଉପରେ ଟ୍ରମ୍ପଙ୍କ ଅଭିଯାନର ଜାସୁସି କରିବା ଅଭିଯୋଗ ଲଗାଯାଇଥିଲା। ସମାଲୋଚକମାନେ ଏହାକୁ ପକ୍ଷପାତପୂର୍ଣ୍ଣ ବୋଲି କହିଥିଲେ।

5. ୨୦୧୯ ରେ ଟ୍ରମ୍ପଙ୍କ ପ୍ରଥମ ମହାଭିଯୋଗ  ସମୟରେ ସାକ୍ଷୀମାନେ ସାକ୍ଷ୍ୟ ଦେଇଥିଲେ ଯେ, କାଶ ପଟେଲ୍ ଗୁପ୍ତ ଭାବେ ୟୁକ୍ରେନ ମାମଲାଗୁଡ଼ିକରେ ସାମିଲ ଥିଲେ ଏବଂ ସେ ସାଧାରଣ କୂଟନୈତିକ ଚ୍ୟାନେଲଗୁଡ଼ିକୁ ଏଡ଼ାଇ ଦେଇଥିଲେ।

6. ଟ୍ରମ୍ପ ନିଜ ପ୍ରଥମ କାର୍ଯ୍ୟକାଳର ଶେଷରେ କାଶ ପଟେଲ୍‌ଙ୍କୁ ସିଆଇଏ (CIA) ର ଡେପୁଟି ନିର୍ଦ୍ଦେଶକ ବନାଇବାକୁ ଚେଷ୍ଟା କରିଥିଲେ, କିନ୍ତୁ ତତ୍କାଳୀନ ସିଆଇଏ ନିର୍ଦ୍ଦେଶିକା ଜିନା ହାସପେଲ୍ ଇସ୍ତଫା ଦେବାର ଧମକ ଦେଇ ଏହାକୁ ଅଟକାଇ ଦେଇଥିଲେ।

7. ଟ୍ରମ୍ପଙ୍କ ପ୍ରଥମ କାର୍ଯ୍ୟକାଳ ସମୟରେ ଯେତେବେଳେ କାଶ ପଟେଲ୍ ପ୍ରତିରକ୍ଷା ମନ୍ତ୍ରଣାଳୟ (Pentagon) ରେ ଚିଫ୍ ଅଫ୍ ଷ୍ଟାଫ୍ ଥିଲେ, ସେତେବେଳେ ତାଙ୍କ ଉପରେ ଅଭିଯୋଗ ଲାଗିଲା ଯେ, ସେ ସେହି ଦିନ ନ୍ୟାସନାଲ ଗାର୍ଡ  ମୁତୟନରେ ବିଳମ୍ବ କରିଥିଲେ ଯେଉଁଦିନ ଟ୍ରମ୍ପ ସମର୍ଥକ କ୍ୟାପିଟଲ ହିଲ୍ (Capitol Hill) ଉପରେ ଆକ୍ରମଣ କରିବା ପାଇଁ ଆଗକୁ ବଢ଼ୁଥିଲେ।

8. ଡୋନାଲ୍ଡ ଟ୍ରମ୍ପଙ୍କ ବାସଭବନ ମାର୍-ଏ-ଲାଗୋରେ ଯେତେବେଳେ ଏଫ୍‌ବିଆଇ ଚଢ଼ାଉ କରିଥିଲା, ସେତେବେଳେ ପଟେଲ୍ ଦାବିକରିଥିଲେ ଯେ,ଟ୍ରମ୍ପ ସେହି ଦଲିଲଗୁଡ଼ିକୁ ପୂର୍ବରୁ ହିଁ “ଡିକ୍ଲାସିଫାଏ” (Declassify) କରିଦେଇଥିଲେ, ଯାହାକୁ ନେଇ ଆଇନଗତ ବିଶେଷଜ୍ଞମାନେ ପ୍ରଶ୍ନ ଉଠାଇଥିଲେ।

9. କାଶ ପଟେଲ୍ ଖୋଲାଖୋଲି ଭାବେ କହିଥିଲେ ଯେ, ସେ ଟ୍ରମ୍ପଙ୍କ “ଶତ୍ରୁ” ଏବଂ ସେହି ସାମ୍ବାଦିକମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବେ ଯିଏ ୨୦୨୦ ନିର୍ବାଚନ ପରିଣାମକୁ ଚ୍ୟାଲେଞ୍ଜ କରୁଥିବା ଲୋକଙ୍କର ସମାଲୋଚନା କରିଥିଲେ।

10. ଯେତେବେଳେ ତାଙ୍କୁ ପେଣ୍ଟାଗନର ଚିଫ୍ ଅଫ୍ ଷ୍ଟାଫ୍ (୨୦୨୦-୨୦୨୧) ବନାଯାଇଥିଲା, ସେତେବେଳେ ଅଭିଯୋଗ ଲାଗିଲା ଯେ, ସେ ପେସାଦାର ଅଧିକାରୀମାନଙ୍କୁ ହଟାଇ ଟ୍ରମ୍ପଙ୍କ ବିଶ୍ୱସ୍ତମାନଙ୍କୁ ସେଠାରେ ନିଯୁକ୍ତ କଲେ।

କଲେଜ ସମୟର ଘଟଣାକୁ ନେଇ କାଶ ପଟେଲ୍ ପରେ ସଫେଇ ଦେଇଥିଲେ ଯେ, ଏହି ଘଟଣା ସେତେବେଳେ ଘଟିଥିଲା ଯେତେବେଳେ ତାଙ୍କୁ ଏକ ବାସ୍କେଟବଲ୍ ମ୍ୟାଚ୍‌ରୁ ବାହାର କରିଦିଆଯାଇଥିଲା ଏବଂ ପରେ ପୋଲିସ୍ ତାଙ୍କୁ ଗିରଫ କରିଥିଲା। ପୁରୁଣା ବିବାଦଗୁଡ଼ିକୁ ଛାଡ଼ିଦେଲେ ମଧ୍ୟ, ଏହି ବର୍ଷ ଆରମ୍ଭରେ ମିଲାନରେ ଆମେରିକୀୟ ପୁରୁଷ ଅଲିମ୍ପିକ୍ ହକି ଟିମ୍ ସ୍ୱର୍ଣ୍ଣ ପଦକ ଜିତିବା ପରେ ତାଙ୍କୁ ଟିମ୍ ସହିତ ବିୟର ପିଉଥିବାର ଦେଖାଯାଇଥିଲା। ତେବେ ନିଜର ଏହି କାର୍ଯ୍ୟ ସମର୍ଥନରେ ଯୁକ୍ତି କରି, ସେ ଏହାକୁ “ରାଷ୍ଟ୍ରୀୟ ଗର୍ବର ଅଭିବ୍ୟକ୍ତି କରିବା” ବୋଲି କହିଥିଲେ।