ରାଞ୍ଚି: ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ଶନିବାର ବାଂଲାଦେଶରୁ ଆସିଥିବା ବେଆଇନ ଅନୁପ୍ରବେଶକୁ ଦୃଷ୍ଟିରେ ରଖି ଝାଡ଼ଖଣ୍ଡରେ ଜାତୀୟ ନାଗରିକ ପଞ୍ଜିକା (ଏନଆରସି) ପ୍ରସ୍ତୁତ କରିବାକୁ ଆହ୍ୱାନ ଦେଇଛନ୍ତି। ଏହି ଅବସରରେ ସେ କହିଛନ୍ତି ଯେ କେନ୍ଦ୍ର ସରକାର ଝାଡ଼ଖଣ୍ଡ ହାଇକୋର୍ଟରେ ଅନୁପ୍ରବେଶ ସମ୍ପର୍କରେ ସତ୍ୟପାଠ ଦାଖଲ କରିବା ପରେ ରାଜ୍ୟ ସରକାର ତୁରନ୍ତ ଏନଆରସି ପ୍ରକ୍ରିୟା ଆରମ୍ଭ କରିବା ଉଚିତ।

ବିର୍ସା ମୁଣ୍ଡା ବିମାନବନ୍ଦରରେ ଗଣମାଧ୍ୟମକୁ ସୂଚନା ଦେଇ ଶ୍ରୀ ଶର୍ମା କହିଛନ୍ତି, ଝାଡ଼ଖଣ୍ଡରେ ଆଦିବାସୀ ଜନସଂଖ୍ୟା କିପରି ହ୍ରାସ ପାଉଛି ତାହା କେନ୍ଦ୍ର ସରକାର ବିସ୍ତୃତ ପରିସଂଖ୍ୟାନ ତଥ୍ୟ ଉପସ୍ଥାପନ କରିଛନ୍ତି। ସତ୍ୟପାଠରେ ସାନ୍ଥାଲ ପ୍ରଗଣାର ସ୍ଥିତି ଉପରେ ଆଲୋକପାତ କରାଯାଇଛି। ଝାଡ଼ଖଣ୍ଡ ସରକାର ଏନଆରସି ଲାଗୁ କରନ୍ତୁ।

ଝାଡ଼ଖଣ୍ଡରେ ବିଜେପି କ୍ଷମତାକୁ ଆସିଲେ ଏନଆରସି ଲାଗୁ କରିବ କି ବୋଲି ପଚରାଯିବାରୁ ସେ କହିଛନ୍ତି, ଆମେ ସରକାର ଗଢ଼ିବା ପରେ ଏହାକୁ କାର୍ଯ୍ୟକାରୀ କରାଯିବ। ମୁଁ ପଚାରିବାକୁ ଚାହୁଁଛି ଯେ କେନ୍ଦ୍ରର ସତ୍ୟପାଠ ପରେ ସବୁ କିଛି ମଞ୍ଜୁର ହୋଇସାରିଥିବା ବେଳେ ବର୍ତ୍ତମାନର ସରକାରଙ୍କ କାର୍ଯ୍ୟକାଳରେ କାହିଁକି ଏହା କରାଯାଉନାହିଁ? ଅନୁପ୍ରବେଶ ଯୋଗୁଁ ଆଦିବାସୀଙ୍କ ପରିଚୟ ଓ ଅସ୍ତିତ୍ୱ ପ୍ରତି ବିପଦ ସୃଷ୍ଟି ହୋଇଛି। ମୁଖ୍ୟମନ୍ତ୍ରୀ କଠୋର ପଦକ୍ଷେପ ନେବା ଦରକାର। 

ଗତ ସେପ୍ଟେମ୍ବର ୧୨ ତାରିଖରେ କେନ୍ଦ୍ର ସରକାର ଝାଡ଼ଖଣ୍ଡ ହାଇକୋର୍ଟଙ୍କୁ ଜଣାଇଥିଲେ ଯେ ରାଜ୍ୟରେ ବେଆଇନ ବାଂଲାଦେଶୀ ପ୍ରବାସୀ ରହୁଛନ୍ତି। କାର୍ଯ୍ୟକାରୀ ମୁଖ୍ୟ ବିଚାରପତି ସୁଜିତ ନାରାୟଣ ପ୍ରସାଦ ଓ ଜଷ୍ଟିସ ଅରୁଣ କୁମାର ରାୟଙ୍କୁ ନେଇ ଗଠିତ ଖଣ୍ଡପୀଠରେ ଦାଖଲ ସତ୍ୟପାଠରେ କେନ୍ଦ୍ର ସରକାର କହିଛନ୍ତି ଯେ ସାହେବଗଞ୍ଜ ଓ ପାକୁର ଜିଲ୍ଲା ଦେଇ ବାଂଲାଦେଶୀମାନେ ବେଆଇନ ଭାବେ ଝାଡ଼ଖଣ୍ଡରେ ପ୍ରବେଶ କରିଛନ୍ତି।

ଯଦି ୧୦ ବର୍ଷ ପର୍ଯ୍ୟନ୍ତ ଏଭଳି ସ୍ଥିତି ଲାଗି ରହେ ତେବେ ସୀମା ନିର୍ଦ୍ଧାରଣ ପରେ ଆଦିବାସୀଙ୍କ ହାତରେ କିଛି ରହିବ ନାହିଁ ବୋଲି ସେ କହିଛନ୍ତି। ଆଦିବାସୀଙ୍କ ସଂଖ୍ୟା ଯେଭଳି ହ୍ରାସ ପାଉଛି, ଆଜି ଯଦି ନୂଆ ସୀମା ନିର୍ଦ୍ଧାରଣ ହୁଏ, ତେବେ ସାନ୍ଥାଲରେ କେତେ ଆଦିବାସୀ ଆସନ ବାକି ରହିବ। ଆଦିବାସୀଙ୍କ ହାତରୁ ସବୁ କିଛି ଚାଲିଯିବ।

ଅଧିକ ପଢ଼ନ୍ତୁ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ବଡ଼ ଘୋଷଣା