ପାକିସ୍ତାନୀ ଆତଙ୍କବାଦୀ ସଂଗଠନ ଲସ୍କର-ଏ-ତୋଏବା (LeT) ର ଆତଙ୍କବାଦୀ ଶବ୍ବିର ଅହମ୍ମଦ ଲୋନ୍‌କୁ ଦିଲ୍ଲୀ ପୋଲିସ ପଚରାଉଚରା ଆରମ୍ଭ କରିଛି। ଏହି ସମୟରେ ଶବ୍ବିର ଅନେକ ଚାଞ୍ଚଲ୍ୟକର ତଥ୍ୟ ପ୍ରକାଶ କରିଛି। ଧରାପଡ଼ିବା ପୂର୍ବରୁ ସେ ଦିଲ୍ଲୀର ତିନୋଟି ବଡ଼ ମନ୍ଦିରର ରେକି କରିଥିଲା। ଏହି ସମୟରେ ସେ ମନ୍ଦିରଗୁଡ଼ିକର ଭିଡିଓ ପ୍ରସ୍ତୁତ କରି ପାକିସ୍ତାନରେ ଥିବା ନିଜର ହ୍ୟାଣ୍ଡଲର୍‌ମାନଙ୍କୁ ପଠାଇଥିଲା।

ଦିଲ୍ଲୀ ପୋଲିସର ପଚରାଉଚରା ସମୟରେ ଶବ୍ବିର କହିଛି ଯେ, ସେ ଦିଲ୍ଲୀର କାଳକାଜୀ ମନ୍ଦିର, ଲୋଟସ୍ ଟେମ୍ପଲ ଏବଂ ଛତରପୁର ମନ୍ଦିରର ରେକି କରିଥିଲା। ମୋବାଇଲ୍‌ରେ ଏହି ତିନୋଟି ମନ୍ଦିରର ଭିଡିଓ ରେକର୍ଡ କରି ସେ ପାକିସ୍ତାନରେ ଥିବା ଲସ୍କର ହ୍ୟାଣ୍ଡଲର୍‌କୁ ପଠାଇଥିଲା। ଏହା ବ୍ୟତୀତ ସେ କନଟ୍ ପ୍ଲେସ୍ ଏବଂ ପାହାଡ଼ଗଞ୍ଜ ଭଳି ଅନେକ ଜନଗହଳି ପୂର୍ଣ୍ଣ ବଜାର ଅଞ୍ଚଳର ମଧ୍ୟ ରେକି କରିଥିଲା।

ଆତଙ୍କବାଦୀ ଶବ୍ବିରକୁ ୫ ଦିନିଆ ପୋଲିସ ରିମାଣ୍ଡରେ ପଠାଯାଇଛି। ସେ ISI ଏବଂ ଲସ୍କର ସହାୟତାରେ ବାଂଲାଦେଶରେ TRF ଭଳି ଏକ ନୂଆ ଆତଙ୍କବାଦୀ ସଂଗଠନ ଗଢ଼ିବା କଥା ମଧ୍ୟ ସ୍ୱୀକାର କରିଛି। ଏହି ସଂଗଠନ ପାଇଁ ସେ ଦିଲ୍ଲୀ-ଏନସିଆରରେ ରେକି କରିବା ସହ ନୂଆ ସଦସ୍ୟ ନିଯୁକ୍ତି କାର୍ଯ୍ୟ ଆରମ୍ଭ କରିବାକୁ ଯୋଜନା କରୁଥିଲା।

ଭାରତରେ ନୂଆ ଆତଙ୍କବାଦୀ ମଡ୍ୟୁଲ୍ ସକ୍ରିୟ କରିବାର ଥିଲା ଲକ୍ଷ୍ୟ

ଦିଲ୍ଲୀ ପୋଲିସର ସ୍ପେଶାଲ ସେଲ୍ ଆତଙ୍କବାଦୀ ଶବ୍ବିରକୁ ଗାଜୀପୁରରୁ ଗିରଫ କରିଛି। ସ୍ପେଶାଲ ସେଲ୍‌ର ଦାବି ଅନୁଯାୟୀ, ଶବ୍ବିର ପାକିସ୍ତାନୀ ଗୁପ୍ତଚର ସଂସ୍ଥା ISI ର ନିର୍ଦ୍ଦେଶରେ ଭାରତରେ ଲସ୍କର-ଏ-ତୋଏବାର ଏକ ନୂଆ ମଡ୍ୟୁଲ୍ ସକ୍ରିୟ କରିବା ଏବଂ ଯୁବକମାନଙ୍କୁ ସଂଗଠନରେ ଭର୍ତ୍ତି କରିବା ପାଇଁ କାମ କରୁଥିଲା। ସେ ନିଜ ଲକ୍ଷ୍ୟରେ ସଫଳ ହେବା ପୂର୍ବରୁ ପୋଲିସ ତାକୁ ଗିରଫ କରିଥିଲା। ତା’ ପାଖରୁ ବାଂଲାଦେଶୀ ଓ ପାକିସ୍ତାନୀ କରେନ୍ସି, ଗୋଟିଏ ଲ୍ୟାପଟପ୍ ଏବଂ ଅନ୍ୟାନ୍ୟ ସାମଗ୍ରୀ ଜବତ କରାଯାଇଛି।

ନେପାଳ ସୀମା ଦେଇ ଭାରତରେ ପ୍ରବେଶ

ସୂତ୍ର ଅନୁଯାୟୀ, ଅଭିଯୁକ୍ତ ନେପାଳ ସୀମା ଦେଇ ଭାରତରେ ପ୍ରବେଶ କରିଥିଲା। ପାକିସ୍ତାନରେ ଥିବା ତାର ହ୍ୟାଣ୍ଡଲର୍ ଅବୁ ହୁଜୈଫା, ସୁମାମ ବାବର ଏବଂ ଅବଦୁଲ ରହମାନଙ୍କ କହିବା ଅନୁସାରେ ସେ ବାଂଲାଦେଶରୁ ନିଜର ନେଟୱର୍କ ପରିଚାଳନା କରୁଥିଲା। ସେ ବେଆଇନ ଭାବେ ପ୍ରଥମେ ନେପାଳ ଓ ପରେ ଭାରତରେ ପଶିଥିଲା। ଶବ୍ବିର ତହରିକ-ଉଲ୍-ମୁଜାହିଦ୍ଦିନ କମାଣ୍ଡର ଅବୁ ତଲ୍‌ହା ଏବଂ UAPA ଅଧୀନରେ ଆତଙ୍କବାଦୀ ଘୋଷିତ ହୋଇଥିବା ଆସିଫ୍ ଡାର୍‌ ସହିତ ମଧ୍ୟ ସମ୍ପର୍କରେ ଥିଲା।