ଛତିଶଗଡ଼ର ପୂର୍ବତନ ମୁଖ୍ୟମନ୍ତ୍ରୀ ଭୂପେଶ ବାଘେଲଙ୍କ ପାଇଁ ବଢିଲା ଅଡ଼ୁଆ। ସିବିଆଇ ୬ହଜାର କୋଟି ମହାଦେବ ବେଟିଂ ଆପ୍ ମାମଲାରେ ତାଙ୍କୁ ଅଭିଯୁକ୍ତ ଦର୍ଶାଇଛି। ତାଙ୍କ ବିରୁଦ୍ଧରେ ମାମଲା ମଧ୍ୟ ରୁଜୁ କରିଛି। ତାଙ୍କ ସହିତ ୨୧ ଜଣଙ୍କ ନାଁରେ ମାମଲା ରୁଜୁ କରିଛି ପୋଲିସ। ନିକଟରେ ସିବିଆଇର ଟିମ୍ ତାଙ୍କ ବାସଭବନରେ ଚଢାଉ କରି ତାଙ୍କ ବିରୁଦ୍ଧରେ ଆଇନ୍‌ଗତ କାର୍ଯ୍ୟାନୁଷ୍ଠାନ ଆରମ୍ଭ କରିଥିଲା।

ଗତ ସପ୍ତାହରେ ଏହି ଦୁର୍ନୀତି ସମ୍ବନ୍ଧୀୟ ମାମଲାରେ ସିବିଆଇ ଛତିଶଗଡ଼, ଭୋପାଳ, କୋଲକାତା ଓ ଦିଲ୍ଲୀ ସମେତ ୬୦ରୁ ଅଧିକ ସ୍ଥାନରେ ଚଢ଼ାଉ କରିଥିଲା। ପ୍ରଥମେ ଏହି ମାମଲା ଛତିଶଗଡ଼ର ଇକୋନୋମିକ୍ ଅଫେନ୍ସେସ୍ ୱିଙ୍ଗ୍ (ଇଓଡବ୍ଲୁ) ଦ୍ୱାରା ରୁଜୁ ହୋଇଥିଲା, ପରେ ରାଜ୍ୟ ସରକାର ଏହାକୁ ସିବିଆଇକୁ ହସ୍ତାନ୍ତର କରିଥିଲେ। ସିବିଆଇର ଏହି ଯାଂଚ ପ୍ରକ୍ରିୟା ଦ୍ୱାରା କେତେକ ରାଜନେତା, ସରକାରୀ ଅଧିକାରୀ, ପୋଲିସ ଅଫଇସରେ ଯେଉଁ ମାନେ ମହାଦେବ ଆପ୍ ସହ ଜଡ଼ିତ ସେମାନଙ୍କ ଘରେ ଚଢାଉ କରିଥିଲା । 

ମହାଦେବ ବୁକ୍ ଏକ ଅନଲାଇନ୍ ଗେମିଂ ପ୍ଲାଟଫର୍ମ ଯାହାକୁ ରବି ଉପ୍ପଲ ଓ ସୌରଭ ଚନ୍ଦ୍ରାକାର ମିଳିତ ଭାବେ ପରିଚାଳନା କରୁଥିଲେ। ଏହି ନେଟୱାର୍କରେ ଶୁଭମ ସୋନୀ ଓ ଅନିଲ କୁମାର ଅଗ୍ରୱାଲ ମଧ୍ୟ ସାମିଲ ଅଛନ୍ତି। ଏହି ଚାରି ଜଣ ବର୍ତ୍ତମାନ ଦୁବାଇରେ ରହୁଛନ୍ତି। କରୋନା ସମୟ ପରେ ଏହି ପ୍ଲାଟଫର୍ମ ଦ୍ରୁତ ଗତିରେ ଲୋକପ୍ରିୟ ହୋଇଥିଲା ଓ ଏହାକୁ ଅଫଲାଇନ୍ ଗେମିଂ ଡିଜିଟାଲ୍ ରୂପ ଭାବେ ଦେଖାଯାଉଥିଲା। ଏହା ବିଭିନ୍ନ ୱେବସାଇଟ୍ ଓ ସୋସିଆଲ ମିଡିଆ ପ୍ଲାଟଫର୍ମ ଯେମିତି ଫେସବୁକ୍, ହ୍ୱାଟ୍ସଆପ୍ ଓ ଟେଲିଗ୍ରାମରେ ସିକ୍ରେଟ୍ ଗ୍ରୁପ୍ ମାଧ୍ୟମରେ ଚାଲୁଥିଲା।

ତଦନ୍ତରୁ ଜଣାପଡ଼ିଛି ଯେ, ଏହି ଅବୈଧ ଗେମିଂ ନେଟୱାର୍କ ଚଳାଇବା ପାଇଁ ପ୍ରମୋଟରମାନେ ଅନେକ ସରକାରୀ ଅଧିକାରୀଙ୍କୁ ‘ପ୍ରୋଟେକ୍ସନ ମନି’ ଭାବେ ବଡ଼ ଅଙ୍କର ଟଙ୍କା ଦେଇଥିଲେ। ସିବିଆଇ ଚଢ଼ାଉ ସମୟରେ ଅନେକ ଗୁରୁତ୍ୱପୂର୍ଣ୍ଣ ଡିଜିଟାଲ୍ ଓ କାଗଜପତ୍ର ପ୍ରମାଣ ଜବତ ହୋଇଛି । ଯେଉଁଥିରେ ଆର୍ଥିକ ନେଣଦେଣର ରେକର୍ଡ ରହିଛି। ଏହି ମାମଲାର ତଦନ୍ତ ଇଡି ମଧ୍ୟ ଚଳାଇଛି।

ଅଧିକ ପଢନ୍ତୁ:୧.୫ ଲକ୍ଷ ଟଙ୍କା ସୁପାରି ଦେଇ ଭାବୀ ସ୍ୱାମୀଙ୍କୁ ହତ୍ୟା କରିବାକୁ ଯୋଜନା କଲେ ମହିଳା, ୫ଗିରଫ