ମୁମ୍ବାଇରେ CJP ଇନଷ୍ଟାଗ୍ରାମ୍ ଆକାଉଣ୍ଟରେ କଥିତ ଡିଜିଟାଲ୍ ହେରଫେର୍ ଏବଂ ଫର୍ଜି ଫଲୋଅର୍ସ ବଢ଼ାଇବା ନେଇ ଅଭିଯୋଗ ଦାୟର ହୋଇଛି। ଓକିଲ ଅରବିନ୍ଦ ସିଂହ ମୁମ୍ବାଇ ପୁଲିସ କମିଶନରଙ୍କ ନିକଟରେ ସାଇବର ଫୋରେନ୍ସିକ୍ ତଦନ୍ତ ଦାବି କରିଛନ୍ତି। ଏହାର ଉଦ୍ଦେଶ୍ୟ ହେଉଛି ସୋସିଆଲ ମିଡିଆରେ ଜନସାଧାରଣଙ୍କ ବିଶ୍ୱାସ ବଜାୟ ରଖିବା ଏବଂ ସତ୍ୟତା ସାମ୍ନାକୁ ଆଣିବା।

ସୋସିଆଲ ମିଡିଆରେ କଥିତ ଡିଜିଟାଲ୍ ହେରଫେର୍ ଏବଂ ଫର୍ଜି ଲୋକପ୍ରିୟତା ଦେଖାଇବା ଅଭିଯୋଗକୁ ନେଇ ମୁମ୍ବାଇରେ ଏକ ଅଭିଯୋଗ ଦାୟର କରାଯାଇଛି। ବମ୍ବେ ହାଇକୋର୍ଟର ଓକିଲ ଅରବିନ୍ଦ ସିଂହ ମୁମ୍ବାଇ ପୁଲିସ କମିଶନରଙ୍କୁ ଏକ ସ୍ମାରକପତ୍ର ପ୍ରଦାନ କରି ଇନଷ୍ଟାଗ୍ରାମ୍ଆ କାଉଣ୍ଟ Cockroach Janta Party (CJP) ର ଫଲୋଅର୍ସଙ୍କ ସଂଖ୍ୟାରେ କଥିତ କୃତ୍ରିମ ବୃଦ୍ଧି ଏବଂ ଡିଜିଟାଲ୍ ହେରଫେରର ସାଇବର ଫୋରେନ୍ସିକ୍ ତଦନ୍ତ କରିବାକୁ ଦାବି କରିଛନ୍ତି।

ଅଭିଯୋଗରେ ଦାବି କରାଯାଇଛି ଯେ, ସମ୍ପୃକ୍ତ ଇନଷ୍ଟାଗ୍ରାମ୍ ଆକାଉଣ୍ଟର ଫଲୋଅର୍ସଙ୍କ ସଂଖ୍ୟାରେ ବାରମ୍ବାର ଅସ୍ୱାଭାବିକ ଭାବେ ବୃଦ୍ଧି ଏବଂ ହ୍ରାସ ରେକର୍ଡ କରାଯାଇଛି। ଏହାର ସମର୍ଥନରେ ସ୍କ୍ରିନଶଟ୍, ସ୍କ୍ରିନ୍ ରେକର୍ଡିଂ ଏବଂ ଜଣେ ସାଇବର ବିଶେଷଜ୍ଞଙ୍କ ଦ୍ୱାରା ପ୍ରସ୍ତୁତ ଓପନ୍ ସୋର୍ସ ଅବଜରଭେସନ୍ (Observation) ରିପୋର୍ଟ ମଧ୍ୟ ପୁଲିସକୁ ହସ୍ତାନ୍ତର କରାଯାଇଛି।

ନିରପେକ୍ଷ ତଦନ୍ତ ଦାବି

ଅଭିଯୋଗକାରୀ ଅରବିନ୍ଦ ସିଂହଙ୍କ କହିବା କଥା ଯେ, ଯଦି କୌଣସି ସୋସିଆଲ ମିଡିଆ ଆକାଉଣ୍ଟର ଲୋକପ୍ରିୟତାକୁ କୃତ୍ରିମ ଭାବେ ବଢ଼ାଇ ଦେଖାଯାଏ, ତେବେ ଏହାଦ୍ୱାରା ସାଧାରଣ ଲୋକଙ୍କ ସହ ସମାଜସେବୀ ସୋନମ୍ ୱାଙ୍ଗଚୁକ୍ଙ୍କ ପରି ଜନପ୍ରିୟ ବ୍ୟକ୍ତିତ୍ୱ ମଧ୍ୟ ପ୍ରଭାବିତ କିମ୍ବା ବିଭ୍ରାନ୍ତ ହୋଇପାରନ୍ତି। ତେଣୁ ସମଗ୍ର ମାମଲାର ବୈଷୟିକ ଏବଂ ନିରପେକ୍ଷ ତଦନ୍ତ ଜରୁରୀ।

ସତ୍ୟତା ସାମ୍ନାକୁ ଆସିବା ଜରୁରୀ

ଅରବିନ୍ଦ ସିଂହ କହିଛନ୍ତି ଯେ, ତାଙ୍କର ଉଦ୍ଦେଶ୍ୟ କୌଣସି ବ୍ୟକ୍ତି କିମ୍ବା ସଂଗଠନ ଉପରେ ସିଧାସଳଖ ଅଭିଯୋଗ ଆଣିବା ନୁହେଁ, ବରଂ ଉପଲବ୍ଧ ଡିଜିଟାଲ୍ ପ୍ରମାଣ ଆଧାରରେ ସକ୍ଷମ ସାଇବର ଏଜେନ୍ସି ଦ୍ୱାରା ସମଗ୍ର ମାମଲାର ତଦନ୍ତ କରାଇ ସତ୍ୟତା ସାମ୍ନାକୁ ଆଣିବା, ଯାହାଫଳରେ ସୋସିଆଲ ମିଡିଆ ପ୍ଲାଟଫର୍ମରେ ସ୍ୱଚ୍ଛତା ଏବଂ ଜନସାଧାରଣଙ୍କ ବିଶ୍ୱାସ ବଜାୟ ରହିବ।

ଅଭିଯୋଗକାରୀଙ୍କ ଅନୁଯାୟୀ, ଏହି ମାମଲାରେ ମୁମ୍ବାଇ ପୁଲିସ ତାଙ୍କ ଲ' ଫାର୍ମକୁ ନୋଟିସ୍ ଜାରି କରି ବୟାନ ରେକର୍ଡ କରିବାକୁ ଡାକିଥିଲା। ପରବର୍ତ୍ତୀ ସମୟରେ ପୁଲିସ ଆଇନଗତ ଅଧିକାର କ୍ଷେତ୍ର (Jurisdiction) ସହ ଜଡ଼ିତ ପ୍ରକ୍ରିୟାର ଦୁହାଁଇ ଦେଇ ଅପେକ୍ଷା କରିବାକୁ କହିଥିଲା। ମାମଲାର ତଦନ୍ତ ଜାରି ରହିଛି ବୋଲି ସେ ଦାବି କରିଛନ୍ତି।

ସାଇବର ବିଶେଷଜ୍ଞ କ’ଣ କହିଲେ

ଏହି ମାମଲାରେ ସାଇବର ବିଶେଷଜ୍ଞ ପ୍ରମେନ୍ଦ୍ର ଶର୍ମାଙ୍କ କହିବା କଥା ଯେ, ସେ ଲ' ଫାର୍ମର ଅନୁରୋଧ କ୍ରମେ CJP ର ପବ୍ଲିକ୍ ଆଭେଲେବଲ୍ ଡାଟା ଏବଂ ଇନଷ୍ଟାଗ୍ରାମ୍ ଆକାଉଣ୍ଟର ଲାଇଭ୍ ଫଲୋଅର୍ସ କାଉଣ୍ଟର ଓପନ୍-ସୋର୍ସ ବିଶ୍ଳେଷଣ କରିଥିଲେ। ତାଙ୍କ ଅନୁଯାୟୀ, ତଦନ୍ତ ସମୟରେ ଫଲୋଅର୍ସଙ୍କ ସଂଖ୍ୟାରେ ଅସ୍ୱାଭାବିକ ଭାବେ ଦ୍ରୁତ ବୃଦ୍ଧି ଏବଂ ହ୍ରାସ ଦେଖିବାକୁ ମିଳିଥିଲା। ସାଧାରଣ ପରିସ୍ଥିତିରେ କୌଣସି ଆନ୍ଦୋଳନ କିମ୍ବା ଅଭିଯାନ ସହ ଯୋଡ଼ିହେଉଥିବା ଫଲୋଅର୍ସ ଏତେ ଶୀଘ୍ର ଅନ୍ଫଲୋ (Unfollow) କରନ୍ତି ନାହିଁ ବୋଲି ସେ କହିଛନ୍ତି। ସେ ଏହା ମଧ୍ୟ ଦାବି କରିଛନ୍ତି ଯେ ଇନଷ୍ଟାଗ୍ରାମ୍ ଆଲଗୋରିଦମ୍ ଏବଂ ସମ୍ଭାବ୍ୟ ଥାର୍ଡ-ପାର୍ଟି ସୋସିଆଲ ମିଡିଆ ମାର୍କେଟିଂ କାର୍ଯ୍ୟକଳାପର ମଧ୍ୟ ଅଧ୍ୟୟନ କରାଯାଇଥିଲା।

ଅଭିଯୋଗକାରୀଙ୍କ ଦାବି

ଏବେ ଅଭିଯୋଗକାରୀ ଦାବି କରିଛନ୍ତି ଯେ, ମୁମ୍ବାଇ ପୁଲିସ ସମଗ୍ର ମାମଲାର ଅନୁସନ୍ଧାନ କରୁ ଏବଂ ଯଦି କୌଣସି ପ୍ରକାରର କୃତ୍ରିମ ଫଲୋଅର୍ ବୃଦ୍ଧି ହୋଇଛି, ତେବେ ତାହା ପଛରେ କେଉଁ ଲୋକ ଅଛନ୍ତି, ତାହାର ଫଣ୍ଡିଂ (ଅର୍ଥ ଯୋଗାଣ) କିଏ କରୁଛି ଏବଂ କୌଣସି ଥାର୍ଡ-ପାର୍ଟି ମାଧ୍ୟମର ବ୍ୟବହାର କରାଯାଇଛି କି ନାହିଁ ତାହା ପଦାକୁ ଆଣୁ। ଏମାନଙ୍କ ପଛରେ କୌଣସି ବିଦେଶୀ ଶକ୍ତିର ହାତ ଅଛି କି ନାହିଁ ବୋଲି ମଧ୍ୟ ସେ ପ୍ରଶ୍ନ କରିଛନ୍ତି, କାରଣ ସେମାନଙ୍କ ମଞ୍ଚରେ ସନାତନ ଧର୍ମ ଏବଂ ଭଗବାନ ଶ୍ରୀରାମଙ୍କୁ ମଧ୍ୟ ଅପମାନିତ କରାଯାଉଛି।

ସୋନମ୍ ୱାଙ୍ଗଚୁକ୍ ଶେୟାର କରିଥିଲେ ପୋଷ୍ଟ

ଏହି ମାମଲାରେ ବଡ଼ କଥା ହେଉଛି, ସ୍ୱୟଂ ସୋନମ୍ ୱାଙ୍ଗଚୁକ୍ ୨ ଜୁନ୍ ୨୦୨୬ ରେ ନିଜ ଇନଷ୍ଟାଗ୍ରାମ୍ ରେ ଏକ ଭିଡିଓ ପୋଷ୍ଟ କରି ନିଜେ କହିଥିଲେ ଯେ, ସେ CJP ସହ ଏଥିପାଇଁ ଯୋଡ଼ିହେଉଛନ୍ତି କାରଣ CJP ର ସଂସ୍ଥାପକ ଅଭିଜିତ୍ ଦୀପକେଙ୍କୁ ସେ କହିଥିଲେ ଯେ CJP ପଛରେ କୌଣସି ବିଦେଶୀ ଶକ୍ତି ନାହିଁ ବୋଲି ସେ ପ୍ରମାଣ କରନ୍ତୁ। ଏବଂ ନିଜ ଇନଷ୍ଟାଗ୍ରାମ୍ ଆକାଉଣ୍ଟର ଇନ୍ସାଇଡର୍ସ ଦେଖାଇ ୱାଙ୍ଗଚୁକ୍ କହିଥିଲେ ଯେ ସେମାନଙ୍କର ୨୨ ନିୟୁତ (୨.୨ କୋଟି) ରୁ ଅଧିକ ଫଲୋଅର୍ସ ଅଛନ୍ତି।