କୋଲକାତା: ପଶ୍ଚିମବଙ୍ଗର ସିଆଲଦାସ୍ଥିତ ସରକାରୀ ଇଏସ୍ଆଇ ହସ୍ପିଟାଲରେ ଶୁକ୍ରବାର ସକାଳେ ଭୟାବହ ଅଗ୍ନିକାଣ୍ଡ ଘଟିଛି। ହସ୍ପିଟାଲର ଦ୍ବିତୀୟ ମହଲାରେ ଥିବା ସର୍ଜିକାଲ ବିଭାଗରେ ଭୋର ପ୍ରାୟ ୫ଟାରୁ ନିଆଁ ଲାଗିବା ପରେ ୧୦ଟି ଦମକଳ ଗାଡ଼ି ପହଞ୍ଚି ବହୁ ଚେଷ୍ଟା ପରେ ସକାଳ ୭ଟା ୪୦ରେ ନିଆଁକୁ ଆୟତ୍ତ କରାଯାଇଥିଲା।

ଏହି ଅଗ୍ନିକାଣ୍ଡରେ ଧୂଆଁ ଯୋଗୁଁ ନିଶ୍ୱାସ ନେବାରେ ଅସୁବିଧା ହେବାରୁ ଜଣେ ରୋଗୀଙ୍କ ମୃତ୍ୟୁ ହୋଇଥିବା ସୂଚନା ମିଳିଛି। ୫୦ ଜଣ ରୋଗୀଙ୍କୁ ଅନ୍ୟତ୍ର ସ୍ଥାନାନ୍ତରିତ କରାଯାଇଛି। ତେବେ ରୋଗୀ ଜଣକ କର୍କଟ ରୋଗରେ ପୀଡ଼ିତ ଥିବା ହସ୍ପିଟାଲ କର୍ତ୍ତୃପକ୍ଷ କହିଛନ୍ତି। ଏହି ଘଟଣାରେ ଏପର୍ଯ୍ୟନ୍ତ କେହି ମୃତାହତ ହୋଇନଥିବା ଜଣାପଡିଛି।

ରିପୋର୍ଟ ଅନୁଯାୟୀ, ଘଟଣା ସମୟରେ ପ୍ରାୟ ୭୦ ଜଣ ରୋଗୀ ହସ୍ପିଟାଲରେ ଭର୍ତ୍ତି ହୋଇଥିଲେ। ଅଧିକାଂଶ ରୋଗୀଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। କିଛି ରୋଗୀଙ୍କୁ ମାଣିକତାଲା ଇଏସଆଇ ହସ୍ପିଟାଲକୁ ସ୍ଥାନାନ୍ତର କରାଯାଇଛି।

ଅଗ୍ନିକାଣ୍ଡ ଖବର ପାଇ ରାଜ୍ୟ ଅଗ୍ନିଶମ ସେବା ମନ୍ତ୍ରୀ ସୁଜିତ ବୋଷ ମଧ୍ୟ ଡାକ୍ତରଖାନାରେ ପହଞ୍ଚିଥିଲେ। ଅଗ୍ନିଶମ ମନ୍ତ୍ରୀ କହିଛନ୍ତି ଯେ ଅଗ୍ନିଶମ ବାହିନୀର କର୍ମଚାରୀମାନେ ସାହସିକତାର ସହ କାର୍ଯ୍ୟ କରି ନିଆଁକୁ ଆୟତ୍ତ କରିଥିଲେ। ଦୁର୍ଗାପୂଜା ଯୋଗୁଁ ଅନେକ ରୋଗୀ ଛୁଟି ନେଇ ଘରକୁ ଯାଇଥିଲେ, ଯାହା ଫଳରେ ବଡ଼ ଧରଣର କ୍ଷୟକ୍ଷତି କିମ୍ବା ଜୀବନହାନିକୁ ଏଡ଼ାଇ ଦିଆଯାଇଥିଲା। ଅଗ୍ନିକାଣ୍ଡର କାରଣ ଜଣାପଡ଼ିନାହିଁ। ଅଗ୍ନିକାଣ୍ଡର କାରଣ ଅନୁସନ୍ଧାନ କରାଯାଉଛି। ଶୁକ୍ରବାର ଆଉଟଡୋର ବିଭାଗ ବନ୍ଦ ରହିବ ବୋଲି ହସ୍ପିଟାଲ ପ୍ରଶାସନ ପକ୍ଷରୁ ଘୋଷଣା କରାଯାଇଛି। ଅଗ୍ନିକାଣ୍ଡ ଯୋଗୁଁ ହସ୍ପିଟାଲରେ ଉତ୍ତେଜନା ଓ ଆତଙ୍କ ଖେଳିଯାଇଥିଲା।

ଅଧିକ ପଢ଼ନ୍ତୁ: ଓମାର ଅବଦୁଲ୍ଲାଙ୍କ ସରକାରରେ କାହାକୁ ମିଳିଲା କେଉଁ ବିଭାଗ ଜାଣନ୍ତୁ