ନୂଆଦିଲ୍ଲୀ: ରୁଷର  ରାଷ୍ଟ୍ରପତି ଭ୍ଲାଦିମିର ପୁଟିନ ରବିବାର ସାଂଘାଇ ସହଯୋଗ ସଂଗଠନ(ଏସସିଓ) ଶିଖର ସମ୍ମିଳନୀରେ ଯୋଗ ଦେବା ପାଇଁ ଚୀନର ତିଆନଜିନ ସହରରେ ପହଞ୍ଚିଛନ୍ତି । ସେ କହିଛନ୍ତି ରୁଷ ଓ ଚୀନ ବ୍ରିକ୍ସ ଦେଶର ସାମାଜିକ-ଆର୍ଥିକ ବିକାଶରେ ବାଧା ଦେଉଥିବା ପକ୍ଷପାତ କଟକଣା ବିରୋଧରେ ଏକଜୁଟ ହେବାର ଆବଶ୍ୟକତା ରହିଛି । ଏମିତି କହି ପୁଟିନ ଚୀନ ମାଟିରୁ ଆମେରିକାର ଟ୍ରମ୍ପ ସରକାରଙ୍କୁ ସନ୍ଦେଶ ଦେଇଛନ୍ତି । 

ପୁଟିନ କହିଛନ୍ତି, ବ୍ରିକ୍ସକୁ ଆହୁରି ସଶକ୍ତ କରାଯିବାର ଆବଶ୍ୟକତା ରହିଛି । ରୁଷ ଓ ଚୀନକୁ ଅତିରିକ୍ତ ସମ୍ବଳ ଯୋଗାଡ ପ୍ରତି ଧ୍ୟାନ ଦେବାକୁ ପଡିବ । ମସ୍କୋ ଓ ବେଜିଂ ବ୍ରିକ୍ସର ସଦସ୍ୟ ଦେଶକୁ ଆମେରିକା ସହ ମୁକାବିଲା କରିବା ପାଇଁ ଏକାଠି ଛିଡା ହେବାକୁ ପଡିବ । ଟ୍ରମ୍ପ ସରକାରଙ୍କ ମନମୁଖି ଟାରିଫର ଜବାବ ଦେବାକୁ ପଡିବ । ଏହା ବାଦ ଅନ୍ତର୍ଜାତୀୟ ମୁଦ୍ରାକୋଷ ଓ ବିଶ୍ୱ ବ୍ୟାଙ୍କର ସୁଧାର କରିବା ଦରକାର ବୋଲି ପୁଟିନ କହିଛନ୍ତି ।

ପୁଟିନ ଏହି ଟିପ୍ପଣୀ ଏମିତି ସମୟରେ ଦେଇଛନ୍ତି, ଯେତେବେଳେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବ୍ରିକ୍ସ ଦେଶ ଉପରେ ୧୦ ପ୍ରତିଶତ ଟାରିଫ ଲଗାଇବାକୁ ଧମକ ଦେଇଛନ୍ତି । ବ୍ରିକ୍ସରେ ବ୍ରାଜିଲ, ରୁଷ, ଭାରତ, ଚୀନ ଓ ଦକ୍ଷିଣ ଆଫ୍ରିକା ସାମିଲ । ସାଉଦି ଆରବ, ଇରାନ, ଇଥିଓପିଆ, ଇଜିପ୍ଟ, ଆର୍ଜେଣ୍ଟିନା ଓ ୟୁଏଇ ଏହାର ନୂତନ ସଦସ୍ୟ ଅଛନ୍ତି । 

ପୁଟିନ ଆଶା କରିଛନ୍ତି ଯେ, ତିଆନଜିନରେ ହେବାକୁ ଥିବା ଏସସିଓ ଶିଖର ସମ୍ମିଳନୀ ୧୦ ସଦସ୍ୟ ବିଶିଷ୍ଟ ଏହି ସଂଗଠନକୁ ଗତି ଦେବ । ଉଲ୍ଲେଖନୀୟ ଏସସିଓ  ଶିଖର ସମ୍ମିଳନୀ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ପୁଟିନଙ୍କ ମଧ୍ୟରେ ସାକ୍ଷାତ ହେବ । ଏହା ବାଦ୍ ପୁଟିନ ରାଷ୍ଟ୍ରପତି ସି ଜିନପିଙ୍ଗଙ୍କ ସହ ମଧ୍ୟ ଆଲୋଚନା କରିବେ ।