ନୂଆଦିଲ୍ଲୀ: ବିଧ୍ୱସ୍ତ ମିଆଁମାରରେ ଶୁକ୍ରବାର ହୋଇଥିବା ୭.୭ ତୀବ୍ରତାର ଭୟଙ୍କର ଭୂମିକମ୍ପରେ ମୃତ୍ୟୁ ସଂଖ୍ୟା ଶନିବାର ୧୬୪୪ରେ ପହଞ୍ଚିଛି। ପ୍ରାକୃତିକ ବିପର୍ଯ୍ୟୟ ଯୋଗୁଁ ଜୀବନଯାତ୍ରା ଗୁରୁତର ଭାବରେ ବ୍ୟାହତ ହୋଇଛି। ଅନ୍ୟପକ୍ଷରେ ଶନିବାର ମିଆଁମାରରେ ପୁଣି ଥରେ ଭୂକମ୍ପ ଝଟକା ଅନୁଭୂତ ହୋଇଥିଲା। ରିକ୍ଟର ସ୍କେଲରେ ସବୁଠାରୁ ଶକ୍ତିଶାଳୀ ଭୂମିକମ୍ପର ତୀବ୍ରତା ୫.୨ ମାପିଯାଇଥିଲା।

ପଡ଼ୋଶୀ ଭାବରେ ଭାରତ ନିଜର କର୍ତ୍ତବ୍ୟ ପାଳନ କରି, ମିଆଁମାରକୁ ଉଦ୍ଧାର ଦଳ ପଠାଇବାରେ ପ୍ରଥମ ଥିଲା ଏବଂ ମାନବୀୟ ସହାୟତା ପ୍ରଦାନ କରି ରିଲିଫ୍ କାର୍ଯ୍ୟରେ ସାହାଯ୍ୟ କରିଛି। ଭାରତ ଭୂମିକମ୍ପ ପ୍ରଭାବିତ ଲୋକଙ୍କୁ ସାହାଯ୍ୟ କରିବା ପାଇଁ 'ଅପରେସନ୍ ବ୍ରହ୍ମା' ଆରମ୍ଭ କରିଛି ଏବଂ ଶନିବାର ୧୫ ଟନ୍ ରିଲିଫ୍ ସାମଗ୍ରୀ ପଠାଇଛି।

ଭୂମିକମ୍ପ ପ୍ରଭାବିତ ଦେଶକୁ ସହାୟତା କରିବା ପାଇଁ ଭାରତୀୟ ବାୟୁସେନାର ବିମାନ ଏବଂ ନୌସେନା ଜାହାଜ ନିୟୋଜିତ କରାଯାଇଛି। କେବଳ ଏତିକି ନୁହେଁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମିଆଁମାରର ବରିଷ୍ଠ ଜେନେରାଲ ମିନ୍ ଅଙ୍ଗ ହ୍ଲାଇଙ୍ଗଙ୍କ ସହ କଥା ହୋଇ କହିଛନ୍ତି ଯେ ଏହି ସଙ୍କଟର ଘଡ଼ିରେ ଭାରତ ମିଆଁମାର ଲୋକଙ୍କ ସହିତ ଠିଆ ହୋଇଛି ଏବଂ ସମସ୍ତ ପ୍ରକାରର ସାହାଯ୍ୟ ଯୋଗାଇ ଦେବ। 

ଭୂମିକମ୍ପରେ କ୍ଷତିଗ୍ରସ୍ତ ଅନେକ କୋଠାର ଭଗ୍ନାବଶେଷରୁ ଅଧିକ ମୃତଦେହ ଉଦ୍ଧାର କରାଯାଉଛି, ଯାହା ଫଳରେ ମୃତ୍ୟୁ ସଂଖ୍ୟା ଆହୁରି ବୃଦ୍ଧି ପାଇବାର ଆଶଙ୍କା କରାଯାଉଛି। ଶକ୍ତିଶାଳୀ ଭୂମିକମ୍ପ ଯୋଗୁଁ ବହୁ ସଂଖ୍ୟକ କୋଠା ଧ୍ୱଂସ ପାଇଛି। ରାସ୍ତାଗୁଡ଼ିକ କ୍ଷତିଗ୍ରସ୍ତ ହୋଇଛି। ପୋଲଗୁଡ଼ିକ ଭୁଶୁଡ଼ି ପଡ଼ିଛି ଏବଂ ଏକ ବନ୍ଧ ମଧ୍ୟ ଭାଙ୍ଗି ଯାଇଛି। ସାମରିକ ସରକାର ପ୍ରାକୃତିକ ବିପର୍ଯ୍ୟୟ ଯୋଗୁଁ ହୋଇଥିବା କ୍ଷୟକ୍ଷତିର ଚିତ୍ର ପ୍ରକାଶ କରିଛି। ରାଷ୍ଟ୍ରପତି ଭବନ ମଧ୍ୟ ବହୁତ କ୍ଷତିଗ୍ରସ୍ତ ହୋଇଛି।

ଅଧିକ ପଢ଼ନ୍ତୁ: ଏସ୍‌ଏସ୍‌ପି ସମେତ ୪ପୁଲିସ ଅଧିକାରୀ ଦୋଷୀ ସାବ୍ୟସ୍ତ