ଅନୁଗୁଳ: ଅନୁଗୁଳ ଜିଲ୍ଲା କିଶୋରନଗର ଥାନା ଭାଙ୍ଗମୁଣ୍ଡାରେ ଗ୍ରାମରେ ଭାଇ ଭଉଣୀଙ୍କୁ ଗୁଳି ଘଟଣାରେ ଅଭିଯୁକ୍ତ ଗିରଫ ହୋଇଛି । ଅଭିଯୁକ୍ତ ଜଣକ ହେଲା ଉକ୍ତ ଗ୍ରାମର ପ୍ରଶାନ୍ତ ମିର୍ଦ୍ଧା । ତାକୁ ସମ୍ବଲପୁର ଜିଲ୍ଲା ନାଉକଟିଦେଉଳ ଅଞ୍ଚଳରୁ ଗିରଫ କରିଛି ପୋଲିସ । ପୂର୍ବ ଶତ୍ରୁତାକୁ କେନ୍ଦ୍ର କରି ଏହି ଗୁଳି କାଣ୍ଡ ହୋଇଥିବା ଜଣାପଡ଼ିଛି । ପିଲା ନୁହେଁ ବରଂ ତାଙ୍କ ବାପା ଟାର୍ଗେଟରେ ଥିଲେ ବୋଲି ପୋଲିସ କହିଛି । 

ସୂଚନା ଅନୁସାରେ, ଭାଙ୍ଗମୁଣ୍ଡା ଗାଁର ପ୍ରଫୁଲ୍ଲ ମିର୍ଦ୍ଧା ଓ ପ୍ରଶାନ୍ତ ମିର୍ଦ୍ଧାଙ୍କ ମଧ୍ୟରେ କିଛି ବର୍ଷ ହେବ ଝଗଡ଼ା ଲାଗି ରହିଥିଲା । ଏହି ଝଗଡ଼ା ଧିରେ ଧିରେ ଉଗ୍ର ରୂପ ନେଇଥିଲା । ପ୍ରଫୁଲ୍ଲଙ୍କୁ ସାରା ଦିନ ପାଇଁ ଦୁନିଆରୁ ହଟାଇ ଦେବାକୁ ପ୍ରଶାନ୍ତ ଯୋଜନା କରିଥିଲା । ଶନିବାର ବିଳମ୍ବିତ ରାତିରେ ପ୍ରଶାନ୍ତ ଯୋଜନାକୁ ସଫଳ କରିବାକୁ ଚିନ୍ତା କରିଥିଲା । ସେଥିପାଇଁ ସେ ପ୍ରଫୁଲ୍ଲଙ୍କ ଘର ନିକଟକୁ ଆସି ଶୋଇଥିବା ଅବସ୍ଥାରେ ତାଙ୍କ ଉପରକୁ ଗୁଳି କରିଥିଲା । ମାତ୍ର ସୌଭାଗ୍ୟ ବଶତଃ ପ୍ରଫୁଲ୍ଲ ବଞ୍ଚିଯାଇଥିଲେ । କିନ୍ତୁ ତାଙ୍କ ପୁଅ ଝିଅଙ୍କ ଦେହରେ ଗୁଳି ବାଜିଥିଲା । କାରଣ ସେ କାଳ ରାତିରେ ବିଛଣାରେ ପ୍ରଫୁଲ୍ଲ ନୁହେଁ ବରଂ ତାଙ୍କ ପିଲା ଶୋଇଥିଲେ । ଫଳରେ ସେମାନେ ଗୁରୁତର ହୋଇପଡ଼ିଥିଲେ । 

ପ୍ରଫୁଲ୍ଲଙ୍କ ଅଭିଯୋଗ ପରେ ପୋଲିସ ଛାନଭିନ ଆରମ୍ଭ କରିଥିଲା । ଶେଷରେ ସମ୍ବଲପୁର ନାକଟି ଦେଉଳ ଜଙ୍ଗଲରୁ ତାକୁ ଗିରଫ କରାଯାଇଛି । ସେ ପୂର୍ବରୁ ମଧ୍ୟ ହତ୍ୟା ଉଦ୍ୟମ କରିଥିଲା କିନ୍ତୁ ସେଥିରେ ବିଫଳ ହୋଇଥିଲା ବୋଲି ଜଣାପଡ଼ିଛି ।