ପୁରୀ: ମାଜିଷ୍ଟ୍ରେଟଙ୍କ ଉପସ୍ଥିତିରେ ସୋମବାର ଖୋଲିବ ଭିତର ରତ୍ନଭଣ୍ଡାର । ରତ୍ନଭଣ୍ଡାର ଗଣତି ମଣତି ନେଇ ଆୟୋଜିତ ବୈଠକରେ ଏହି ନିଷ୍ପତ୍ତି ନିଆଯାଇଛି । କେମିତି ଗଣତି ହେବ ଏବଂ କେବେ ସରିବ ଏସବୁର ବୈଠକରେ ବିସ୍ତୃତ ଭାବେ ଆଲୋଚନା ହୋଇଛି । ରବିବାର ଏହାର ସୂଚନା ଦେଇଛନ୍ତି ପୁରୀ ଜିଲ୍ଲାପାଳ  ଦିବ୍ୟଜ୍ୟୋତି ପରିଡା । 

ସେ କହିଛନ୍ତି କଡା ସୁରକ୍ଷା ଭିତରେ ଗଣତି ମଣତି କରାଯିବ । ଏହା ପୂର୍ବରୁ ଏପ୍ରିଲ ୮ରୁ ୧୧ ତାରିଖ ପର୍ଯ୍ୟନ୍ତ ବାହାର ରତ୍ନଭଣ୍ଡାରର ଗଣତି ମଣତି କାର୍ଯ୍ୟ ଚାଲିଥିଲା । ଶନିବାର ଶେଷ  ହୋଇଥିବା ଗଣତି ମଣତିରେ ୧୯୭୮ ମସିହା ତାଲିକା ଅନୁସାରେ ସମସ୍ତ ଅଳଙ୍କାର ମେଳ କରାଯାଇଥିଲା ତେବେ ୧୯୭୮ ତାଲିକା ଅନୁଯାୟୀ ଅଧିକ ଅଳଙ୍କାର ରହିଛି । ଏହା ପରେ ସୋମବାର ଅର୍ଥାତ ଆସନ୍ତାକାଲିଠୁ ଭିତର ରତ୍ନଭଣ୍ଡାରର ଗଣତି ମଣତି ଆରମ୍ଭ  ହେବ । 

ପ୍ରଥମ ପର୍ଯ୍ୟାୟ ଗଣତିରେ ସାତ ଘଣ୍ଟା ଧରି ଗଣତି ମଣତି ଚାଲିଥିଲା । ଏହା ଦିନ ୧୧ଟା ୩୫ରୁ ଆରମ୍ଭ ହୋଇ ସନ୍ଧ୍ୟା  ୬ଟା ୩୫ରେ ଶେଷ ହୋଇଥିଲା ।  ଏବେ ଭିତର ରତ୍ନଭଣ୍ଡାର ଗଣତିମଣତି କାର୍ଯ୍ୟ ହେବ । ରବିବାର ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀଙ୍କ ଅଧ୍ୟକ୍ଷତାରେ ପ୍ରସ୍ତୁତି ବୈଠକ ବସିଥିଲା । ବୈଠକରେ ଜିଲ୍ଲାପାଳ, ଏସପି, ସୁପରଭାଇଜିଙ୍ଗ ଟିମ ସହିତ ଭର୍ଚୁଆଲରେ ଯୋଗ ଦେଇଥିଲେ ଜଷ୍ଟିସ ବିଶ୍ୱନାଥ ରଥ । 

ବୈଠକ ପରେ ପୁରୀ ଜିଲ୍ଲାପାଳ କହିଛନ୍ତି ଯେ, ମହାପ୍ରଭୁଙ୍କ କୃପାରୁ ସବୁ କାମ ସୁରୁଖୁରୁରେ ହେବ । ଠାକୁରଙ୍କ ନୀତି କାନ୍ତି ଓ ଶ୍ରଦ୍ଧାଳୁଙ୍କ ଦର୍ଶନକୁ ବିଶେଷ ଗୁରୁତ୍ୱ ଦିଆଯିବ। ଟ୍ରେଜେରୀରୁ ଚାବି ଆସିବା ପରେ ଖୋଲିବ ଭିତର ରତ୍ନଭଣ୍ଡାର। ମାଜିଷ୍ଟ୍ରେଟଙ୍କ ଉପସ୍ଥିତିରେ ରତ୍ନଭଣ୍ଡାର ଖୋଲାଯାଇ ଗଣତି ମଣତି କରାଯିବ। ଏସଓପି ଅନୁଯାୟୀ ସମସ୍ତ କାର୍ଯ୍ୟ କରାଯିବ।