ଉତ୍ତର ପ୍ରଦେଶର ରାଜ୍ୟପାଳ ଆନନ୍ଦୀବେନ ପଟେଲଙ୍କ ଏକ ବୟାନକୁ ନେଇ ଏବେ ସୋସିଆଲ ମିଡିଆରେ ଜୋରଦାର ଚର୍ଚ୍ଚା ଆରମ୍ଭ ହୋଇଛି। କାନପୁରସ୍ଥିତ ଛତ୍ରପତି ଶାହୁଜୀ ମହାରାଜ ବିଶ୍ୱବିଦ୍ୟାଳୟ (CSJMU)ର ୪୧ତମ ସମାବର୍ତ୍ତନ ଉତ୍ସବରେ ଯୋଗଦେଇ ସେ କହିଥିଲେ, "ଆପଣ IAS ଅଫିସର ହୁଅନ୍ତୁ କିମ୍ବା ଶିକ୍ଷକ, ପ୍ରଥମେ ଜଣେ 'ଏକ୍ସପର୍ଟ ମା' ବା ଦକ୍ଷ ମା' ହୁଅନ୍ତୁ। ଘରେ ପ୍ରସ୍ତୁତ ହେଉଥିବା ଖାଦ୍ୟ ରାନ୍ଧିବା ସମସ୍ତଙ୍କୁ ଜାଣିବା ଉଚିତ।"

ତାଙ୍କ ଏହି ମନ୍ତବ୍ୟ ଭାଇରାଲ ହେବା ପରେ ସୋସିଆଲ ମିଡିଆରେ ଦୁଇ ପ୍ରକାରର ପ୍ରତିକ୍ରିୟା ଦେଖାଦେଇଛି। ଗୋଟିଏ ପକ୍ଷ ଆନନ୍ଦୀବେନ ପଟେଲଙ୍କ ପରିବାରିକ ମୂଲ୍ୟବୋଧ ଓ ସନ୍ତାନ ଲାଳନପାଳନ ଉପରେ ଦିଆଯାଇଥିବା ଗୁରୁତ୍ୱକୁ ସମର୍ଥନ କରିଛନ୍ତି। ଅନ୍ୟପଟେ ଅନେକ ଲୋକ ପ୍ରଶ୍ନ ଉଠାଇଛନ୍ତି ଯେ, ଏଭଳି ଦାୟିତ୍ୱ କେବଳ ମହିଳାଙ୍କ ପାଇଁ କାହିଁକି? ପୁରୁଷମାନଙ୍କ ପାଇଁ ମଧ୍ୟ କି ସମାନ ଆଶା ରଖାଯାଉଛି?

ସମାବର୍ତ୍ତନ ଉତ୍ସବରେ ଛାତ୍ରଛାତ୍ରୀ, ଅଭିଭାବକ ଓ ଶିକ୍ଷକମାନଙ୍କୁ ସମ୍ବୋଧିତ କରି ରାଜ୍ୟପାଳ କହିଥିଲେ ଯେ, ବିବାହ ପରେ ମହିଳାମାନେ କେବେ ବି ନିଜର ଶିକ୍ଷା ଅଧାରେ ଛାଡ଼ିବା ଉଚିତ ନୁହେଁ। ବରଂ ସେମାନେ ନିଜର ଜ୍ଞାନ ଓ ଦକ୍ଷତାକୁ ପରିବାର, ସମାଜ ଏବଂ ଦେଶର ଉନ୍ନତିରେ ବ୍ୟବହାର କରିବା ଆବଶ୍ୟକ।

ସେ ଆହୁରି କହିଥିଲେ ଯେ, ଅଭିଭାବକଙ୍କ ଦାୟିତ୍ୱ କେବଳ ପିଲାଙ୍କୁ ସ୍କୁଲ କିମ୍ବା କଲେଜରେ ଭର୍ତ୍ତି କରାଇଦେବାରେ ଶେଷ ହୋଇଯାଏ ନାହିଁ। ପିଲାମାନେ ଶିକ୍ଷାନୁଷ୍ଠାନକୁ ଯିବା ପରେ ସେମାନେ କ'ଣ କରୁଛନ୍ତି, କାହା ସହ ମିଶୁଛନ୍ତି ଏବଂ କେଉଁ ଦିଗକୁ ଆଗକୁ ବଢ଼ୁଛନ୍ତି, ସେଥିପ୍ରତି ଅଭିଭାବକଙ୍କ ନଜର ରହିବା ଉଚିତ। ତାଙ୍କ କହିବା ଅନୁସାରେ, ଅଭିଭାବକଙ୍କ ସାମାନ୍ୟ ଅବହେଳା ମଧ୍ୟ ପିଲାଙ୍କ ଭବିଷ୍ୟତକୁ ପ୍ରଭାବିତ କରିପାରେ।

ଆନନ୍ଦୀବେନ ପଟେଲ ସମାଜରେ ବଢ଼ୁଥିବା ଘରୋଇ ହିଂସା ଓ ମହିଳାଙ୍କ ବିରୋଧରେ ଅପରାଧକୁ ନେଇ ମଧ୍ୟ ଚିନ୍ତା ପ୍ରକାଶ କରିଥିଲେ। ତାଙ୍କ ମତରେ, କେବଳ ଡିଗ୍ରୀ ହାସଲ କରିବା ହିଁ ଶିକ୍ଷାର ଉଦ୍ଦେଶ୍ୟ ନୁହେଁ। ଯଦି ଶିକ୍ଷାର ହାର ବଢ଼ୁଥିବା ସତ୍ତ୍ୱେ ସମାଜରେ ମହିଳାଙ୍କ ଉପରେ ଅତ୍ୟାଚାର ଓ ଅପରାଧ କମୁନାହିଁ, ତେବେ ଏହା ଆମ ଶିକ୍ଷା ବ୍ୟବସ୍ଥା ପାଇଁ ଚିନ୍ତାର ବିଷୟ ବୋଲି ସେ କହିଥିଲେ।

ସେ ଶିକ୍ଷା ସହିତ ନୈତିକ ମୂଲ୍ୟବୋଧର ବିକାଶ ଉପରେ ମଧ୍ୟ ଜୋର ଦେଇ କହିଥିଲେ ଯେ, ଜଣେ ଶିକ୍ଷିତ ବ୍ୟକ୍ତି କେବଳ ପେଶାଗତ ସଫଳତା ନୁହେଁ, ବରଂ ଜଣେ ଦାୟିତ୍ୱବାନ ନାଗରିକ ଓ ଭଲ ମଣିଷ ହେବା ମଧ୍ୟ ଆବଶ୍ୟକ।

ତେବେ ତାଙ୍କ "ପ୍ରଥମେ ଏକ୍ସପର୍ଟ ମା' ହୁଅନ୍ତୁ" ବୟାନକୁ ନେଇ ସମର୍ଥନ ଓ ସମାଲୋଚନା ମଧ୍ୟରେ ବିତର୍କ ଜାରି ରହିଛି। କେହି ଏହାକୁ ପରିବାରିକ ମୂଲ୍ୟବୋଧର ସନ୍ଦେଶ ବୋଲି କହୁଥିବା ବେଳେ, ଆଉ କେହି ଏହାକୁ ମହିଳାଙ୍କ ଉପରେ ପାରମ୍ପରିକ ଭୂମିକା ଥୋପିବାର ପ୍ରୟାସ ବୋଲି ମତ ଦେଉଛନ୍ତି।