ଯାଜପୁର : କଲେଜ ଛାତ୍ରୀଙ୍କୁ ବିଚ୍‌ ରାସ୍ତାରେ ମାଡ଼ । ଗାଡିରୁ ଓହ୍ଲେଇ ଛାତ୍ରୀଙ୍କୁ ଅଟକାଇ ଚାପୁଡ଼ା ମାରିଲେ ଯୁବକ । ଯାଜପୁର ଜିଲ୍ଲା ବରୀ ଅଞ୍ଚଳରେ ଘଟିଛି ଏଭଳି ଅମାନବୀୟ ଘଟଣା। ଯାହାର ଭିଜୁଆଲ ଏବେ ସୋସିଆଲ ମିଡିଆରେ ଭାଇରାଲ ହୋଇଛି । ଯାଜପୁର ଜିଲ୍ଲା ଗୋପବନ୍ଧୁ ଚୌଧୁରୀ ମହାବିଦ୍ୟାଳୟର ଜଣେ ଛାତ୍ରୀ ନିଜର ସହପାଠୀଙ୍କ ସହ କଲେଜକୁ ଯାଉଥିବା ବେଳେ ଯୁବକ ଜଣଙ୍କ ଅଟକାଇ କଥାବାର୍ତ୍ତା ହେବା ସହ ଅଚାନକ ଭାବେ ଛାତ୍ରୀଙ୍କୁ ଚାପୁଡ଼ା ପରେ ଚାପୁଡ଼ା ମାରି ଚାଲିଥିଲେ। ହୁଏତ କମେଣ୍ଟ ମରାକୁ ନେଇ ଏହି ଘଟଣା ଘଟିଥାଇପାରେ ବୋଲି ଚର୍ଚ୍ଚା ହେଉଛି। ସ୍ଥାନୀୟ ରାଜନେତା ମଧ୍ଯ ଘଟଣାକୁ ନେଇ ନିନ୍ଦା କରିଛନ୍ତି ଏବଂ କାର୍ଯ୍ୟାନୁଷ୍ଠାନ ଦାବି କରିଛନ୍ତି। 

ସୂଚନା ଥାଉକି ପ୍ରତିଦିନ ସେହି ରାସ୍ତା  ଦେଇ ଶହ ଶହ ଛାତ୍ରୀ ଯା’ ଆସ କରୁଥିବା ବେଳେ ଏଭଳି ଆକ୍ରମଣକୁ ସାଧାରଣରେ ନିନ୍ଦା କରାଯାଇଛି ।ଅଣ ଛାତ୍ରଙ୍କ କଲେଜ କ୍ୟାମ୍ପସ ନିକଟକୁ ଯିବା ହୁଏତ ପ୍ରିନସିପାଲଙ୍କ ଅପାରଗତା ବୋଲି ଚର୍ଚ୍ଚା ହୋଇଛି। ଘଟଣାକୁ ନେଇ ପୋଲିସ ତଦନ୍ତ ଆରମ୍ଭ କରିଛି ।