ପିସିବିର ଧମକ, ଏସିଆ କପ ଖେଳିବାକୁ ଭାରତୀୟ ଦଳ ପାକିସ୍ତାନ ନଆସିଲେ ଆମେ ବି ବିଶ୍ଵ କପ୍ ଖେଳିବାକୁ ଯିବୁ ନାହିଁ
Khabar Odisha:sports--cricket--odisha-if-the-indian-team-does-not-come-to-pakistan-then-we-will-not-go-to-india-pcb
ନୂଆଦିଲ୍ଲୀ, ଜାନୁଆରୀ ୨୫(ଖବର ଓଡ଼ିଶା):

ପାକିସ୍ତାନ କ୍ରିକେଟ୍ ବୋର୍ଡ଼ ଧମକ ଦେଇଛି ଯେ ଯଦି ଭାରତ ୨୦୨୦ ସେପ୍ଟେମ୍ବରରେ ହେବାକୁ ଥିବା ଏସିଆ କପ ଟୂର୍ଣ୍ଣାମେଣ୍ଟ ଖେଳିବାକୁ ପାକିସ୍ତାନ ନଆସେ ତେବେ ତାଙ୍କ ଦଳ ୨୦୨୧ରେ ଭାରତରେ ଆୟୋଜନ ହେବାକୁ ଥିବା ଟି-୨୦ ବିଶ୍ଵକପ୍ ଖେଳିବାକୁ ଭାରତ ଯିବ ନାହିଁ। ଉଲ୍ଲେଖଯୋଗ୍ୟ, ଚଳିତ ବର୍ଷ ସେପ୍ଟେମ୍ବରରେ ପାକିସ୍ତାନରେ ଏସିଆ କପ୍ ଆୟୋଜନ ହେବାର ଅଛି। ବିସିସିଆଇ ପୂର୍ବରୁ ସ୍ପଷ୍ଟ କରି ସାରିଛି ଯେ, ଭାରତୀୟ ଦଳ ଏସିଆ କପ୍ ଖେଳିବାକୁ ପାକିସ୍ତାନ ଯିବ ନାହିଁ। 

ପାକିସ୍ତାନ କ୍ରିକେଟ୍ ବୋର୍ଡ଼ର ସିଇଓ ଓ୍ଵାସିମ ଖାନ ଧମକ ଦେଇଛନ୍ତି ଯେ, ଯଦି ଭାରତ ଏସିଆ କପ୍ ଖେଳିବାକୁ ପାକିସ୍ତାନ ଆସିବ ନାହିଁ ତେବେ ପାକିସ୍ତାନ ମଧ୍ୟ ୨୦୨୧ ଟି-୨୦ ବିଶ୍ଵକପ୍ ଖେଳିବାକୁ ଭାରତ ଯିବ ନାହିଁ। କୁହାଯାଉଛି ଯେ, ଏସିଆ କପ ଆୟୋଜନ ସ୍ଥଳରେ ପରିବର୍ତ୍ତନ ହୋଇପାରେ। ମାତ୍ର ପାକିସ୍ତାନ କ୍ରିକେଟ୍  ବୋର୍ଡ଼ର ସିଇଓ ଓ୍ଵାସିମ ଖାନ ଆୟୋଜନ ସ୍ଥଳରେ ପରିବର୍ତ୍ତନ ଖବରକୁ ଖଣ୍ଡନ କରିଛନ୍ତି। 

ବାଂଲାଦେଶ କ୍ରିକେଟ୍  ବୋର୍ଡ଼(ବିସିବି) ଦ୍ଵାରା  ଟି-୨୦ ଓ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ଶୃଙ୍ଖଳା ପାଇଁ ନିଜ ଦଳକୁ ପାକିସ୍ତାନ ପଠାଇବା ନେଇ ସହମତି ଦେବା ପରେ ଗଣମାଧ୍ୟମରେ ଖବର ଆସିଥିଲା ଯେ, ପାକିସ୍ତାନ ସେପ୍ଟେମ୍ବରରେ ହେବାକୁ ଥିବା ଏସିଆ କପ ଆୟୋଜନର ଅଧିକାର ବାଂଲାଦେଶକୁ ପ୍ରଦାନ କରିଛି।

ଓ୍ଵାସିମ ପାକିସ୍ତାନୀ ଖବର କାଗଜ ଡନ ସହିତ ଆଲୋଚନା ବେଳେ କହିଛନ୍ତି ଯେ, ଆୟୋଜନ ସ୍ଥଳ ବଦଳାଇବା ପିସିବି କିମ୍ବା ଆଇସିସିର ବିଶେଷ ଅଧିକାର ନାହିଁ କାରଣ କୌଣସି ନିଷ୍ପତ୍ତି ଏସିଆନ କ୍ରିକେଟ୍ କାଉନସିଲ(ଏସିସି) ହିଁ ନେଇଥାଏ।

କିଛି ବିଶେଷଜ୍ଞଙ୍କ କହିବା କଥା ଏସିଆ କପ ଆୟୋଜନ ପାକିସ୍ତାନ ପାଇଁ ସମ୍ଭବ ନୁହଁ କାରଣ ଭାରତ ଏଠାରେ ଖେଳିବା ପାଇଁ ପ୍ରସ୍ତୁତ ନୁହଁ। ଗତ ସପ୍ତାହରେ ଏମିତି ଖବର ଆସିଥିଲା ଯେ, ବିସିସିଆଇ ପାକିସ୍ତାନରେ ନଖେଳିବା ନିଜର ନିଷ୍ପତ୍ତି ବଦଳାଇବ ନାହିଁ। ଉଲ୍ଲେଖଯୋଗ୍ୟ, ଭାରତ ୨୦୦୮ରୁ ପାକିସ୍ତାନ ଗସ୍ତ କରି ନାହିଁ। ଅନ୍ୟପଟେ ପାକିସ୍ତାନ ଦିନିକିଆ ଓ ଟି-୨୦ ଶୃଙ୍ଖଳା ଖେଳିବା ପାଇଁ ଶେଷ ଥର ୨୦୧୨ରେ ଭାରତ ଗସ୍ତ କରିଥିଲା।

Subscribe

National International State Sports Entertainment