ନୂଆଦିଲ୍ଲୀ: ଯୁଦ୍ଧ ସମୟରେ ଇରାନର ନୂଆ ସୁପ୍ରିମ ଲିଡରର ନାଁ ନିଷ୍ପତ୍ତି ହୋଇଛି। କିନ୍ତୁ ଏବେ ନାଁ ଘୋଷଣା କରାଯାଇ ନାହିଁ। ରବିବାର ଆସେମ୍ବ୍ଲି ଅଫ ଏକ୍ସପର୍ଟ ଇରାନର ନୂଆ ସୁପ୍ରିମ ଲିଡରଙ୍କ ଚୟନ କରିଛନ୍ତି। ଶୀଘ୍ର ନୂଆ ଧାର୍ମିକ ସର୍ବୋଚ୍ଚ ନେତାଙ୍କ ନାଁ ଘୋଷଣା କରାଯିବ। ଦିବଙ୍ଗତ ସୁପ୍ରିମ ଲିଡର ଅଲୀ ଖାମେନିଙ୍କ ଆମେରିକା ଓ ଇସ୍ରାଏଲର ହମଲାରେ ଫେବୃଆରୀ ୨୮ରେ ମୃତ୍ୟୁ ଘଟିଥିଲା। ଏହା ପରେ ମଧ୍ୟପ୍ରାଚ୍ୟ ଦେଶରେ ଯୁଦ୍ଧ ଆରମ୍ଭ ହୋଇଛି। ଦିନ ଗଡ଼ିବା ସହ ଯୁଦ୍ଧ ଭୀଷଣ ହେବାରେ ଲାଗିଛି। ଉପସାଗରୀୟ ଦେଶ ଏହାର କବଳକୁ ଆସିଛନ୍ତି।

ପରିଷଦ ସଦସ୍ୟ ଆୟତୋଲ୍ଲା ମହମ୍ମଦ ମେହଦି ମିରବାଖେରୀ ରବିବାର କହିଛନ୍ତି ଯେ ଅଧିକାଂଶ ସଦସ୍ୟ ନୂତନ ସର୍ବୋଚ୍ଚ ନେତାଙ୍କ ନାମ ଉପରେ ସହମତିରେ ପହଞ୍ଚିଛନ୍ତି। ତଥାପି ଚୂଡ଼ାନ୍ତ ଘୋଷଣା ପୂର୍ବରୁ କିଛି ପ୍ରକ୍ରିୟା ବାକି ରହିଛି। ଇରାନୀ ଗଣମାଧ୍ୟମ ରିପୋର୍ଟ ଅନୁଯାୟୀ, ଏହି ପ୍ରକ୍ରିୟାଗୁଡ଼ିକ ସମାପ୍ତ ହେବା ପରେ ହିଁ ନୂତନ ନେତାଙ୍କ ନାମ ସାର୍ବଜନୀନ କରାଯିବ। ଶନିବାର  ପରିଷଦର ଜଣେ ବରିଷ୍ଠ ଧର୍ମଗୁରୁ କହିଥିଲେ ଯେ ସଦସ୍ୟମାନେ ପରବର୍ତ୍ତୀ ସର୍ବୋଚ୍ଚ ନେତାଙ୍କୁ ବାଛିବା ପାଇଁ ଗୋଟିଏ ଦିନ ମଧ୍ୟରେ ବୈଠକ କରିପାରିବେ।  ଇରାନର ମେହର ନ୍ୟୁଜ ଏଜେନ୍ସି ମୁତାବକ, ଆସେମ୍ବ୍ଲି ଅଫ ଏକ୍ସପର୍ଟ୍ସର ସଦସ୍ୟ ଅହମ୍ମଦ ଅଲମୋଲହୋଦା କହିଛନ୍ତି, ନେତାଙ୍କୁ ଚୟନ କରିବା ପାଇଁ ଭୋଟ୍ ହୋଇ ସାରିଛି ଏବଂ ଶୀଘ୍ର ସର୍ବୋଚ୍ଚ ନେତାଙ୍କ ଚୟନ କରାଯିବ। 

କାହିଁକି ନାମ ଘୋଷଣା କରାଗଲା ନାହିଁ?

ପରିଷଦ ସଦସ୍ୟ ଆୟତୋଲ୍ଲା ମୋହସେନ ହେଦାରି ଆଲେକସିର କହିଛନ୍ତି ଯେ ବର୍ତ୍ତମାନର ପରିସ୍ଥିତିରେ ଏକ ପୂର୍ଣ୍ଣାଙ୍ଗ ବୈଠକ କରିବା ସମ୍ଭବ ନୁହେଁ। ସେ କହିଛନ୍ତି ଯେ ଏହା ଏକ ଅସାଧାରଣ ପରିସ୍ଥିତି ଏବଂ ଏପରି ବୈଠକ ଆୟୋଜନ ଶତ୍ରୁମାନଙ୍କୁ ଆକ୍ରମଣ କରିବାର ସୁଯୋଗ ଦେଇପାରେ, ଯାହା ଇରାନର ବିପ୍ଳବକୁ କ୍ଷତି ପହଞ୍ଚାଇପାରେ। ଉଲ୍ଲେଖନୀୟ ଫେବୃଆରୀ ୨୮ତାରିଖରେ ଆରମ୍ଭ ହୋଇଥିବା ଯୁଦ୍ଧରେ ଅନେକ ଇରାନୀ ଅଧିକାରୀ ଏବଂ ସାମରିକ କମାଣ୍ଡରଙ୍କ ମୃତ୍ୟୁ ହୋଇଛି। ଏହି ଆକ୍ରମଣରେ ଇରାନର ସର୍ବୋଚ୍ଚ ନେତା ଆୟତୋଲ୍ଲା ଅଲି ଖାମେନି ମଧ୍ୟ ପ୍ରାଣ ହରାଇଥିଲେ।

ଏହି ସମୟରେ, ଇସ୍ରାଏଲ କହିଛି ଯେ ଖାମେନିଙ୍କ ପ୍ରତ୍ୟେକ ସମ୍ଭାବ୍ୟ ଉତ୍ତରାଧିକାରୀଙ୍କୁ ଟାର୍ଗେଟ କରାଯିବ। ଇସ୍ରାଏଲୀ ପ୍ରତିରକ୍ଷା ବାହିନୀ (IDF) କହିଛି ଯେ ଉତ୍ତରାଧିକାରୀ ଚୟନ ପ୍ରକ୍ରିୟାରେ ସାମିଲ ଥିବା ଯେକୌଣସି ବ୍ୟକ୍ତିଙ୍କୁ ହତ୍ୟା କରାଯିବ। ଇରାନୀ ଗଣମାଧ୍ୟମ ଅନୁଯାୟୀ, ବିମାନ ଆକ୍ରମଣରେ କ୍ୱାମ୍ ସହରରେ ବିଶେଷଜ୍ଞ ପରିଷଦର ଏକ କୋଠା ମଧ୍ୟ ଧ୍ୱଂସ ପାଇଛି। ପରିଷଦର ଦୁଇ ସଦସ୍ୟ, ଆୟତୋଲ୍ଲା ମୋହସେନ୍ ହେଦାରି ଆଲେକ୍ସିର ଏବଂ ଅହମଦ ଆଲାମୋଲହୋଦା କହିଛନ୍ତି ଯେ ନୂତନ ସର୍ବୋଚ୍ଚ ନେତାଙ୍କୁ ପୂର୍ବରୁ ବାଛି ସାରିଛନ୍ତି। ପରିଷଦର ମୁଖ୍ୟ ସଚିବ, ଆୟତୋଲ୍ଲା ହାସେମ୍ ହୋସେନି ବୁଶେହରି, ଏବେ ଆନୁଷ୍ଠାନିକ ଘୋଷଣା କରିବେ।