ଇସଲାମାବାଦ: ଭାରତୀୟ ମାଲବାହୀ ଜାହାଜ ବୁଡ଼ିଯିବା ପରେ ଏଥିରେ ଥିବା କର୍ମଚାରୀଙ୍କ ଜୀବନ ବଞ୍ଚାଇଛି ପାକିସ୍ତାନ। ପାକିସ୍ତାନର ସାମୁଦ୍ରିକ ସୁରକ୍ଷା ଏଜେନ୍ସି (ପିଏମଏସଏ) ବୁଧବାର ସାମୁଦ୍ରିକ ଉଦ୍ଧାର ଅଭିଯାନକୁ ସଫଳତାର ସହ ଶେଷ କରିଛି। ଏହା ଜରିଆରେ ଭାରତୀୟ ମାଲବାହୀ ଜାହାଜ ଏମଏସଭି ଏଏଲ ପିରାନିପିର ବୁଡ଼ିଯିବା ପରେ ଫସି ରହିଥିବା ୧୨ ଜଣଙ୍କୁ ଉଦ୍ଧାର କରାଯାଇଛି। ଏକ ବିବୃତିଜାରି କରି ପିଏମଏସଏ କହିଛି ଯେ ସାମୁଦ୍ରିକ ଉଦ୍ଧାର ସମନ୍ୱୟ କେନ୍ଦ୍ର (ଏମଆରସିସି)କୁ ଭାରତର ମୁମ୍ବାଇ ଏମଆରସିସିରୁ ଏକ ଇମେଲ୍ ମିଳିଛି। ବୁଡ଼ି ଯାଇଥିବା ଜାହାଜରୁ ବଞ୍ଚିଥିବା ଲୋକଙ୍କୁ ଠାବ କରି ଉଦ୍ଧାର କରିବା ପାଇଁ ସହାୟତା ପାଇଁ ଅନୁରୋଧ କରାଯାଇଛି।

ବିବୃତି ଅନୁଯାୟୀ, ଜାହାଜଟି ପାକିସ୍ତାନର ସ୍ୱତନ୍ତ୍ର ଅର୍ଥନୈତିକ ଅଞ୍ଚଳରେ ବୁଡ଼ିଯାଇଥିଲା ଏବଂ ଏହାର ୧୨ ଜଣ କ୍ରୁ ମେମ୍ବର ଅସୁବିଧାରେ ପଡ଼ିଥିଲେ। ଏହାର ଜବାବରେ ପାକିସ୍ତାନ ମେରିଟାଇମ୍ ଏଜେନ୍ସି ବିଭିନ୍ନ ଏଜେନ୍ସି ସହ ମିଶି ଉଦ୍ଧାର କାର୍ଯ୍ୟ ଆରମ୍ଭ କରିଥିଲା। ସଙ୍ଗେ ସଙ୍ଗେ ଏକ ପିଏମଏସଏ ଜାହାଜକୁ ବଞ୍ଚିଥିବା ଲୋକଙ୍କୁ ଖୋଜିବା ପାଇଁ ଦାୟିତ୍ୱ ଦିଆଯାଇଥିଲା। ନିକଟବର୍ତ୍ତୀ ବାଣିଜ୍ୟିକ ଜାହାଜଗୁଡ଼ିକୁ ସତର୍କ କରାଯାଇ ଉଦ୍ଧାର କାର୍ଯ୍ୟରେ ସହଯୋଗ କରିବାକୁ ଅନୁରୋଧ କରାଯାଇଥିଲା।

ମିଳିତ ସାମୁଦ୍ରିକ ସୂଚନା ସମନ୍ୱୟ କେନ୍ଦ୍ର ସହାୟତା ପ୍ରଦାନ କରିବା ପରେ ଉଭୟ ପାକିସ୍ତାନ ନୌସେନା ଏବଂ ପିଏମଏସଏ ଜାହାଜଗୁଡ଼ିକୁ ହାଇ ଆଲର୍ଟରେ ରଖିଥିଲେ। ତୁରନ୍ତ ନିକଟସ୍ଥ ନୌସେନା ଜାହାଜକୁ ଘଟଣାସ୍ଥଳକୁ ପଠାଯାଇଥିଲା। ଏହାବ୍ୟତୀତ ବଞ୍ଚିଥିବା ଲୋକଙ୍କୁ ଫେରାଇ ଆଣିବା ପାଇଁ ସ୍ୱତନ୍ତ୍ର ଅର୍ଥନୈତିକ ଜୋନରେ ଭାରତୀୟ ତଟରକ୍ଷୀ ବାହିନୀର ଜାହାଜର ପ୍ରବେଶ ପାଇଁ ଆବଶ୍ୟକ ବ୍ୟବସ୍ଥା କରାଯାଇଥିଲା।

ତ୍ୱରିତ ପ୍ରତିକ୍ରିୟା ଏବଂ ପ୍ରଭାବଶାଳୀ ସମନ୍ୱୟ ଫଳରେ ଭାରତୀୟ ମାଲବାହୀ ଜାହାଜର ସମସ୍ତ ୧୨ ଜଣଙ୍କୁ ସଫଳତାର ସହ ଉଦ୍ଧାର କରାଯାଇଥିଲା, ଯାହା ଅନ୍ତର୍ଜାତୀୟ ଏସଏଆର ଦାୟିତ୍ୱକୁ ବଜାୟ ରଖିବା ଏବଂ ଆଞ୍ଚଳିକ ସହଯୋଗକୁ ପ୍ରୋତ୍ସାହିତ କରିବା ପାଇଁ ପିଏମଏସଏର ପ୍ରତିବଦ୍ଧତାକୁ ଦର୍ଶାଉଛି।  

ଅଧିକ ପଢ଼ନ୍ତୁ: ଫଡନାଭିସଙ୍କ ଶପଥ ଗ୍ରହଣ ଉତ୍ସବରେ କେଉଁମାନେ ହେବେ ଅତିଥି