ବଲାଙ୍ଗୀର: ନାବାଳିକାଙ୍କୁ ପ୍ରେମ କରିବା ଜଣେ ରେଳ କର୍ମଚାରୀଙ୍କ ପାଇଁ ମହଙ୍ଗା ସାବ୍ୟସ୍ତ ହୋଇଛି । ନାବାଳିକାକୁ ପ୍ରେମ କରି ଅପହରଣ କରିବା ଅଭିଯୋଗରେ ବଲାଙ୍ଗିର ଜିଲ୍ଲା ମୁରିବାହାଲ ଥାନା ପୁଲିସ ଜଣେ ରେଳ କର୍ମଚାରୀଙ୍କୁ ଗିରଫ କରିଛି । ଗିରଫ ରେଳ କର୍ମଚାରୀ ଜଣକ ହେଲେ ଲୋଇସିଂହା ମୁରଶୁଣ୍ଡ ଗ୍ରାମର ଘନଶ୍ୟାମ ଭୋଇ । ସେ କେସିଙ୍ଗା ରେଳ ଷ୍ଟେସନରେ ଗ୍ୟାଙ୍ଗ୍ ମ୍ୟାନ୍ ଭାବେ କାର୍ଯ୍ୟ କରନ୍ତି ବୋଲି ଜଣାପଡ଼ିଛି । 

ମିଳିଥିବା ପ୍ରାଥମିକ ସୂଚନା ମୁତାବକ, ଘନଶ୍ୟାମ ମୁରିବାହାଲ ଅଞ୍ଚଳରେ କଲେଜରେ ପଢ଼ୁଥିବା ଜଣେ ନାବାଳିକାଙ୍କୁ ପ୍ରେମ କରନ୍ତି । ଗତ ୯ ତାରିଖରେ ନାବାଳିକା ଜଣକ ନିଖୋଜ ହୋଇଯାଇଥିଲେ । ନାବାଳିକା ପରିବାର ଲୋକ ଘନଶ୍ୟାମଙ୍କ ଉପରେ ଆରୋପ ଲଗାଇଥିଲେ ଯେ ସେ ତାଙ୍କ ଝିଅଙ୍କୁ ଅପହରଣ କରି ନେଇଛନ୍ତି । ଏ ନେଇ ମୁରିବାହାଲ ଥାନାରେ ପରିବାର ଲୋକ ଅଭିଯୋଗ କରିଥିଲେ । ପୁଲିସ ଘଟଣାର ତଦନ୍ତ କରି ନାବାଳିକାଙ୍କୁ କେସିଙ୍ଗା ରେଳ ବିଭାଗର ଏକ ଘରୁ ଉଦ୍ଧାର କରିଥିଲା । ପୁଲିସ ଘନଶ୍ୟାମକୁ ଗିରଫ କରି କୋର୍ଟ ଚାଲାଣ କରିଛି ।