ପୁରୀ : ପୁଣି ଥରେ ପୁରୀ ଜିଲ୍ଲାରେ ଚାଞ୍ଚଲ୍ୟ ସୃଷ୍ଟି କରିଛି ଯୁବକଙ୍କ ହତ୍ୟା ଘଟଣା। ବଳିଆପଣ୍ଡା ଥାନା ଅଞ୍ଚଳ ବେଳାଭୂମିରୁ ମୃତଦେହ ଅଞ୍ଚଳବାସୀ ଠାବ କରିଥିଲେ । ବର୍ତମାନ ସୁଦ୍ଧା ମୃତକଙ୍କ ପରିଚୟ ଚିହ୍ନଟ କରାଯାଇଛି । ମୃତକ ଜଣଙ୍କ ହେଲେ ବାଲେଶ୍ୱର ଜିଲ୍ଲା ସୋର ଅଂଚଳର ପ୍ରହଲ୍ଲାଦ ଦାସ । ଦୁର୍ବୁତ୍ତ ଅତି ନିର୍ମମ ଭାବେ ପ୍ରହଲ୍ଲାଦଙ୍କ ମୁଣ୍ଡ, ବାମ ଆଖି ଓ କାନକୁ ଧାରୁଆ ଅସ୍ତ୍ରରେ ହାଣି  ହତ୍ୟା କରିଛନ୍ତି । ସୂଚନା କ୍ରମେ ବଳିଆପଣ୍ଡା ଥାନା ପୋଲିସ, ସଦର ଅତିରିକ୍ତ ଏସପିଙ୍କ ସହ ସଦର ଏସଡିପିଓ,ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।

ହସ୍ତାନ୍ତର ହୋଇଥିବା ସୂଚନା ଅନୁଯାୟୀ ମଙ୍ଗଳବାର ରାତିରେ ହିଁ ଦୁର୍ବୁତ୍ତ ଏହି ହତ୍ୟାକାଣ୍ଡ କରିଛନ୍ତି । ବୁଧବାର ସକାଳୁ ସ୍ଥାନୀୟ ବାସିନ୍ଦାଙ୍କ ଖବର ପରେ ପୋଲିସ ଶବକୁ ଜବତ କରି ତଦନ୍ତ ଆରମ୍ଭ କରିଛି ଓ ସଦର ମୁଖ୍ୟ ଚିକିତ୍ସାଳୟକୁ ବ୍ୟବଚ୍ଛେଦ ପାଇଁ ପଠାଯାଇଛି । ମୃତକଙ୍କ ମୁହଁରେ ଗଭୀର ଆଘାତ ଓ କ୍ଷତରୁ ପ୍ରବଳ ରକ୍ତସ୍ରାବ ହୋଇଛି । ମୃତକଙ୍କ ନିକଟରୁ କିଛି ଏଟିଏମ କାର୍ଡ ଓ ସିମ୍ କାର୍ଡ ମିଳିଛି । ହତ୍ୟାକାଣ୍ଡର କାରଣ ବର୍ତମାନ ଯାଏଁ ଅସ୍ପଷ୍ଟ ରହିଛି ।

ଆଗକୁ ପଢ଼ନ୍ତୁ :ମହିଳାଙ୍କୁ ଦୁଷ୍କର୍ମ କରିବା ଅଭିଯୋଗରେ ଜେଲ ଗଲେ ଏସସିବି ଡାକ୍ତର