ଅନ୍ତର୍ଜାତୀୟ କ୍ରିକେଟରେ ଭାରତ ଓ ପାକିସ୍ତାନର ମ୍ୟାଚ ବେଶ ରୋମାଞ୍ଚକର ହୋଇଥାଏ । ନିକଟରେ ଶେଷ ହୋଇଥିବା ଟି-୨୦ ବିଶ୍ୱକପରେ ଭାରତ ପାକିସ୍ତାନକୁ ପରାସ୍ତ କରିବା ସହ ବିଶ୍ୱକପ ଟାଇଟେଲ ହାସଲ କରିଥିଲା । ତେବେ ଆଜିଠାରୁ ଆରମ୍ଭ ହେଉଛି ମହିଳା ଏସିଆ କପ । ଟୁର୍ନାମେଣ୍ଟର ପ୍ରଥମ ଦିନରେ ଦୁଇ ବଡ ପ୍ରତିଦ୍ୱନ୍ଦୀ ଭାରତ ଓ ପ୍ରକିସ୍ତାନ ମୁହାଁମୁହିଁ ହେବେ । ଚଳିତ ସଂସ୍କରଣ ଶ୍ରୀଲଙ୍କାରେ ଆୟୋଜନ ହେଉଥିବାବେଳେ ଆଜିର ମ୍ୟାଚ ରଣଗିରି ଡ଼ମ୍ବୁଲ୍ଲା ଅନ୍ତର୍ଜାତୀୟ ଷ୍ଟାଡିୟମରେ ଖେଳାଯିବ । ସେମି ଫାଇନାଲ ଓ ଫାଇନାଲକୁ ମିଶାଇ ସମୁଦାୟ ୧୫ ଟି ମ୍ୟାଚ ଖେଳାଯିବ ଏବଂ ସମସ୍ତ ମ୍ୟାଚ ରଣଗିରି ଡ଼ମ୍ବୁଲ୍ଲା ଅନ୍ତର୍ଜାତୀୟ ଷ୍ଟାଡିୟମରେ ଖେଳାଯିବ। ପ୍ରଥମ ମ୍ୟାଚ ୟୁଏଇ ଓ ନେପାଳ ମଧ୍ୟରେ ଖେଳାଯିବ ଓ ଏହାପରେ ଭାରତ ଓ ପାକିସ୍ତାନ ମ୍ୟାଚ ଖେଳାଯିବ । ଗ୍ରୁପ-ଏ ଓ ଗ୍ରୁପ-ବି, ଏହି ଦୁଇଟି ଗ୍ରୁପରେ ସମୁଦାୟ ୮ ଟି ଦଳ ମୁହାଁମୁହିଁ ହେବେ । ଗ୍ରୁପ-ଏ ରେ ଭାରତ, ପାକିସ୍ତାନ, ନେପାଳ ଓ ୟୁଏଇ ରହିଥିବାବେଳେ ଗ୍ରୁପ-ବି ରେ ଶ୍ରୀଲଙ୍କା, ମାଲେସିଆ, ଥାଇଲ୍ୟାଣ୍ଡ ଓ ବାଂଲାଦେଶ ଅଛନ୍ତି । ମହିଳା ଏସିଆ କପ ୯ ଥର ଆୟୋଜନ ହୋଇଥିବାବେଳେ ଭାରତୀୟ ଦଳ ୮ ଥର ବିଜୟ ହାସଲ କରିଛି । ୨୦୧୮ ରେ ବାଂଲାଦେଶ ବିପକ୍ଷରେ ଭାରତୀୟ ଦଳ ପ୍ରଥମ ଥର ପାଇଁ ପରାସ୍ତ ହୋଇଥିଲା ଏବଂ ଏହାପରେ ୨୦୨୨ ରେ ପୁନର୍ବାର ଟ୍ରଫି ଜିତିଥିଲା ।
ଭାରତୀୟ ସ୍କ୍ୱାଡ଼ :- ଶେଫାଳି ବର୍ମା, ସ୍ମୃତି ମନ୍ଧାନା, ଜେମିମା ରୋଡ୍ରିଗୁସ୍, ହର୍ମନପ୍ରୀତ କୌର(ଅଧିନାୟକ), ଦୀପ୍ତି ଶର୍ମା, ଉମା ଛେତ୍ରୀ(ୱିକେଟ୍ କିପର), ଏସ ସାଜାନା, ପୂଜା ବସ୍ତ୍ରକାର, ଶ୍ରେୟଙ୍କା ପାଟିଲ, ଅରୁନ୍ଧତୀ ରେଡ୍ଡୀ, ରାଧା ଯାଦବ, ଦୟାଲନ ହେମଲଥା, ରେଣୁକା ଠାକୁର ସିଂ, ରିଛା ଘୋଷ, ଆଶା ସୋଭାନା
ପାକିସ୍ତାନ ସ୍କ୍ୱାଡ଼ :- ସିଦ୍ଧ୍ରା ଆମିନ, ଗୁଲ ଫିରୋଜା, ଟୁବା ହାସନ, ମୁନିବା ଅଲି(ୱିକେଟ୍ କିପର), ନିଦା ଦାର (ଅଧିନାୟକ), ଆଲିଆ ରିଆଜ, ଫାତିମା ସାନା, ଓମାଇମା ସୋହେଲ, ଡାଏନା ବେଗ, ନାଶ୍ରା ସାନ୍ଧୁ, ସାଦିଆ ଇକବାଲ, ସଇଦା ଆରୋବ ଶାହା, ନାଜିହା ଅଲଭି, ତସ୍ମିଆ ରୁବାବ, ଇରାମ ଜାଭେଦ୍