ଭୁବନେଶ୍ୱର: ବିଜେଡ଼ି ସାଂସଦ ସସ୍ମିତ ପାତ୍ରଙ୍କ ଗୋଟିଏ ନିଷ୍ପତ୍ତି ରାଜ୍ୟ ରାଜନୀତି ପାଣିପାଗକୁ ସରଗରମ କରି ଦେଇଛି । ଏହାରି ମଧ୍ୟରେ ବଡ଼ ବୟାନ ଦେଇଛନ୍ତି ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର । ବିଜେଡ଼ିର ନେତୃତ୍ୱର ଅଭାବ ରହିବ ଏବଂ ଭବିଷ୍ୟତ ଅନ୍ଧାର ବୋଲି କହିଛନ୍ତି କୃଷ୍ଣ ପାତ୍ର । 

ଆଜି ଏକ ସାମ୍ବାଦିକ ସମ୍ମିଳନୀରେ ମନ୍ତ୍ରୀ ଶ୍ରୀ ପାତ୍ର ପରୋକ୍ଷରେ ଭିକେ ପାଣ୍ଡିଆନଙ୍କ ଉପରକୁ ଅଙ୍ଗୁଳି ନିର୍ଦ୍ଦେଶ କରିଛନ୍ତି । ସେ କହିଛନ୍ତି ବିଜେଡ଼ିରେ ନେତୃତ୍ୱ ବିପର୍ଯ୍ୟୟ ଦେଖାଦେଇଛି । ପଛରେ ରହି ଯେଉଁ ଡାଇରେକ୍ଟର (ନିର୍ଦ୍ଦେଶକ) ଦଳ ଚଳାଉଥିଲେ ସେ ଏବେ ଭାରତ ଛାଡ଼ି ପଳାଇବା ଉଦ୍ଦେଶ୍ୟରେ ଅଛନ୍ତି । ତାଙ୍କ ଦଳରେ ହେଉଥିବା ଖେଳ ବାବଦରେ ବଦ୍ରି ପାତ୍ର ଓ ପ୍ରଫୁଲ୍ଲ ସାମଲଙ୍କ ଭଳି ବରିଷ୍ଠ ନେତାମାନେ କହି ସାରିଲେଣି । ତେଣୁ ଅପେକ୍ଷା କରନ୍ତୁ । ତେଣୁ ଆମର କିଛି ଟିପ୍ପଣୀ ଦେବାର ଆବଶ୍ୟକତା ନାହିଁ । ନବୀନଙ୍କ ନେତୃତ୍ୱ ଉପରେ ଆଉ କାହାର ଭରସା ନାହିଁ । ତାଙ୍କର ବୟସାଧିକ କାରଣରୁ ସେ କୁଆଡ଼େ ଯାଇ ପାରୁ ନାହାଁନ୍ତି । ସେ ନିର୍ବାଚନ ସମୟରେ ନବୀନ ଯାଇ ପାରୁ ନ ଥିଲେ, ତେଣୁ ସବୁ ଆଡ଼କୁ ପାଣ୍ଡିଆନକୁ ପଠାଉଥିଲେ, ନିର୍ବାଚନ ସମୟରେ ପାଣ୍ଡିଆନ ହେଲିକପ୍ଟର ଧରି ସାରା ରାଜ୍ୟ ବୁଲୁଥିଲେ ଏବଂ ସେ ମନ୍ତ୍ରୀ, ବିଧାୟକମାନଙ୍କୁ ମଧ୍ୟ ମଞ୍ଚ ଉପରେ ବସିବାକୁ ଦେଉ ନ ଥିଲେ । ତାମିଲନାଡୁ ଷ୍ଟାଇଲରେ ଏକୁଟିଆ ମଞ୍ଚ ଉପର ରହି ଭାଷଣ ଦେଉଥିଲେ ।

ପାଣ୍ଡିଆନଙ୍କର ଲକ୍ଷ୍ୟ ଥିଲା ବିଜେଡି ଜିତିଲା ପରେ ସେ ଓଡ଼ିଶାର ମୁଖ୍ୟମନ୍ତ୍ରୀ ହେବେ । ନିଜେ ମୁଖ୍ୟମନ୍ତ୍ରୀ ହେବା ପାଇଁ ସ୍ୱପ୍ନ ଦେଖିଥିଲେ ପାଣ୍ଡିଆନ, କିନ୍ତୁ ଓଡ଼ିଶା ମାଟିକୁ ପାଣ୍ଡିଆନ ଜାଣିପାରିଲେ ନାହିଁ । ଓଡ଼ିଶା ଲୋକ ବିଜ୍ଞତାର ପରିଚୟ ଦେଲେ କାରଣ ଓଡ଼ିଶାକୁ କେହି ଲୁଟ୍ କରି ଯାଇ ପାରିବେ ନାହିଁ, ଏହା କେବେ ଚଳିବ ନାହିଁ । ଆଜି ଆକ୍ସନ ନିଆଯାଇନାହିଁ, କାଲି ଆକ୍ସନ ନିଆଯିବ, କାହାକୁ ଛଡ଼ାଯିବ ନାହିଁ । ଓଡ଼ିଶାକୁ ଯିଏ ବି ଲୁଟିବାକୁ ଚେଷ୍ଟା କରିବ, ତାକୁ ଛଡାଯିବ ନାହିଁ ବୋଲି କୃଷ୍ଣ ପାତ୍ର କହିଛନ୍ତି । 

ଅଧିକ ପଢ଼ନ୍ତୁ:- ଖରା ସହ ବଢ଼ୁଛି ରାଜନୀତି ତାତି: ତାରା କହିଲେ ନବୀନଙ୍କର ବିଜେପି ପ୍ରତି ରହିଛି ଭୟ, ଗୋଟି ଚାଳନା କରୁଛନ୍ତି ପାଣ୍ଡିଆନ