ନୋଏଡା: କେରଳ ଭାରତର ଏକମାତ୍ର ଏମିତି ରାଜ୍ୟ  ଯେଉଁଠି ଚାରୋଟି ଅନ୍ତର୍ଜାତୀୟ ବିମାନ ବନ୍ଦର ରହିଛି । ଏହି କାରଣରୁ କେରଳରେ ଅନ୍ତର୍ଜାତୀୟ ଯାତ୍ରୀଙ୍କ ଚାହିଦା ଅଧିକ ରହିଛି । ଏହାର କାରଣ ରାଜ୍ୟର ପର୍ଯ୍ୟଟନ ଏବଂ ଉପସାଗରୀୟ ଦେଶରେ କେରଳ ଲୋକଙ୍କ ଜନସଂଖ୍ୟା ବଢିବା । ମାତ୍ର  ଜେୱର ବିମାନ ବନ୍ଦରର ଉଦଘାଟନ ପରେ ଉତ୍ତର ପ୍ରଦେଶ କେରଳକୁ ପଛରେ ପକାଇ ଦେଇଛି । ଏବେ ଉତ୍ତର ପ୍ରଦେଶରେ ଦେଶରେ ସବୁଠୁ ଅଧିକ ଅନ୍ତର୍ଜାତୀୟ ବିମାନ ବନ୍ଦର ହୋଇଛି । 

ଉତ୍ତର ପ୍ରଦେଶରେ, ଲକ୍ଷ୍ନୌରେ ଚୌଧୁରୀ ଚରଣ ସିଂହ ବିମାନବନ୍ଦର ଅଛି। ବାରାଣସୀରେ ଲାଲ ବାହାଦୁର ଶାସ୍ତ୍ରୀ ଅନ୍ତର୍ଜାତୀୟ ବିମାନବନ୍ଦର, କୁଶୀନଗରରେ କୁଶୀନଗର ଅନ୍ତର୍ଜାତୀୟ ବିମାନବନ୍ଦର ଏବଂ ଅଯୋଧ୍ୟାରେ ମହର୍ଷି ବାଲ୍ମିକି ଅନ୍ତର୍ଜାତୀୟ ବିମାନବନ୍ଦର ଅଛି। ଆଜି ଜେୱର ଅନ୍ତର୍ଜାତୀୟ ବିମାନବନ୍ଦରର ପ୍ରଥମ ପର୍ଯ୍ୟାୟ ଉଦଘାଟନ ସହିତ, ରାଜ୍ୟରେ ଏବେ ପାଞ୍ଚଟି ଅନ୍ତର୍ଜାତୀୟ ବିମାନବନ୍ଦର ଅଛି।

ଜେୱର ବିମାନବନ୍ଦରର ବିଶେଷତ୍ୱ କ’ଣ ?

ଉତ୍ତର ପ୍ରଦେଶର ଉପମୁଖ୍ୟମନ୍ତ୍ରୀ ବ୍ରଜେଶ ପାଠକ କହିଛନ୍ତି ଯେ ଜେୱରରେ ନିର୍ମିତ ହେବାକୁ ଥିବା ନୋଏଡା ଅନ୍ତର୍ଜାତୀୟ ବିମାନବନ୍ଦର ଏସିଆର ସର୍ବବୃହତ ବିମାନବନ୍ଦର ହେବ। ପ୍ରଧାନମନ୍ତ୍ରୀ ମୋଦୀ ଆଜି ଏଠାରେ ପ୍ରଥମ ପର‌୍ୟ୍ୟାୟର ଉଦଘାଟନ କରିଛନ୍ତି। ଏହାର ମୂଲ୍ୟ ୧୧,୨୮୨ କୋଟି। ଏହି ବିଶାଳ ପ୍ରକଳ୍ପର ଆନୁମାନିକ ମୂଲ୍ୟ ୨୯,୫୬୦ କୋଟି। ଜେୱରକୁ ଉତ୍ତର ଭାରତ ପାଇଁ ଏକ ପ୍ରମୁଖ ବିମାନ ଚଳାଚଳ କେନ୍ଦ୍ର କରିବା ଲକ୍ଷ୍ୟ।

କେରଳରେ କେଉଁ ଚାରୋଟି ଅନ୍ତର୍ଜାତୀୟ ବିମାନବନ୍ଦର ଅଛି ?

କେରଳର ସବୁଠାରୁ ପୁରୁଣା ଅନ୍ତର୍ଜାତୀୟ ବିମାନବନ୍ଦର ହେଉଛି ତ୍ରିଭେନ୍ଦ୍ରମ ଅନ୍ତର୍ଜାତୀୟ ବିମାନବନ୍ଦର, ଯାହା ୧୯୩୨ ମସିହାରେ ନିର୍ମିତ ହୋଇଥିଲା। କୋଚିର କୋଚିନ୍ ଅନ୍ତର୍ଜାତୀୟ ବିମାନବନ୍ଦର ହେଉଛି କେରଳର ସବୁଠାରୁ ବ୍ୟସ୍ତ ବିମାନବନ୍ଦର। ଏହାର ଅନନ୍ୟ ବୈଶିଷ୍ଟ୍ୟ ହେଉଛି ଏହା ବିଶ୍ୱର ପ୍ରଥମ ସମ୍ପୂର୍ଣ୍ଣ ସୌରଚାଳିତ ବିମାନବନ୍ଦର, ଯାହା ୧୯୯୯ ମସିହାରେ ଉଦ୍ଘାଟିତ ହୋଇଥିଲା।

କୋଝିକୋଡର କାଲିକଟ ଅନ୍ତର୍ଜାତୀୟ ବିମାନବନ୍ଦର ମାଲାବାର ଅଞ୍ଚଳ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ, ଯେଉଁଠାରେ ଉପସାଗରୀୟ ଦେଶଗୁଡ଼ିକରେ ବହୁ ସଂଖ୍ୟକ ପ୍ରବାସୀ ବାସ କରନ୍ତି। ୨୦୧୮ ମସିହାରେ ନିର୍ମିତ କନ୍ନୁର ଅନ୍ତର୍ଜାତୀୟ ବିମାନବନ୍ଦର ହେଉଛି କେରଳର ନୂତନତମ ବିମାନ ଚଳାଚଳ କେନ୍ଦ୍ର।