ନୂଆଦିଲ୍ଲୀ:  ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୋମବାର ପୁଣି ଥରେ ଭାରତ ଉପରେ ଶୁଳ୍କ ଲଗାଇବାକୁ ଧମକ ଦେଇଛନ୍ତି। ଟ୍ରମ୍ପ ଭାରତ ଉପରେ ରୁଷରୁ ତେଲ ବହୁ ପରିମାଣରେ କିଣି ବିପୁଳ ଲାଭରେ ବିକ୍ରି କରୁଥିବା ଅଭିଯୋଗ କରିଛନ୍ତି। ସେ କହିଛନ୍ତି ଯେ ଭାରତ କେବଳ ରୁଷରୁ ତେଲ କିଣୁ ନାହିଁ, ବରଂ ଖୋଲା ବଜାରରେ ଏହାକୁ ବିକ୍ରି କରି ବିପୁଳ ଲାଭ ମଧ୍ୟ କରୁଛି।

ଟ୍ରମ୍ପ କହିଛନ୍ତି, "ୟୁକ୍ରେନରେ ରୁଷର ଯୁଦ୍ଧ ମେସିନ ଦ୍ୱାରା କେତେ ଲୋକ ମରୁଛନ୍ତି ଭାରତ ତାହା ଚିନ୍ତା କରେ ନାହିଁ। ସେଥିପାଇଁ ମୁଁ ଭାରତ ଦ୍ୱାରା ଆମେରିକାକୁ ଦିଆଯାଇଥିବା ଶୁଳ୍କକୁ ଯଥେଷ୍ଟ ବୃଦ୍ଧି କରିବାକୁ ଯାଉଛି। ଆମେରିକାର ରାଷ୍ଟ୍ରପତି ଟ୍ରମ୍ପ ଗତ ସପ୍ତାହରେ ଭାରତୀୟ ଆମଦାନୀ ଉପରେ ୨୫% ଶୁଳ୍କ ଏବଂ ରୁଷରୁ ତେଲ କିଣିବା ପାଇଁ ଜରିମାନା ଘୋଷଣା କରିଥିଲେ। ଅଗଷ୍ଟ ୧ ତାରିଖ ପୂର୍ବରୁ ଟ୍ରମ୍ପ ଭାରତ ଉପରେ ଏହି ଶୁଳ୍କ ଲାଗୁ କରିଥିଲେ। 

ଗତ ସପ୍ତାହରେ ଆମେରିକା ଦ୍ୱାରା ଜାରି କରାଯାଇଥିବା ଆଦେଶ ଅନୁଯାୟୀ, ଭାରତଠୁ ୨୫ ପ୍ରତିଶତ ଶୁଳ୍କ ଆଦାୟ କରାଯିବ। ତେବେ ରୁଷରୁ ସାମରିକ ଉପକରଣ ଏବଂ ଶକ୍ତି କ୍ରୟ ପାଇଁ ଘୋଷଣା କରାଯାଇଥିବା ଅତିରିକ୍ତ ଦଣ୍ଡ ଏହି ଆଦେଶରେ ଉଲ୍ଲେଖ ନାହିଁ।

ଟ୍ରମ୍ପଙ୍କ ଶୁଳ୍କ ଉପରେ ପ୍ରତିକ୍ରିୟା ଦେଇ ଭାରତ କହିଛି ଯେ ଜାତୀୟ ସ୍ୱାର୍ଥକୁ ଦୃଷ୍ଟିରେ ରଖି ସମ୍ଭାବ୍ୟ କାର୍ଯ୍ୟାନୁଷ୍ଠାନ ନିଆଯିବ। ଲୋକସଭାରେ କେନ୍ଦ୍ର ମନ୍ତ୍ରୀ ପୀୟୁଷ ଗୋୟଲ କହିଛନ୍ତି ଯେ ୧୦ ରୁ ୧୫ ପ୍ରତିଶତ ଶୁଳ୍କ ସମ୍ପର୍କରେ ଆମେରିକା ସହିତ ଆଲୋଚନା ହୋଇଛି।

ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ ସମ୍ପ୍ରତି କହିଥିଲେ ଯେ ଭାରତ ଯେଉଁ ରୁଷ ତେଲ କିଣୁଛି ତାହା ୟୁକ୍ରେନ ଯୁଦ୍ଧରେ ମସ୍କୋକୁ ସାହାଯ୍ୟ କରୁଛି। ସେ କହିଥିଲେ ଯେ ଟ୍ରମ୍ପ ଭାରତ ଉପରେ ରାଗିବାର କାରଣ ହେଉଛି ତେଲ କିଣିବା ପାଇଁ ଅନେକ ବିକଳ୍ପ ଅଛି, ତେବେ ଭାରତ କାହିଁକି ରୁଷରୁ କିଣୁଛି।