ନୂଆଦିଲ୍ଲୀ: ନିକଟରେ ଟି-୨୦ ଅନ୍ତର୍ଜାତୀୟ କ୍ରିକେଟ୍ରୁ ସନ୍ନ୍ୟାସ ନେଇଥିବା ଭାରତୀୟ କ୍ରିକେଟ୍ ଦଳର ତାରକା ଅଲରାଉଣ୍ଡର ରବୀନ୍ଦ୍ର ଜାଡ଼େଜା ନୂତନ ଇନିଂସର ଆରମ୍ଭ କରିଛନ୍ତି। ସେ ଗୁରୁବାର ଭାରତୀୟ ଜନତା ପାର୍ଟିରେ ସାମିଲ ହେବା ସହ ସଦସ୍ୟତା ଗ୍ରହଣ କରିଛନ୍ତି। ଜାମନଗର ବିଧାୟକ ତଥା ଜାଡ଼େଜାଙ୍କ ପତ୍ନୀ ରିଭାବା ଜାଡ଼େଜା ଗୁରୁବାର ଏକ୍ସରେ ଏହାର ସୂଚନା ଦେଇଛନ୍ତି। 

ଉଲ୍ଲେଖନୀୟ ଜାଡ଼େଜାଙ୍କୁ ତାଙ୍କ ପତ୍ନୀ ରିଭାବାଙ୍କ ସହିତ ଅନେକ ଥର ନିର୍ବାଚନ ପ୍ରଚାରରେ ଦେଖିବାକୁ ମିଳିଥିଲା। ଅନେକ ରୋଡ୍ ଉଭୟ ଏକାଠି  ରୋଡ୍ ଶୋ କରିଛନ୍ତି। ଆଜି ଜାଡ଼େଜା ବିଜେପିର ସଦସ୍ୟତା ଗ୍ରହଣ କରି ରାଜନୀତିରେ ନୂତନ ଇନିଂସ ଆରମ୍ଭ କରିଛନ୍ତି। ତାଙ୍କ ପତ୍ନୀ ରିଭାବା ଏକ୍ସରେ ଏହାର ସୂଚନା ଦେଇଛନ୍ତି। 

ଟି-୨୦ ଅନ୍ତର୍ଜାତୀୟରୁ ଅବସର ଗ୍ରହଣ ସାରିଥିବା ଜାଡ଼େଜାଙ୍କୁ ବାଂଲାଦେଶ ବିପକ୍ଷ ଟେଷ୍ଟ ସିରିଜ୍ରେ ତାଙ୍କୁ ଦେଖିବାକୁ ମିଳିପାରେ। ସେ ଶେଷ ଥର ଟି-୨୦ ବିଶ୍ଵକପ୍ ୨୦୨୪ରେ ଦଳ ପକ୍ଷରୁ ଖେଳିଥିଲେ। ଭାରତ ଫାଇନାଲ୍ରେ ଦକ୍ଷିଣ ଆଫ୍ରିକାକୁ ହରାଇ ଦ୍ଵିତୀୟ ଥର ଟି-୨୦ ବିଶ୍ଵକପ୍ ଟ୍ରଫି ଜିତିଥିଲା। ଏହା ପରେ ଜାଡେଜା ଏହି ଫର୍ମାଟ୍ରୁ ସନ୍ନ୍ୟାସ ଘୋଷଣା କରିଥିଲେ। 

ଜାଡ଼େଜା ଭାରତ ପାଇଁ ୭୪ ଟି-୨୦ ଅନ୍ତର୍ଜାତୀୟ ମ୍ୟାଚ୍ ଖେଳି ୫୧୫ ରନ କରିଛନ୍ତି। ସେ ଏହି ଫର୍ମାଟ୍ରେ ୫୪ ଓ୍ଵିକେଟ୍ ନେଇଛନ୍ତି। ସେ ଏ ପର୍ଯ୍ୟନ୍ତ ୧୯୭ ଦିନିକିଆ ଖେଳି ୧୩୨ ଇନିଂସରୁ ୧୩ ଅର୍ଦ୍ଧଶତକ ୨୭୫୬ ରନ କରିଛନ୍ତି। ବୋଲିଂରେ ୨୨୦ ଓ୍ଵିକେଟ୍ ଅକ୍ତିକାର କରିଛନ୍ତି।