ନୂଆଦିଲ୍ଲୀ:ପଶ୍ଚିମ ଏସିଆରେ କ୍ରମାଗତ ଭାବେ ଜାରି ରହିଥିବା ଉତ୍ତେଜନା ଏବଂ ଆମେରିକା-ଇରାନ ମଧ୍ୟରେ ସମ୍ଭାବ୍ୟ ଯୁଦ୍ଧ ପରିସ୍ଥିତିକୁ ଦୃଷ୍ଟିରେ ରଖି ଭାରତ ସରକାର ଏକ ବଡ଼ ଏବଂ ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରିଛନ୍ତି। ଦେଶରେ ଶକ୍ତି ସୁରକ୍ଷା ଏବଂ ଏଲପିଜି ଯୋଗାଣକୁ ନିରନ୍ତର ରଖିବା ପାଇଁ ଭାରତ ଏବେ ଆଲଜେରିଆ ସହିତ ହାତ ମିଳାଇଛି। ପାରମ୍ପରିକ ପଶ୍ଚିମ ଏସିଆ ବଜାର ଉପରେ ନିର୍ଭରଶୀଳତା କମାଇବା ପାଇଁ ଏହାକୁ ଏକ ବଡ଼ ରଣନୀତି ଭାବେ ବିଚାର କରାଯାଉଛି।

ବର୍ତ୍ତମାନ ସମୟରେ ପଶ୍ଚିମ ଏସିଆରେ ଦେଖାଦେଇଥିବା ଅସ୍ଥିରତା କାରଣରୁ ବିଶ୍ୱ ବଜାରରେ ଅଶୋଧିତ ତୈଳ ଏବଂ ଗ୍ୟାସ୍ ଯୋଗାଣ ପ୍ରଭାବିତ ହେବାର ଆଶଙ୍କା ଦେଖାଦେଇଛି। ଏହି ଅଞ୍ଚଳରେ ଯଦି ଆମେରିକା ଏବଂ ଇରାନ ମଧ୍ୟରେ ଯୁଦ୍ଧ ପରିସ୍ଥିତି ଅଧିକ ଜଟିଳ ହୁଏ, ତେବେ ଭାରତ ଭଳି ବିକାଶଶୀଳ ଦେଶଗୁଡ଼ିକ ପାଇଁ ଏଲପିଜି ଏବଂ ଜାଳେଣି ସଂଗ୍ରହ କରିବା ଏକ ବଡ଼ ଆହ୍ୱାନ ହୋଇପାରେ। ଏହି ସମ୍ଭାବ୍ୟ ସଙ୍କଟର ମୁକାବିଲା କରିବା ପାଇଁ ଭାରତୀୟ କର୍ତ୍ତୃପକ୍ଷ ଆଗୁଆ ପଦକ୍ଷେପ ସ୍ୱରୂପ ବିକଳ୍ପ ବଜାର ଖୋଜିବାରେ ଲାଗିଛନ୍ତି।

ଆଲଜେରିଆ ସହିତ ନୂତନ ବାଣିଜ୍ୟ ଚୁକ୍ତି

ଏହି ସଙ୍କଟର ସ୍ଥାୟୀ ସମଧାନ ପାଇଁ ଭାରତ ଆଫ୍ରିକୀୟ ଦେଶ ଆଲଜେରିଆରୁ ଏଲପିଜି ଆମାଦାନୀ କରିବାକୁ ନିଷ୍ପତ୍ତି ନେଇଛି। ଆଲଜେରିଆ ଏହାର ବିଶ୍ୱସ୍ତ ଶକ୍ତି ଯୋଗାଣ ପାଇଁ ଜଣାଶୁଣା ଏବଂ ଏଠାରୁ ନିୟମିତ ଭାବେ ଗ୍ୟାସ୍ ପାଇବା ଦ୍ୱାରା ଭାରତର ଘରୋଇ ଏବଂ ବାଣିଜ୍ୟିକ ଆବଶ୍ୟକତା ସହଜରେ ପୂରଣ ହୋଇପାରିବ। ଏହି ବାଣିଜ୍ୟିକ ବୁଝାମଣା ଫଳରେ ଭାରତର ଶକ୍ତି କ୍ଷେତ୍ରକୁ ଏକ ବଡ଼ ମଜବୁତ ଆଧାର ମିଳିବ ବୋଲି ଆଶା କରାଯାଉଛି।

ସାଧାରଣ ଜନତାଙ୍କ ପାଇଁ ଆଶ୍ୱସ୍ତିର ଖବର

ଅନ୍ତର୍ଜାତୀୟ ବଜାରରେ ମୂଲ୍ୟ ବୃଦ୍ଧି ଏବଂ ଯୋଗାଣରେ ବାଧା ସୃଷ୍ଟି ହେଲେ ମଧ୍ୟ ଏହି ନୂତନ ବ୍ୟବସ୍ଥା ଯୋଗୁଁ ଦେଶ ଭିତରେ ରୋଷେଇ ଗ୍ୟାସ୍ ଅଭାବ ଦେଖାଦେବ ନାହିଁ। ସରକାରଙ୍କ ଏଭଳି ଦୂରଦୃଷ୍ଟିସମ୍ପନ୍ନ ନୀତି ଯୋଗୁଁ ସାଧାରଣ ଗ୍ରାହକମାନେ ଆଗାମୀ ଦିନରେ ଏଲପିଜି ସଙ୍କଟରୁ ବର୍ତ୍ତି ରହିପାରିବେ ଏବଂ ନିରବଚ୍ଛିନ୍ନ ଭାବେ ଗ୍ୟାସ୍ ସେବା ପାଇପାରିବେ।