ନୂଆଦିଲ୍ଲୀ:ପଡ଼ୋଶୀ ଦେଶ ନେପାଳରେ ଆସିଥିବା ଭୟଙ୍କର ବନ୍ୟା ତଥା ପ୍ରାକୃତିକ ବିପର୍ଯ୍ୟୟ ପରେ ଭାରତ ସରକାର ସହାୟତାର ହାତ ବଢ଼ାଇଛନ୍ତି। ବନ୍ୟା ଓ ଭୂସ୍ଖଳନରେ ପ୍ରାଣ ହରାଇଥିବା ବ୍ୟକ୍ତିମାନଙ୍କର ଶବ ଚିହ୍ନଟ ପାଇଁ ଡିଏନ୍ଏ ପରୀକ୍ଷା ନିମନ୍ତେ ଫୋରେନସିକ୍ ବିଶେଷଜ୍ଞ ଦଳ ଏବଂ ସୁରଙ୍ଗରେ ଫସି ରହିଥିବା ଲୋକଙ୍କୁ ଉଦ୍ଧାର କରିବା ପାଇଁ ଏକ ସ୍ୱତନ୍ତ୍ର ଟନେଲ୍ ରେସ୍କୁ ଟିମ୍କୁ ନେପାଳ ପଠାଯାଇଛି।
ବୈଦେଶିକ ମନ୍ତ୍ରଣାଳୟର ସୂଚନା ଅନୁଯାୟୀ, ଶନିବାର ନେପାଳର ରସୁବା ସ୍ଥିତ ଏକ ଜଳବିଦ୍ୟୁତ୍ ପ୍ରକଳ୍ପରୁ ୪ ଜଣ ଭାରତୀୟ ନାଗରିକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି ଏବଂ ସେମାନେ ଶୀଘ୍ର କାଠମାଣ୍ଡୁ ପହଞ୍ଚିବେ। ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସ୍ୱାଲ ଏକ ସାମ୍ବାଦିକ ସମ୍ମିଳନୀରେ ଉଦ୍ଧାର କାର୍ଯ୍ୟର ସାମ୍ପ୍ରତିକ ସ୍ଥିତି ସମ୍ପର୍କରେ ସୂଚନା ଦେଇ କହିଛନ୍ତି ଯେ ଭାରତରୁ ପଠାଯାଇଥିବା ୬ଟି ଫୋରେନସିକ୍ ଏକ୍ସପର୍ଟ ଟିମ୍ ଶନିବାର କାଠମାଣ୍ଡୁରେ ପହଞ୍ଚି ସାରିଛନ୍ତି।
ଏପର୍ଯ୍ୟନ୍ତ ମୋଟ ୮୮ ଜଣ ଭାରତୀୟ ନାଗରିକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିବା ବେଳେ, ଚୀନ୍ ସୀମା ଦେଇ ୧୨୦ ଜଣ ଭାରତୀୟ ନେପାଳ ସୀମାରେ ପ୍ରବେଶ କରିଛନ୍ତି। ତେବେ ଦୁର୍ଭାଗ୍ୟବଶତଃ ଏବେ ବି ୨୮୭ ଜଣ ଭାରତୀୟ ନାଗରିକ ଏବଂ ଭାରତୀୟ ମୂଳର ୧୨୮ ଜଣ ଅନ୍ୟ ବ୍ୟକ୍ତି ନିଖୋଜ ରହିଛନ୍ତି ବୋଲି ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। ସୁରଙ୍ଗ ମଧ୍ୟରେ ଫସି ରହିଥିବା ବ୍ୟକ୍ତିମାନଙ୍କୁ ବାହାର କରିବା ପାଇଁ ଆବଶ୍ୟକୀୟ ଯନ୍ତ୍ରପାତି ସହିତ ଏକ ସ୍ୱତନ୍ତ୍ର ବୈଷୟିକ ଦଳ ପ୍ରଭାବିତ ଅଞ୍ଚଳରେ ନିଜର କାମ ଆରମ୍ଭ କରିଦେଇଛି।
ଅନ୍ୟପଟେ ନେପାଳ ପୁଲିସର ସରକାରୀ ରିପୋର୍ଟ ଅନୁଯାୟୀ, ଗତ ବୁଧବାରଠାରୁ ହଠାତ୍ ଆସିଥିବା ବନ୍ୟାରେ ମୃତ୍ୟୁସଂଖ୍ୟା ବୃଦ୍ଧି ପାଇ ୬୬୯ରେ ପହଞ୍ଚିଛି ଏବଂ ୨,୪୦୦ରୁ ଅଧିକ ଜଣ ଏବେ ବି ନିଖୋଜ ଅଛନ୍ତି। ନେପାଳର ବୈଦେଶିକ ମନ୍ତ୍ରୀ ଶିଶିର ଖନାଲ କହିଛନ୍ତି ଯେ ଜରୁରୀକାଳୀନ ଚିକିତ୍ସା ସେବା, ଖାଦ୍ୟ, ବିଶୁଦ୍ଧ ପାଣି ଏବଂ ଅସ୍ଥାୟୀ ଆଶ୍ରୟସ୍ଥଳୀ ଯୋଗାଇବା ଏବେ ସରକାରଙ୍କ ପ୍ରାଥମିକତା ରହିଛି ଏବଂ ନେପାଳ ସରକାର ଅନ୍ତର୍ଜାତୀୟ ସମାଜ ସହ ଲଗାତାର ଯୋଗାଯୋଗରେ ଅଛନ୍ତି।