ସାଙ୍ଗଙ୍କ ସହ ମେଳା ବୁଲି ଯାଇଥିଲେ ଜଣେ ନାବାଳିକା ଓ ଜଣେ ଯୁବତୀ । ମାତ୍ର ମେଳା ବୁଲି ଫେରିବା ବେଳେ ବାଟରେ ସାଙ୍ଗ ବନିଗଲେ ସଇତାନ । ଯିଏ ସୁରକ୍ଷା ଦେବା କଥା ସିଏ ହିଁ ଲୁଟି ନେଲେ ଇଜ୍ଜତ । ଏପରିକି ଏକୁଟିଆ ପାଇ ଗଣବଳାତ୍କାର କରିବାକୁ ପଛାଇଲେ ନାହିଁ। ଏପରି ଏକ ଅମାନବୀୟ କାଣ୍ଡ ଘଟିଛି ଝାଡଖଣ୍ଡ ରାଜଧାନୀ ରାଞ୍ଚିଠାରେ | ଏହି ଘଟଣାରେ ପୁଲିସ୍‌ ୩ ଜଣଙ୍କୁ ବାନ୍ଧିଛି।

  ଏହି ଘଟଣା ଗତ ସୋମବାର ରାତିରେ ଘଟିଛି ବୋଲି ଜଣାଯାଇଛି। ରାଞ୍ଚି ପୁଲିସ୍‌ ସୂଚନା ଅନୁଯାୟୀ, ଗତ ସୋମବାର ରାତିରେ ଜଣେ ନାବାଳିକା ଓ ଜଣେ ଯୁବତୀ ନିଜର ୩ ପୁରୁଷ ସାଙ୍ଗଙ୍କ ସହ ମେଳା ବୁଲି ଯାଇଥିଲେ। ସେଠାରୁ ହସଖୁସିରେ ଫେରିବା ବେଳେ ସେମାନଙ୍କ ସାଙ୍ଗମାନେ ସେମାନଙ୍କୁ ଧମକାଇ ଗଣବଳାତ୍କାର କରିଥିଲେ। ଘଟଣା ସମ୍ପର୍କରେ ପୀଡ଼ିତାଦ୍ୱୟ ଥାନାରେ ଅଭିଯୋଗ କରିବା ପରେ ପୁଲିସ୍‌ ମାମଲା ରୁଜୁ କରି ସେମାନଙ୍କ ଡାକ୍ତରୀ ମାଇନା କରାଇଥିଲା। ଏହାପରେ ଘଟଣାର ତଦନ୍ତ ଆରମ୍ଭ କରି ପୁଲିସ୍‌ ୩ ଅଭିଯୁକ୍ତଙ୍କୁ ଗିରଫ କରିଛି। ଏହି ଘଟଣାରେ ଝାଡଖଣ୍ଡର ହେମନ୍ତ ସୋରେନ ସରକାରଙ୍କୁ ଟାର୍ଗେଟ କରିଛି ରାଜ୍ୟ ବିଜେପି। ହେମନ୍ତ ସୋରେନଙ୍କ ଶାସନ କାଳରେ କୌଣସି ନାବାଳିକା ଓ ଯୁବତୀ ସୁରକ୍ଷିତ ନୁହନ୍ତି ବୋଲି ସେ ଅଭିଯୋଗ କରିଛନ୍ତି। ଏଥିସହ କହିଛନ୍ତି ରାଜ୍ୟରେ ଗତ ସାଢେ ୩ ବର୍ଷ ମଧ୍ୟରେ ୫,୫୦୦ ବଳାତ୍କାର ମାମଲା ଘଟି ସାରିଲାଣି। ହେଲେ ପୁଲିସ୍‌ ଶୋଇ ରହିଛି।