ମଧ୍ୟପ୍ରଦେଶରେ ଚିନି ଦରରେ ବିପୁଳ ବୃଦ୍ଧି ଦେଖିବାକୁ ମିଳୁଛି। ବିଗତ ମାତ୍ର ୧୮ ଦିନ ମଧ୍ୟରେ ଚିନି ଦର କିଲୋପ୍ରତି ପ୍ରାୟ ୧୮ ଟଙ୍କା ପର୍ଯ୍ୟନ୍ତ ବଢ଼ିଯାଇଛି। ଭୋପାଳର ପାଇକାରୀ ବଜାରରେ ଚିନି ଦର ଏବେ କିଲୋପ୍ରତି ୬୧ ଟଙ୍କାରେ ପହଞ୍ଚିଛି। ବ୍ୟବସାୟୀଙ୍କ ଦାବି ଅନୁଯାୟୀ, ଚିନି ଦରରେ ଏପରି ଦ୍ରୁତ ବୃଦ୍ଧି ପୂର୍ବରୁ କେବେହେଲେ ଦେଖିବାକୁ ମିଳିନଥିଲା।

ବ୍ୟବସାୟୀଙ୍କ କହିବା ଅନୁଯାୟୀ, ଚିନି ଦର ବୃଦ୍ଧିର ଗୋଟିଏ ବଡ଼ କାରଣ ହେଉଛି ଷ୍ଟକ୍  କୁ ନେଇ ସରକାରଙ୍କ ନୀତି। ସେମାନଙ୍କ କହିବା କଥା, ଚିନିର ଷ୍ଟକ୍ ସୀମା ଯଥେଷ୍ଟ ବଢ଼ାଇ ରଖାଯାଇଛି। ବ୍ୟବସାୟୀମାନେ ମନେକରନ୍ତି ଯେ, ଯଦି ଷ୍ଟକ୍ ସୀମା କମ୍ କରାଯାଏ, ତେବେ ବଜାରରେ ଚିନିର ଉପଲବ୍ଧତା ବୃଦ୍ଧି ପାଇବ ଏବଂ ଦର ନିୟନ୍ତ୍ରଣକୁ ଆସିପାରିବ।

ଏଥାନୋଲ୍ ଉତ୍ପାଦନ ଯୋଗୁଁ ମଧ୍ୟ ମହଙ୍ଗା ହେଲା ଚିନି

ଅନ୍ୟ ଏକ ବଡ଼ କାରଣ ହେଉଛି ଆଖୁର ବ୍ୟବହାର ଏଥାନୋଲ୍ ଉତ୍ପାଦନରେ ବୃଦ୍ଧି ପାଇବା। ଆଖୁର ଏକ ବଡ଼ ଭାଗ ଚିନି ତିଆରି ବଦଳରେ ଏଥାନୋଲ୍ ଉତ୍ପାଦନରେ ବ୍ୟବହୃତ ହେଉଥିବାରୁ ଚିନି ଉତ୍ପାଦନ ପ୍ରଭାବିତ ହୋଇଛି। ବଜାରରେ ଚାହିଦା ତୁଳନାରେ ଯୋଗାଣ କମ୍ ଥିବାରୁ ଏହାର ସିଧାସଳଖ ପ୍ରଭାବ ଦର ଉପରେ ଦେଖିବାକୁ ମିଳୁଛି।

ଆହୁରି ବଢ଼ିବ କି ଚିନି ଦାମ୍?

ଆଗାମୀ ଦିନରେ ପର୍ବପର୍ବାଣି ଋତୁ ଆରମ୍ଭ ହେବାକୁ ଯାଉଛି। ଏପରି ସ୍ଥିତିରେ ଚିନିର ବୃଦ୍ଧି ପାଉଥିବା ଦରର ପ୍ରଭାବ ମିଠା ଏବଂ ଅନ୍ୟାନ୍ୟ ଖାଦ୍ୟ ସାମଗ୍ରୀ ଉପରେ ପଡ଼ିପାରେ। ବ୍ୟବସାୟୀମାନେ କହିଛନ୍ତି ଯେ, ଯଦି ଦର ବୃଦ୍ଧିର ଏହି ଧାରା ଜାରି ରହେ, ତେବେ ଆଗାମୀ ଦିନରେ ଚିନି ଆହୁରି ମହଙ୍ଗା ହୋଇପାରେ। ଅର୍ଥାତ୍ ଏଥର ପର୍ବପର୍ବାଣିରେ ମିଠା କିଣିବା ସାଧାରଣ ଲୋକଙ୍କ ପକେଟ୍ ଉପରେ ଭାରି ପଡ଼ିପାରେ।