ମୁମ୍ବାଇ: ଭାରତୀୟ କ୍ରିକେଟ୍ ଟିମ୍ର ଷ୍ଟାର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଗୁରୁବାର (ଜୁଲାଇ ୧୮)ରେ ଏକ ବଡ଼ ଘୋଷଣା କରିଛନ୍ତି। ଭାବୁକ ହୋଇ ସେ ସାମାଜିକ ଗଣମାଧ୍ୟମ ‘ଇନ୍ଷ୍ଟାଗ୍ରାମ’ ପୋଷ୍ଟ ମାଧ୍ୟମରେ କହିଛନ୍ତି, ପତ୍ନୀ ନତାଶା ଷ୍ଟାନକୋଭିଚ୍ଙ୍କ ଠାରୁ ଅଲଗା ହୋଇଛନ୍ତି। ଅର୍ଥାତ ଉଭୟଙ୍କର ମଧ୍ୟରେ ବିବାହ ବିଚ୍ଛେଦ ହୋଇଛି। ଦୀର୍ଘ ୪ ବର୍ଷ ଏକାଠି ରହିଲା ପରେ ଆମେ ସହମତିରେ ଅଲଗା-ଅଲଗା ରହିବାକୁ ନିଷ୍ପତ୍ତି ନେଇଛୁ।
ସୂଚନାଯୋଗ୍ୟ, ଭାରତୀୟ କ୍ରିକେଟ୍ ଟିମ୍ର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଓ ନତାଶାଙ୍କ ୨୦୨୦ରେ କୋଭିଡ-୧୯ ସମୟରେ ବିବାହ ହୋଇଥିଲା। ୨୦୨୦ ଜୁଲାଇ ୩୦ରେ ଉଭୟ ମାତା-ପିତା ହେବାର ସୌଭାଗ୍ୟ ଅର୍ଜନ କରିଥିଲେ। ଉଭୟଙ୍କୁ ଏକ ପୁତ୍ର ସନ୍ତାନ ମିଳିଛି। ହାର୍ଦ୍ଦିକ ଓ ନତାଶା ୨୦୨୩ ଫେବ୍ରୁଆରିରେ ହିନ୍ଦୁ ଓ ଖ୍ରୀଷ୍ଟିଆନ ରୀତିନୀତି ଅନୁସାରେ ବିବାହ କରିଥିଲେ।
କିନ୍ତୁ ଏହାର ପାଖପାଖି ୧୭ ମାସ ଭିତରେ କାହିଁକି ଏମତି ହେଲା ଯେ ହାର୍ଦ୍ଦିକ ଓ ନତାଶାଙ୍କୁ ଅଲଗା ରହିବାକୁ ପଡ଼ିଛି। ଏବେ ପ୍ରଶ୍ନ ଉଠୁଛି, ପୁଅ ଅଗସ୍ତ କାହା ପାଖରେ ରହିବେ? ଏହାର ଉତ୍ତର ମଧ୍ୟ ପାଣ୍ଡ୍ୟା ନିଜର ପୋଷ୍ଟରେ ସାଂକେତିକ ମାଧ୍ୟମରେ ଦେଇଛନ୍ତି। ପାଣ୍ଡ୍ୟା କହିଛନ୍ତି, ସେ ଓ ନତାଶା ମିଳିତ ଭାବେ ଅଭିଭାବକ ଦାୟିତ୍ବ ତୁଲାଇବେ। ଆମ ଭିତରେ ସ୍ବାମୀ-ସ୍ତ୍ରୀ ସଂପର୍କ ବଞ୍ଚାଇବା ପାଇଁ ଉଦ୍ୟମ କରିଥିଲୁ। କିନ୍ତୁ ଏହା ହୋଇ ନପାରିବାରୁ ଶେଷରେ ଅଲଗା-ଅଲଗା ରହିବାକୁ ନିଷ୍ପତ୍ତି ନେଲୁ।
ଉଲ୍ଲେଖଯୋଗ୍ୟ, ନତାଶା ନିକଟରେ ନିଜ ଘର ସର୍ବିଆକୁ ଫେରିଯାଇଛନ୍ତି। ସେ ଘରେ ପହଞ୍ଚିଲା ପରେ ପାଣ୍ଡ୍ୟା ଏହି ପୋଷ୍ଟ ସେୟାର କରିଛନ୍ତି। ନତାଶଙ୍କ ସହିତ ତାଙ୍କର ପୁଅ ଅଗସ୍ତ୍ୟ ମଧ୍ୟ ଏବେ ସର୍ବିଆରେ। ଛୋଟ ପିଲା ହୋଇଥିବାର ମା’ଙ୍କ ପାଖରେ ରହିବା ସ୍ବାଭାବିକ। ମାତ୍ର ଅଗସ୍ତ୍ୟ ବଡ଼ ହେଲା ପରେ କେଉଁଠି ରହିବେ, ତାହା ସମୟ କହିବ। ନତାଶା ୧୯୯୨ ମାର୍ଚ୍ଚ ୪ ତାରିଖରେ ସର୍ବିଆର ଜୋଜରେଭାକରେ ଜନ୍ମଗ୍ରହଣ କରିଥିଲେ। ସେ ୨୦୧୨ରେ ବଲିଉଡରେ କାମ କରିବାକୁ ଭାରତ ଆସିଥିଲେ। ଏହାରି ମଧ୍ୟରେ ହାର୍ଦ୍ଦିକ ପାଣ୍ଡିଆଙ୍କ ସଂସ୍ପର୍ଶରେ ଆସିଥିଲେ।