ନୂଆଦିଲ୍ଲୀ: ନାଲସାର୍ ବିଶ୍ୱବିଦ୍ୟାଳୟର ଆଇନ ଛାତ୍ରଛାତ୍ରୀ ଏବଂ ବାର୍ କାଉନସିଲ୍ ଅଫ୍ ଇଣ୍ଡିଆ (BCI) ମଧ୍ୟରେ ଚାଲିଥିବା ବିବାଦକୁ ନେଇ ସୁପ୍ରିମକୋର୍ଟ ଏକ ବଡ଼ ଏବଂ ସ୍ପଷ୍ଟ ନିର୍ଦ୍ଦେଶ ଦେଇଛନ୍ତି। ଭାରତର ପ୍ରଧାନ ବିଚାରପତି ସୂର୍ଯ୍ୟକାନ୍ତ ସ୍ପଷ୍ଟ ଭାବେ କହିଛନ୍ତି ଯେ, ଯଦି ଛାତ୍ରମାନେ ତାଙ୍କର ପ୍ରତିବାଦ କରୁଛନ୍ତି, ତେବେ ଏଥିରେ ବିସିଆଇ କିମ୍ବା ଅନ୍ୟ କାହାରିକୁ ହସ୍ତକ୍ଷେପ କରିବାର କୌଣସି ଆବଶ୍ୟକତା ନାହିଁ। କୌଣସି ବି ରାଜ୍ୟ ବାର୍ କାଉନସିଲ୍ ଛାତ୍ରମାନଙ୍କର ଓକିଲାତି ପଞ୍ଜୀକରଣ ଅଟକାଇବେ ନାହିଁ ବୋଲି ସେ କଡ଼ା ନିର୍ଦ୍ଦେଶ ଦେଇଛନ୍ତି।

ଶୁଣାଣି ସମୟରେ, ବିସିଆଇ ପକ୍ଷରୁ ଜାରି କରାଯାଇଥିବା ସେହି ବିବାଦୀୟ ଆଦେଶର ପ୍ରସଙ୍ଗ ସୁପ୍ରିମକୋର୍ଟରେ ଉପସ୍ଥାପନ କରାଯାଇଥିଲା। ତେବେ ବାର୍ କାଉନସିଲ୍ର ଓକିଲ କୋର୍ଟକୁ ଅବଗତ କରାଇଥିଲେ ଯେ ସେହି ନିର୍ଦ୍ଦେଶକୁ ଗତକାଲି ହିଁ ପ୍ରତ୍ୟାହାର କରି ନିଆଯାଇଛି।

"ଯୁବପିଢ଼ିଙ୍କ କ୍ୟାରିୟର ସହ ଖେଳାଯିବା ଉଚିତ୍ ନାହିଁ"

ଛାତ୍ରମାନଙ୍କ ଉପରେ କୌଣସି ପ୍ରକାରର କାର୍ଯ୍ୟାନୁଷ୍ଠାନକୁ ବିରୋଧ କରି ସିଜେଆଇ ସୂର୍ଯ୍ୟକାନ୍ତ କହିଛନ୍ତି ଯେ ଯେତେବେଳେ ସେ ନିଜେ ଜଣେ ଛାତ୍ର ଥିଲେ, ସେତେବେଳେ ବିଭିନ୍ନ ପ୍ରସଙ୍ଗରେ ବେଶ୍ ସକ୍ରିୟ ରହୁଥିଲେ। ନିଜର ମତ ପ୍ରକାଶ କରିବା କିମ୍ବା ପ୍ରତିବାଦ କରିବା ପାଇଁ କୌଣସି ଛାତ୍ରଙ୍କ ବିରୁଦ୍ଧରେ ଦମନମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ୍ ନାହିଁ।

ସେ ଆହୁରି ମଧ୍ୟ କହିଛନ୍ତି, "ଯଦି କୌଣସି କମ୍ ବୟସର ଯୁବକ ଆମ ବିରୋଧରେ ମଧ୍ୟ କିଛି କହୁଛନ୍ତି, ତେବେ ତାହାକୁ କହିବାକୁ ଦିଅନ୍ତୁ।" ଛାତ୍ରମାନଙ୍କ ଭବିଷ୍ୟତକୁ ନେଇ ଚିନ୍ତା ପ୍ରକଟ କରି ସିଜେଆଇ କହିଛନ୍ତି ଯେ ସେମାନେ ଶୀଘ୍ର ଲାଇସେନ୍ସ ପାଇ ସୁପ୍ରିମକୋର୍ଟରେ ଆସି ଓକିଲାତି କରନ୍ତୁ ବୋଲି ସେ ଚାହାଁନ୍ତି। ଆହୁରି ମଧ୍ୟ ସେମାନଙ୍କୁ ଆଇନଗତ ସେବାରେ କାମ କରିବାର ସୁଯୋଗ ଦିଆଯିବ। ଯେଉଁମାନେ ଏହି ଯୁବପିଢ଼ିଙ୍କ କ୍ୟାରିୟରକୁ ନଷ୍ଟ କରିବାକୁ ଚାହୁଁଛନ୍ତି, ସେମାନଙ୍କ ପାଇଁ ଏହା ହିଁ ସବୁଠୁ ବଡ଼ ଜବାବ ହେବ ବୋଲି ସର୍ବୋଚ୍ଚ ଅଦାଲତ ମତ ଦେଇଛନ୍ତି।