ମୁମ୍ବାଇ: ବକ୍ସ ଅଫିସରେ ଧମାଲ୍ କରୁଛି ଫିଲ୍ମ 'ରାମାୟଣ'। ରିଲିଜ୍ ହେବା ପରଠାରୁ ଫିଲ୍ମଟି ଲଗାତାର ଭଲ ବ୍ୟବସାୟ କରୁଥିବା ବେଳେ ଏବେ ଆଉ ଏକ ବଡ଼ ରେକର୍ଡ ନିଜ ନାଁରେ କରିଛି। ପ୍ରଥମ ସୋମବାରର କଲେକ୍ସନରେ ଏହା 'ଧୁରନ୍ଧର-୨' ଓ 'ବାହୁବଳୀ-୨' ଭଳି ସୁପରହିଟ୍ ଫିଲ୍ମକୁ ପଛରେ ପକାଇ ଦେଇଛି।
ରିଲିଜ୍ର ପଞ୍ଚମ ଦିନ ଅର୍ଥାତ୍ ପ୍ରଥମ ସୋମବାରରେ 'ରାମାୟଣ' ୮୩.୭୫ କୋଟି ଟଙ୍କାର ବ୍ୟବସାୟ କରିଛି। ଏହି ଆୟ ସହ ଫିଲ୍ମଟି ପ୍ରଥମ ସୋମବାରରେ ସର୍ବାଧିକ କଲେକ୍ସନ କରିଥିବା ଫିଲ୍ମ ତାଲିକାରେ ଏକ ନମ୍ବର ସ୍ଥାନ ହାସଲ କରିଛି।
ଏହା ପୂର୍ବରୁ ଏହି ରେକର୍ଡ 'ବାହୁବଳୀ-୨' ନାଁରେ ଥିଲା। ଏହି ଫିଲ୍ମ ପ୍ରଥମ ସୋମବାରରେ ୮୦ କୋଟି ଟଙ୍କା ଆୟ କରିଥିଲା। ସେହିପରି 'ପୁଷ୍ପା-୨' ୬୬ କୋଟି ଏବଂ 'ଧୁରନ୍ଧର-୨' ୬୪ କୋଟି ଟଙ୍କାର ବ୍ୟବସାୟ କରିଥିଲା। ମାତ୍ର ୮୩.୭୫ କୋଟି ଟଙ୍କାର ଆୟ ସହ 'ରାମାୟଣ' ସମସ୍ତଙ୍କୁ ପଛରେ ପକାଇ ଦେଇଛି।
ପ୍ରଥମ ସୋମବାରରେ ସର୍ବାଧିକ ଆୟ କରିଥିବା ଟପ୍-୧୦ ଫିଲ୍ମ ତାଲିକାରେ ପ୍ରଥମ ସ୍ଥାନରେ 'ରାମାୟଣ' ରହିଛି। ଏହା ପଛକୁ 'ବାହୁବଳୀ-୨' ୮୦ କୋଟି, 'ପୁଷ୍ପା-୨' ୬୬ କୋଟି ଏବଂ 'ଧୁରନ୍ଧର-୨' ୬୪ କୋଟି ଟଙ୍କା ସହ ଯଥାକ୍ରମେ ଦ୍ୱିତୀୟ, ତୃତୀୟ ଓ ଚତୁର୍ଥ ସ୍ଥାନରେ ରହିଛନ୍ତି।
ଏହି ତାଲିକାର ପଞ୍ଚମ ସ୍ଥାନରେ ୫୯.୨୫ କୋଟି ଟଙ୍କା ସହ 'ଟାଇଗର-୩' ଥିବା ବେଳେ ଷଷ୍ଠ ସ୍ଥାନରେ ୫୯ କୋଟି ଟଙ୍କା ସହ 'ବର୍ଡର-୨' ରହିଛି। ସେହିପରି 'ଆନିମଲ୍' ୪୦.୦୬ କୋଟି, 'ଗଦର-୨' ୩୮.୭୦ କୋଟି, 'ସ୍ତ୍ରୀ-୨' ୩୮.୧୦ କୋଟି ଏବଂ 'ଟାଇଗର ଜିନ୍ଦା ହୈ' ୩୬.୫୪ କୋଟି ଟଙ୍କାର ଆୟ ସହ ଶ୍ରେଷ୍ଠ ୧୦ଟି ଫିଲ୍ମ ମଧ୍ୟରେ ସ୍ଥାନ ପାଇଛନ୍ତି।
ଅନ୍ୟପକ୍ଷରେ, 'ରାମାୟଣ'ର ଏହି ରେକର୍ଡଧାରୀ କଲେକ୍ସନ ଯୋଗୁଁ 'ହାଉସଫୁଲ୍-୪' ଟପ୍-୧୦ ତାଲିକାରୁ ବାଦ୍ ପଡ଼ିଛି। ପୂର୍ବରୁ ଏହି ଫିଲ୍ମ ୩୪.୫୬ କୋଟି ଟଙ୍କାର ବ୍ୟବସାୟ ସହ ଦଶମ ସ୍ଥାନରେ ଥିଲା। ଏବେ 'ରାମାୟଣ' ନୂଆ ରେକର୍ଡ କରିବା ପରେ ବକ୍ସ ଅଫିସରେ ଏହାର ପରବର୍ତ୍ତୀ ପ୍ରଦର୍ଶନକୁ ନେଇ ଦର୍ଶକଙ୍କ ଉତ୍ସାହ ବଢ଼ିଛି।