ତୃଣମୂଳ କଂଗ୍ରେସ (TMC) ଦଳ ବିରୋଧୀ କାର୍ଯ୍ୟକଳାପ ଏବଂ ଅନୁଶାସନହୀନତା ଅଭିଯୋଗରେ ଏକ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଦଳ ତା’ର ଦୁଇ ବିଧାୟକ, ସନ୍ଦୀପନ ସାହା ଏବଂ ଋତବ୍ରତ ବାନାର୍ଜୀଙ୍କୁ ତତ୍କାଳ ପ୍ରଭାବରୁ ଦଳର ପ୍ରାଥମିକ ସଦସ୍ୟତାରୁ ବହିଷ୍କୃତ କରିଛି। ଦଳୀୟ ବୈଠକଗୁଡ଼ିକରେ ଲଗାତାର ଅନୁପସ୍ଥିତ ରହିବା ଏବଂ ଦଳର ସ୍ୱାର୍ଥ ବିରୋଧରେ ବୟାନବାଜି କରିବା ପରେ ଟିଏମ୍ସି ନେତୃତ୍ୱ ଏହି କଠୋର ପଦକ୍ଷେପ ନେଇଛନ୍ତି।

ମିଳିଥିବା ସୂଚନା ଅନୁଯାୟୀ, ଏହି କାର୍ଯ୍ୟାନୁଷ୍ଠାନ ସମ୍ପର୍କରେ ବିଧାନସଭା ବାଚସ୍ପତି (Speaker) ରଥେନ୍ଦ୍ର ବୋଷଙ୍କୁ ପତ୍ର ପଠାଯାଇ ସାରିଛି। ଏହା ପରେ ଋତବ୍ରତ ଏବଂ ସନ୍ଦୀପନ ବିଧାନସଭାର ସଦସ୍ୟ ତଥା ବିଧାୟକ ଭାବେ ରହିବେ, କିନ୍ତୁ ସେମାନେ ଆଉ ତୃଣମୂଳ କଂଗ୍ରେସର ବିଧାୟକ ଭାବେ ପରିଚିତ ହେବେ ନାହିଁ।

ବୈଠକରେ ପହଞ୍ଚିନଥିଲେ ବିଧାୟକ

ଜୁନ୍ ୧ ତାରିଖରେ ଜାରି କରାଯାଇଥିବା ପୃଥକ ପୃଥକ ବହିଷ୍କାର ନୋଟିସ୍ରେ ତୃଣମୂଳ କଂଗ୍ରେସ କହିଛି ଯେ, ଦଳର ସକ୍ଷମ ନେତୃତ୍ୱଙ୍କ ଦ୍ୱାରା ଆହୂତ ବୈଠକଗୁଡ଼ିକରେ ଏହି ଦୁଇ ବିଧାୟକ ଲଗାତାର ଅନୁପସ୍ଥିତ ରହୁଥିଲେ। ଦଳ ଅନୁଯାୟୀ, ଦୁଇ ନେତା ଟିଏମ୍ସି ଟିକେଟ୍ରୁ ନିର୍ବାଚନ ଜିତି ବିଧାନସଭାକୁ ପହଞ୍ଚିଥିଲେ, କିନ୍ତୁ ପରବର୍ତ୍ତୀ ସମୟରେ ସେମାନେ ସାଂଗଠନିକ ଶୃଙ୍ଖଳା ରକ୍ଷା କରିନଥିଲେ।

ବିଧାୟକମାନଙ୍କ ଉପରେ କ’ଣ ଅଛି ଆରୋପ?

ନୋଟିସ୍ରେ କୁହାଯାଇଛି ଯେ, ଦଳର ସକ୍ଷମ କର୍ତ୍ତୃପକ୍ଷ ଯାଞ୍ଚ କରି ପାଇଛନ୍ତି ଯେ ଦୁଇ ବିଧାୟକ ଏଭଳି କାର୍ଯ୍ୟକଳାପରେ ସାମିଲ ଥିଲେ ଏବଂ ଏଭଳି ବୟାନ ଦେଇଥିଲେ ଯାହା ଟିଏମ୍ସି ପାଇଁ କ୍ଷତିକାରକ ଅଟେ। ଏହାକୁ ଗୁରୁତ୍ତର ଅନୁଶାସନହୀନତା ମାନି ସେମାନଙ୍କ ବିରୋଧରେ ଏହି ଆକ୍ସନ ନିଆଯାଇଛି। ନୋଟିସ୍ ଅନୁଯାୟୀ, "ବିଷୟଟି ଉପରେ ଉପଯୁକ୍ତ ବିଚାର ବିମର୍ଶ କରିବା ପରେ ଟିଏମ୍ସିର ସକ୍ଷମ କର୍ତ୍ତୃପକ୍ଷ ଆପଣଙ୍କୁ ଦଳର (ପ୍ରାଥମିକ) ସଦସ୍ୟତାରୁ ତତ୍କାଳ ପ୍ରଭାବରୁ ବହିଷ୍କାର କରିବାକୁ ନିଷ୍ପତ୍ତି ନେଇଛନ୍ତି।"

ସମୀକ୍ଷା ପରେ ନିଆଗଲା ନିଷ୍ପତ୍ତି

ତୃଣମୂଳ କଂଗ୍ରେସ ସ୍ପଷ୍ଟ କରିଛି ଯେ, ବହିଷ୍କାର ପରେ ସନ୍ଦୀପନ ସାହା ଏବଂ ଋତବ୍ରତ ବାନାର୍ଜୀ ଦଳ ସହ ଜଡ଼ିତ କୌଣସି ପଦବୀ, ଦାୟିତ୍ୱ, ବିଶେଷାଧିକାର କିମ୍ବା ଅଧିକାରର ବ୍ୟବହାର କରିପାରିବେ ନାହିଁ। ଏହି ନିଷ୍ପତ୍ତି ନୋଟିସ୍ ଜାରି ହେବା ତାରିଖରୁ ହିଁ ପ୍ରଭାବୀ ହେବ। ଦଳ ସେମାନଙ୍କ ଉପରେ ଦଳ ବିରୋଧୀ କାର୍ଯ୍ୟକଳାପର ଆରୋପ ଲଗାଇଥିଲେ ମଧ୍ୟ, ନୋଟିସ୍ରେ ସେହି ନିର୍ଦ୍ଦିଷ୍ଟ କାର୍ଯ୍ୟକଳାପ କିମ୍ବା ବୟାନ ବିଷୟରେ ଉଲ୍ଲେଖ କରାଯାଇ ନାହିଁ। ଟିଏମ୍ସି କହିଛି ଯେ, ସମ୍ପୂର୍ଣ୍ଣ ମାମଲାର ଅନୁଧ୍ୟାନ ଓ ସମୀକ୍ଷା ପରେ ହିଁ ଏହି ନିଷ୍ପତ୍ତି ନିଆଯାଇଛି। ଦଳର ଏହି ବଡ଼ ନିଷ୍ପତ୍ତି ପରେ ବିଧାୟକ ସନ୍ଦୀପନ ସାହା କିମ୍ବା ଋତବ୍ରତ ବାନାର୍ଜୀଙ୍କ ପକ୍ଷରୁ ବର୍ତ୍ତମାନ ସୁଦ୍ଧା କୌଣସି ଆନୁଷ୍ଠାନିକ ପ୍ରତିକ୍ରିୟା ସାମ୍ନାକୁ ଆସିନାହିଁ।