ନୂଆଦିଲ୍ଲୀ: ଆମେରିକା ୟେହୁଦୀଙ୍କ ଏକ ସମର୍ଥକ ଗୋଷ୍ଠୀ ରୁଷଠୁ ତେଲ କିଣିବା ନେଇ ଭାରତର ସମାଲୋଚନା କରୁଥିବା ଆମେରିକାର ଅଧିକାରୀଙ୍କୁ ଟାର୍ଗେଟ୍ କରିଛନ୍ତି । ସେମାନେ କହିଛନ୍ତି ୟୁକ୍ରେନ ସଙ୍କଟ ପାଇଁ ଭାରତ ଦାୟୀ ନୁହେଁ । ଏହି ସଂଗଠନ ଆମେରିକା-ଭାରତ ସମ୍ବନ୍ଧକୁ ଉନ୍ନତ କରିବାକୁ ଆହ୍ୱାନ କରିଛନ୍ତି । ଟ୍ରମ୍ପ ପ୍ରଶାସନର ଅଧିକାରୀ ରୁଷଠୁ ତେଲ କିଣିବା ନେଇ ଭାରତ ସମାଲୋଚନା କରି ଚାଲିଛନ୍ତି । ସେମାନଙ୍କ କହିବା କଥା ତେଲରୁ ଅର୍ଜିତ ଅର୍ଥରେ ରୁଷର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ୟୁକ୍ରେନ ବିରୋଧରେ ଯୁଦ୍ଧ ଜାରି ରଖିବାରେ ସହାୟକ ହେଉଛି ।

ଆମେରିଜାର ଜ୍ୟୁଇସ କମିଟି(ଏଜେସି) ଶୁକ୍ରବାର ଏହି ପ୍ରସଙ୍ଗରେ ଟିପ୍ପଣୀ କରିଛି । ଏହା ପୂର୍ବରୁ ହ୍ୱାଇ ହାଉସର ବାଣିଜ୍ୟିକ ପରାମର୍ଶଦାତା ପିଟର ନବାରୋ ରୁଷ-ୟୁକ୍ରେନ ସଙ୍କଟକୁ ମୋଦୀଙ୍କ ଯୁଦ୍ଧ ବୋଲି କହିଛନ୍ତି । ସେ କହିଛନ୍ତି ଶାନ୍ତିର ମାର୍ଗ  ଆଶିଂକ ଭାବେ ନୂଆଦିଲ୍ଲୀ ଦେଇ ଆସୁଛି । ତେବେ ଏଜେସି କହିଛି ଯେ, ଆମେରିକା ଅଧିକାରୀଙ୍କ ପକ୍ଷରୁ ଭାରତ ଉପରେ ଯେଉଁଭଳି ବିଷୋଦଗାର କରାଯାଉଛି ତାହା ବାସ୍ତବରେ ଚିନ୍ତାଜନକ । ଟ୍ରମ୍ପଙ୍କ ଅଧିକାରୀଙ୍କ ଉପରୋକ୍ତ ଟିପ୍ପଣୀ ଅପମାନଜନକ ବୋଲି ଏଜେସି ସଂଗଠନ କହିଛି । 

ଏଜେସି ନିଜର ପୋଷ୍ଟରେ କହିଛି ଯେ, ତେଲ ପାଇଁ ଭାରତର ରୁଷ ଉପରେ ନିର୍ଭରତା ନେଇ ଆମେ ଦୁଃଖିତ । ମାତ୍ର ଭାରତ ପୁଟିନଙ୍କ ଯୁଦ୍ଧ ଅପରାଧ ପାଇଁ ଦାୟୀ ନୁହେଁ ।ଏହା ଏକ ସହଯୋଗୀ ଗଣତାନ୍ତ୍ରିକ ଦେଶ ଏବଂ ଆମେରିକାର ଏକ ମହତ୍ୱପୂର୍ଣ୍ଣ ରଣନୈତିକ ଭାଗିଦାରୀ ଦେଶ । ମହାଶକ୍ତିଙ୍କ ମଧ୍ୟରେ ପ୍ରତିଯୋଗିତାରେ ଭାରତର ମହତ୍ୱପୂର୍ଣ୍ଣ ଭୂମିକା ରହିଛି । ଏହି ମହତ୍ୱପୂର୍ଣ୍ଣ ସମ୍ବନ୍ଧକୁ ପୁନଃସ୍ଥାପିତ କରିବାର ସମୟ । ଆମେରିକାକୁ ଭାରତ ସହ ଉତ୍ତମ ସମ୍ବନ୍ଧ ବଜାୟ ରଖିବା ଉଚିତ୍ ।