ଛପରା:  ରସୁଲପୁର ଥାନା ଅଧୀନ ଧନାଡିହ ଗାଁରେ ଛାତ ଉପରେ ଶୋଇଥିବା ପତି-ପତ୍ନୀ ଓ ସେମାନଙ୍କର ୨ ଝିଅଙ୍କ ଉପରେ ମଙ୍ଗଳବାର ବିଳମ୍ବିତ ରାତିରେ ଧାରୁଆ ଅସ୍ତ୍ରରେ ଆକ୍ରମଣ ହୋଇଛି। ଏହି ଆକ୍ରମଣରେ ପିତା ଓ ତାଙ୍କର ୨ ଝିଅଙ୍କର ମୃତ୍ୟୁ ହୋଇଛି। ମହିଳା ଜଣକ ଜୀବନ ବଞ୍ଚାଇବାରେ ସଫଳ ହୋଇଛନ୍ତି। କିନ୍ତୁ ସେ ମଧ୍ୟ ଆକ୍ରମଣର ଶିକାର ହୋଇ ଗୁରୁତର ଅଛନ୍ତି।  

ଘଟଣା ସଂପର୍କରେ ସୂଚନା ମିଳିବା ପରେ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି। ଧନାଡିହ ନିବାସୀ ତାରକେଶ୍ବର ସିଂହ ନିଜ ପତ୍ନୀ ଓ ଦୁଇ ଝିଅଙ୍କ ସହିତ ଘରଛାତ ଉପରେ ଶୋଇଥିଲେ। ମଙ୍ଗଳବାର ବିଳମ୍ବିତ ରାତିରେ ଦୁର୍ବୃତ୍ତମାନେ ଛାତ ଉପରକୁ ଚଢ଼ିଥିଲେ। ଧାରୁଆ ଅସ୍ତ୍ରରେ ୪ଜଣଙ୍କୁ ଆକ୍ରମଣ କରିଥିଲେ। ଏହି ଆକ୍ରମଣରେ ତାରକେଶ୍ବର ଓ ୨ଝିଅଙ୍କର ମୃତ୍ୟୁ ହୋଇଥିବା ବେଳେ ତାଙ୍କ ପତ୍ନୀ ଶୋଭା ଦେବୀ କୌଣସି ପ୍ରକାରରେ ଜୀବନ ବଞ୍ଚାଇବା ପାଇଁ ଖସି ଯାଇଥିଲେ। ମାତ୍ର ପରେ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଛି। ତାଙ୍କୁ ଛପରା ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଛି। ପୁଲିସ ଗୁରୁତର ମହିଳାଙ୍କୁ ପଚରାଉଚରା କରୁଛି। 

ଆକ୍ରମଣ ଓ ହତ୍ୟା ଖବର ନେଇ ସୂଚନା ମିଳିବା ପରେ ପୁଲିସ ଘଟଣାସ୍ଥଳରେ ପହଞ୍ଚିଛି। ପ୍ରେମ ପସଙ୍ଗକୁ ନେଇ ଏହି ହତ୍ୟାକାଣ୍ଡ ଘଟିଥିବା ପୁଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ଅନ୍ୟପଟରେ ଏହି ଘଟଣାକୁ ନେଇ ଗାଁରେ ଶୋକର ଛାୟା ଖେଳି ଯାଇଛି। 

ରସୁଲପୁର ଥାନା ଅଧିକାରୀ ପ୍ରଭାତ କୁମାର କହିଛନ୍ତି, ଅଭିଯୁକ୍ତମାନଙ୍କୁ ଗିରଫ ପାଇଁ ଚଢ଼ାଉ ଜାରି ରହିଛି। ଏସ୍‌ପି ଡ. କୁମାର ଆଶୀଷ କହିଛନ୍ତି ଏହି ଘଟଣା ସଂପର୍କରେ ଜଣାପଡ଼ିବା ପରେ ପୁଲିସ ତୁରନ୍ତ ଚଢ଼ାଉ ଜାରି ରଖିଥିଲା ଏବଂ ଦୁଇ ଜଣଙ୍କୁ ଗିରଫ କରିଛି। ଉଭୟ ସେହିଗାଁର ରୋହିତ ଓ ଅଙ୍କିତ। ପ୍ରେମ ସଂପର୍କକୁ ନେଇ ଏହି ହତ୍ୟାକାଣ୍ଡ ହୋଇଛି ବୋଲି ପୁଲିସ ଅଧିକାରୀ ଗଣମାଧ୍ୟମକୁ କହିଛନ୍ତି।