ଅହମ୍ମଦାବାଦ: ୨୦୨୬ ଟି୨୦ ବିଶ୍ୱକପ୍ ଫାଇନାଲ୍ ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ମାର୍ଚ୍ଚ ୮ ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଖେଳାଯିବ। ଟାଇଟଲ୍ ମ୍ୟାଚ୍ ପୂର୍ବରୁ ନ୍ୟୁଜିଲାଣ୍ଡର ଅଧିନାୟକ ମିଚେଲ୍ ସାଣ୍ଟନର୍ ୧୪୦ କୋଟି ଭାରତୀୟଙ୍କ ହୃଦୟ ଭାଙ୍ଗିବାକୁ ଚେତାବନୀ ଦେଇଛନ୍ତି। ୨୦୨୩ ଟି ଦିନିକିଆ ବିଶ୍ୱକପ୍ ଫାଇନାଲରେ ଅଷ୍ଟ୍ରେଲିୟ ଅଧିନାୟକ ପ୍ୟାଟ୍ କମିନ୍ସ ଭାରତୀୟଙ୍କ ହୃଦୟ ଭାଙ୍ଗି ଦେଇଥିଲେ।

ଗତ ଦିନିକିଆ ବିଶ୍ୱକପ୍‌ର ଫାଇନାଲ୍ ମ୍ୟାଚ୍ ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଖେଳାଯାଇଥିଲା। ଏଠାରେ ଟିମ୍ ଇଣ୍ଡିଆ ଅଷ୍ଟ୍ରେଲିଆଠାରୁ ପରାସ୍ତ ହୋଇଥିଲା। ଏବେ, ୨୦୨୬ ଟି୨୦ ବିଶ୍ୱକପ୍ ଫାଇନାଲ୍ ମଧ୍ୟ ସେହି ଷ୍ଟାଡିୟମରେ ଖେଳାଯିବ। ତେଣୁ ପ୍ରଶଂସକଙ୍କ ମନରେ ଶଙ୍କା ଯେ, ୨୦୨୩ ଫାଇନାଲ୍ ପରି ଦଳ ପରିଣାମ ଭୋଗିବ ନାହିଁ ତ। 

ହୃଦୟ ଭାଙ୍ଗିବାକୁ ଦ୍ୱିଧା କରିବେ ନାହିଁ

ଏକ ସାମ୍ବାଦିକ ସମ୍ମିଳନୀରେ ଭାରତ ବିପକ୍ଷ ଟାଇଟଲ୍ ମ୍ୟାଚ୍ ଉପରେ ପ୍ରଶ୍ନର ଉତ୍ତର ଦେଇ ମିଚେଲ୍ ସାଣ୍ଟନର୍ କହିଛନ୍ତି, "ଆମେ ଟି୨୦ ବିଶ୍ୱକପ୍ ଜିତିବା ପାଇଁ କିଛି ହୃଦୟ ଭାଙ୍ଗିବାକୁ ଦ୍ଵିଧା କରିବୁ ନାହିଁ।" ସରଳ ଭାବରେ କହିବାକୁ ଗଲେ, ସାଣ୍ଟନର୍ କହିଛନ୍ତି ଯେ ସେ ଟି୨୦ ବିଶ୍ୱକପ୍ ଟ୍ରଫି ଜିତିବା ପାଇଁ ଭାରତୀୟ ପ୍ରଶଂସକଙ୍କ ହୃଦୟ ଭାଙ୍ଗିବାକୁ ଦ୍ଵିଧା କରିବେ ନାହିଁ।

ନ୍ୟୁଜିଲାଣ୍ଡର ଫାଇନାଲ ଯାତ୍ରା

ନ୍ୟୁଜିଲାଣ୍ଡ ଗ୍ରୁପ୍ ପର୍ଯ୍ୟାୟରେ ଚାରୋଟି ମ୍ୟାଚ୍ ମଧ୍ୟରୁ ତିନୋଟିରେ ବିଜୟୀ ହୋଇ ସୁପର ୮ରେ ପ୍ରବେଶ କରିଥିଲା। ଦଳ ଦକ୍ଷିଣ ଆଫ୍ରିକା ବିପକ୍ଷରେ ଏକମାତ୍ର ମାଚ୍ ହାରିଥିଲା। ଏହା ପରେ, ଦଳ କେବଳ ଗୋଟିଏ ବିଜୟ ସହିତ ସେମିଫାଇନାଲରେ ପହଞ୍ଚିଥିଲା। ପାକିସ୍ତାନ ବିପକ୍ଷରେ କିୱି  ପ୍ରଥମ ସୁପର ୮ ମ୍ୟାଚ୍ ବର୍ଷା ଯୋଗୁଁ ଧୋଇ ଯାଇଥିଲା। ନ୍ୟୁଜିଲାଣ୍ଡ ତା’ପରେ ଶ୍ରୀଲଙ୍କା ବିପକ୍ଷରେ ପରବର୍ତ୍ତୀ ମ୍ୟାଚ୍ ୬୧ ରନରେ ଜିତିଥିଲା। ତଥାପି, ଇଂଲଣ୍ଡ ବିପକ୍ଷରେ ଶେଷ ସୁପର ୮ ମ୍ୟାଚ୍ ୪ ୱିକେଟରେ ହାରି ଯାଇଥିଲା। କେବଳ ଗୋଟିଏ ବିଜୟ ଏବଂ ଉନ୍ନତ ନେଟ୍ ରନ୍ ରେଟ୍ ଦଳକୁ ସେମିଫାଇନାଲରେ ପହଞ୍ଚିବାରେ ସାହାଯ୍ୟ କରିଥିଲା।

ମିଚେଲ ସାଣ୍ଟନରଙ୍କ ବୟାନ ୨୦୨୩ ଦିନିକିଆ  ବିଶ୍ୱକପ୍ ପାଇଁ ପ୍ରି-ମ୍ୟାଚ୍ ସମ୍ମିଳନୀରେ ପ୍ୟାଟ୍ କମିନ୍ସ କହିଥିବା କଥା ମନେ ପକାଇ ଦେଉଛି। କମିନ୍ସ କହିଥିଲେ ଯେ ସେ ନରେନ୍ଦ୍ର ମୋଦୀ ଷ୍ଟାଡିୟମରେ ଦର୍ଶକଙ୍କୁ ଚୁପ୍ କରାଇବେ। ତା'ପରେ କ'ଣ ହେଲା ତାହା ସମସ୍ତେ ଦେଖିଲେ। ସମଗ୍ର ଟୁର୍ଣ୍ଣାମେଣ୍ଟରେ ବିଜୟ ଧାରା ଜାରି ରଖିଥିବା ଟିମ୍ ଇଣ୍ଡିଆ ଫାଇନାଲରେ ଅଷ୍ଟ୍ରେଲିଆଠାରୁ ପରାସ୍ତ ହୋଇଥିଲା।

ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଖେଳାଯିବାକୁ ଥିବା T20 ବିଶ୍ୱକପ୍ ୨୦୨୬ ଫାଇନାଲ ପୂର୍ବରୁ, ମିଚେଲ ସାଣ୍ଟନରଙ୍କ କଥା କେବଳ ପ୍ୟାଟ୍ କମିନ୍ସଙ୍କ ପରି ନଥିଲା, ବରଂ ତାଙ୍କ ଶରୀର ଭାଷା ମଧ୍ୟ ସମାନ ଥିଲା। ସୋସିଆଲ ମିଡିଆରେ ଏକ ଫଟୋ ପ୍ରକାଶ ପାଇଛି ଯେଉଁଥିରେ ମିଚେଲ ସାଣ୍ଟନର ଅଭ୍ୟାସ ସେସନ୍ ସମୟରେ ତାଙ୍କ ମୋବାଇଲ୍ କ୍ୟାମେରା ସାହାଯ୍ୟରେ ପିଚର ଫଟୋ ନେଉଥିବା ଦେଖାଯାଉଛି, ଯେପରି ପ୍ୟାଟ୍ କମିନ୍ସ ୨୦୨୩ ଦିନିକିଆ ବିଶ୍ୱକପ୍ ସମୟରେ ତାଙ୍କ ମୋବାଇଲ୍ କ୍ୟାମେରା ସାହାଯ୍ୟରେ ପିଚ୍ର ଫଟୋ ଉଠାଇଥିଲେ।