ନୂଆଦିଲ୍ଲୀ: ହିନ୍ଦୁ ଦେବଦେବୀଙ୍କ ବିରୋଧରେ ଅପମାନଜନକ ଓ ଉତ୍ତେଜନାମୂଳକ ବୟାନକୁ ନେଇ ଦିଲ୍ଲୀ ହାଇକୋର୍ଟ ସାମ୍ବାଦିକା ରାଣା ଆୟୁବଙ୍କ ବିରୋଧରେ କାର୍ଯ୍ୟାନୁଷ୍ଠାନକୁ ତ୍ୱରାନ୍ୱିତ କରିବାକୁ ନିର୍ଦ୍ଦେଶ ଦେଇଛନ୍ତି। ଏଥିସହିତ କୋର୍ଟ ରାଣା ଆୟୁବଙ୍କୁ ନୋଟିସ୍ ଜାରି କରି ନିଜର ପକ୍ଷ ରଖିବାକୁ କହିଛନ୍ତି।

ଏହି ମାମଲା ବର୍ଷ ୨୦୧୩ ରୁ ୨୦୧୭ ମଧ୍ୟରେ ତାଙ୍କ ସୋସିଆଲ ମିଡିଆ ପ୍ଲାଟଫର୍ମ 'X' (ଟ୍ୱିଟର) ରେ କରାଯାଇଥିବା ପୋଷ୍ଟ ସହ ଜଡ଼ିତ, ଯେଉଁଥିରେ ତାଙ୍କ ଉପରେ ଭାରତ ବିରୋଧୀ ମନୋଭାବ ପ୍ରସାର କରିବାର ଅଭିଯୋଗ ହୋଇଛି। ଅଦାଲତ ଏହି ମାମଲାକୁ ଗମ୍ଭୀର ବୋଲି ବିଚାର କରି ସମ୍ପୃକ୍ତ ପକ୍ଷମାନଙ୍କଠାରୁ ଜବାବ ମାଗିଛନ୍ତି।

'ରାଣା ଆୟୁବଙ୍କ ପୋଷ୍ଟ ଅପମାନଜନକ ଏବଂ ଉତ୍ତେଜନାମୂଳକ'

ଶୁଣାଣି ସମୟରେ ଅଦାଲତ ରାଣା ଆୟୁବଙ୍କ ଦ୍ୱାରା ହିନ୍ଦୁ ଦେବଦେବୀ ଏବଂ ବୀର ସାଭରକରଙ୍କୁ ନେଇ କରାଯାଇଥିବା କିଛି ପୋଷ୍ଟ ଉପରେ କଡ଼ା ଟିପ୍ପଣୀ କରିଛନ୍ତି। ନ୍ୟାୟାଳୟ କହିଛନ୍ତି ଯେ, ଏହି ସନ୍ଦେଶଗୁଡ଼ିକ ଅପମାନଜନକ, ଉତ୍ତେଜନାମୂଳକ ଏବଂ ସାମ୍ପ୍ରଦାୟିକ ପ୍ରକୃତିର ମନେ ହେଉଛି, ଯାହା ସମାଜରେ ଉତ୍ତେଜନା ସୃଷ୍ଟି କରିପାରେ। ଅଦାଲତ ଏହା ମଧ୍ୟ କହିଛନ୍ତି ଯେ ଏଭଳି ମାମଲାରେ ଉଚିତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଆବଶ୍ୟକ।

ଦିଲ୍ଲୀ ହାଇକୋର୍ଟ ଏହି ସମ୍ପର୍କରେ କେନ୍ଦ୍ର ସରକାର, ଦିଲ୍ଲୀ ପୋଲିସ ଏବଂ 'X' କୁ ନିର୍ଦ୍ଦେଶ ଦେଇଛନ୍ତି ଯେ ସେମାନେ ଏହି ପୋଷ୍ଟଗୁଡ଼ିକ ବିରୋଧରେ ଏପର୍ଯ୍ୟନ୍ତ କଣ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି ସେ ସମ୍ପର୍କରେ ସୂଚନା ଦିଅନ୍ତୁ। ଏହା ସହିତ ଆଗକୁ କଣ ପଦକ୍ଷେପ ନିଆଯାଇଛି ସେ ସମ୍ପର୍କରେ ମଧ୍ୟ ଜଣାନ୍ତୁ। ଅଦାଲତ ସ୍ପଷ୍ଟ କରିଛନ୍ତି ଯେ ଏହି ମାମଲାରେ ବିଳମ୍ବ ଅନୁଚିତ ଏବଂ ଏହାର ତୁରନ୍ତ ଶୁଣାଣି ହେବା ଜରୁରୀ।

ଭାରତରେ କେମିତି ମିଳେ ମୃତ୍ୟୁଦଣ୍ଡ,ଏପର୍ଯ୍ୟନ୍ତ କେତେ ଜଣ ଫାଶୀଖୁଣ୍ଟରେ ଝୁଲିଛନ୍ତି ?

ହାଇକୋର୍ଟ ରାଣା ଆୟୁବଙ୍କୁ ଜାରି କଲେ ନୋଟିସ୍

ନ୍ୟାୟାଳୟ ରାଣା ଆୟୁବଙ୍କୁ ମଧ୍ୟ ନୋଟିସ୍ ଜାରି କରିଛନ୍ତି ଏବଂ ଏହି ମାମଲାରେ ତାଙ୍କୁ ନିଜର ପକ୍ଷ ରଖିବାକୁ କହିଛନ୍ତି। ଅଦାଲତଙ୍କ କହିବା ଅନୁଯାୟୀ, ଏହି ମାମଲା ସର୍ବସାଧାରଣଙ୍କ ଭାବନା ଏବଂ ସାମାଜିକ ସୌହାର୍ଦ୍ଦ୍ୟ ସହ ଜଡ଼ିତ, ତେଣୁ ଏହାର ଗମ୍ଭୀରତାକୁ ଦୃଷ୍ଟିରେ ରଖି ସମସ୍ତ ପକ୍ଷଙ୍କ ଜବାବ ଠିକ୍ ସମୟରେ ଆସିବା ଜରୁରୀ।

୧୦ ଏପ୍ରିଲରେ ହେବ ପରବର୍ତ୍ତୀ ଶୁଣାଣି

ଏଥିସହିତ ଦିଲ୍ଲୀ ହାଇକୋର୍ଟ ଦିଲ୍ଲୀ ପୋଲିସ, କେନ୍ଦ୍ର ସରକାର ଏବଂ ସୋସିଆଲ ସାଇଟ୍ 'X' କୁ ନିର୍ଦ୍ଦେଶ ଦେଇଛନ୍ତି ଯେ ସେମାନେ ପରଦିନ ସୁଦ୍ଧା ନିଜର ଜବାବ ଦାଖଲ କରନ୍ତୁ। ଅଦାଲତ ଏହି ମାମଲାର ପରବର୍ତ୍ତୀ ଶୁଣାଣି ୧୦ ଏପ୍ରିଲରେ ସ୍ଥିର କରିଛନ୍ତି, ଯେଉଁଠାରେ ଏହି ସମଗ୍ର ଘଟଣା ଉପରେ ବିସ୍ତୃତ ଆଲୋଚନା କରାଯିବ।