ହାଇଦ୍ରାବାଦ: ୨୦୨୪ର ବହୁ ପ୍ରତୀକ୍ଷିତ ଫିଲ୍ମ ‘ପୁଷ୍ପା ୨: ଦ ରୁଲ‘ ସିନେମାଘରେ ରିଲିଜ ହେବାକୁ ଆଉ କିଛି ଘଣ୍ଟା ବାକି ରହିଛି । ଫିଲ୍ମକୁ ନେଇ କ୍ରେଜ ଏମିତି ରହିଛି ଯେ, ଆଡାଭାନ୍ସ ବୁକିଂରେ ପୁଷ୍ପା ୨ ଧମାଲ କରିଛି । ଫିଲ୍ମର ଆଡଭାନ୍ସ ବୁକିଂ ରାମଚରଣ ଓ ଜୁନିୟର ଏନଟିଆରଙ୍କ ଆରଆରଆର ସହିତ ଅନେକ ଫିଲ୍ମକୁ ପଛରେ ପକାଇ ଦେଇଛି । ଫିଲ୍ମକୁ ନେଇ ଦର୍ଶକଙ୍କ ମଧ୍ୟରେ ନାହିଁ ନ ଥିବା ଉତ୍ସାହ ଦେଖିବାକୁ ମିଳିଛି ।

ସୁକୁମାରଙ୍କ ନିର୍ଦ୍ଦେଶିତ ଓ ଅଲ୍ଲୁ ଅର୍ଜୁନଙ୍କ ଅଭିନୀତ ‘ପୁଷ୍ପା ୨: ଦ ରୁଲ‘ ବକ୍ସ ଅଫିସରେ ଇତିହାସ ରଚିବାକୁ ପ୍ରସ୍ତୁତ । ଫିଲ୍ମ ଆଡଭାନ୍ସ ବୁକିଂରେ ଏମିତି ରୌଦ୍ର ରୂପ ଧାରଣ କରିଛି ଯେ, ପ୍ରତି ଘଣ୍ଟାରେ ହଜାର  ହଜାର ଟିକେଟ୍ ବିକ୍ରି ହୋଇ ଯାଉଛି । 

ସାକନିଲକର ରିପୋର୍ଟ ଅନୁଯାୟୀ, ପ୍ରଥମ ଦିନ ପାଇଁ ‘ପୁଷ୍ପା ୨: ଦ ରୁଲ‘ର ଏ ପର୍ଯ୍ୟନ୍ତ ୨୧ ଲକ୍ଷରୁ ଅଧିକ ଟିକେଟ୍ ପ୍ରି ବୁକିଂ ହୋଇ ସାରିଛି । ଏଥିସହ ଓପନିଂ ଡେ ପାଁ ଆଡଭାନ୍ସ ବୁକିଂରେ ପୁଷ୍ପା ୨ ବୁଧବାର ସକାଳ ପର୍ଯ୍ୟନ୍ତ ୬୩.୧୬ କୋଟି ଟଙ୍କାର କାରବାର କରି ସାରିଲାଣି । ପୁଣି ବ୍ଲକ କରାଯାଇଥିବା ସିଟ ସହିତ ଫିଲ୍ମର ଆଡଭାନ୍ସ ବୁକିଂରେ ମୋଟ୍ ଆୟ ୭୭.୧୬ କୋଟି ଟଙ୍କା ପହଞ୍ଚିଛି । 

ନିଜର ଆଡଭାନ୍ସ ବୁକିଂ ସହିତ ପୁଷ୍ପା ୨ ଏସଏସ ରାଜାମୌଲୀଙ୍କ ଆରଆରଆରକୁ ପଛରେ ପକାଇଛି । ଆରଆରଆର ଓପନିଂ ଡେ ପାଇଁ ଆଡଭାନ୍ସ ବୁକିଂରେ ୫୮.୭୩ କୋଟି ଟଙ୍କାର ବ୍ୟବସାୟ କରିଥିଲା । ଏହି ଫିଲ୍ମ ଆଡଭାନ୍ସ ବୁକିଂରେ ବୁଧବାର ବାହୁବଳୀ ୨ର ୯୦ କୋଟି ଟଙ୍କା ଓ କେଜିଏଫ ୨ର ୮୦ କୋଟି ଟଙ୍କାର କଲେକ୍ସନକୁ ପଛରେ ପକାଇ ଦେବ । 

ଆଡଭାନ୍ସ ବୁକିଂକୁ ଦେଖି ଟ୍ରେଡ ଆନାଲିଷ୍ଟଙ୍କ ହିସାବରେ ‘ପୁଷ୍ପା ୨: ଦ ରୁଲ‘ ପ୍ରଥମ ଦିନରେ ୨୦୦ କୋଟିରୁ ଅଧିକ ବକ୍ସଅଫିସ କଲେକ୍ସନ କରିବ । ଫିଲ୍ମ ଡିସେମ୍ବର ୫ ତାରିଖରେ ରିଲିଜ ହେଉଛି । ଫିଲ୍ମରେ ଅଲ୍ଲୁ ଅର୍ଜୁନଙ୍କ ବ୍ୟତୀତ ରଶ୍ମିକା ମନ୍ଦାନା ଓ ଫହାଦ ଫାସିଲ ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିବେ ।