ଇନ୍ଦୋର: ମଧ୍ୟପ୍ରଦେଶର ଇନ୍ଦୋର ଜିଲ୍ଲାରେ ସୋମବାର ରାତିରେ ଏକ ଯାତ୍ରୀବାହୀ ବସ୍ ଖାଳରେ ଖସି ପଡ଼ିବା ଫଳରେ ଦୁଇ ମହିଳାଙ୍କ ସମେତ ତିନି ଜଣଙ୍କର ମୃତ୍ୟୁ ଏବଂ ୩୮ ଜଣ ଆହତ ହୋଇଥିବା ଜଣେ ପୋଲିସ ଅଧିକାରୀ କହିଛନ୍ତି।

ପୋଲିସ ଅଧୀକ୍ଷକ (ଗ୍ରାମୀଣ) ୟାଙ୍ଗଚେନ୍ ଡୋଲକର ଭୂତିଆ ପିଟିଆଇକୁ କହିଛନ୍ତି ଯେ ସିମରୋଲ୍ ପୋଲିସ ଷ୍ଟେସନ ଅଞ୍ଚଳର ବେରୁ ଘାଟରେ ଏହି ଦୁର୍ଘଟଣା ଘଟିଛି। ସେ କହିଛନ୍ତି, ଦୁର୍ଘଟଣାରେ ତିନି ଜଣଙ୍କର ମୃତ୍ୟୁ ହୋଇଛି। ସେମାନେ ବସ୍ ର ଆଗ ସିଟରେ ବସିଥିଲେ। ମୃତକମାନଙ୍କୁ ଚିହ୍ନଟ କରାଯାଉଛି। 

ଭୂତିଆ କହିଛନ୍ତି ଯେ ବସ୍ ରେ ଫସି ରହିଥିବା ୩୮ ଜଣ ଆହତ ଯାତ୍ରୀଙ୍କୁ ପୋଲିସ ଏବଂ ପ୍ରଶାସନ ଉଦ୍ଧାର କରି ବିଭିନ୍ନ ହସ୍ପିଟାଲକୁ ନେଇଛି। ଦୁର୍ଘଟଣାର ସଠିକ୍ କାରଣ ତଦନ୍ତ କରାଯାଉଛି। ଏହି ସମୟରେ ଦୁର୍ଘଟଣା ସ୍ଥଳରୁ ଏକ ଭିଡିଓରେ ଜଣେ ବ୍ୟକ୍ତି କହୁଥିବା ଶୁଣିବାକୁ ମିଳୁଛି ଯେ ବସ୍ ଡ୍ରାଇଭର ମଦ୍ୟପାନ କରିଥିଲେ ଏବଂ ତାଙ୍କ ନିଶା ଯୋଗୁଁ ଦୁର୍ଘଟଣା ଘଟିଛି।

ମୁଖ୍ୟମନ୍ତ୍ରୀ ମୋହନ ଯାଦବ ବସ୍ ଦୁର୍ଘଟଣା ପାଇଁ ଶୋକ ପ୍ରକାଶ କରିଛନ୍ତି। ସେ ତିନି ମୃତକଙ୍କ ପରିବାରକୁ ୨ ଲକ୍ଷ ଟଙ୍କା ଆର୍ଥିକ ସହାୟତା ପ୍ରଦାନ କରିଛନ୍ତି ଏବଂ ଆହତଙ୍କ ଶୀଘ୍ର ଆରୋଗ୍ୟ କାମନା କରିଛନ୍ତି।

ଅଧିକ ପଢ଼ନ୍ତୁ: ଧୂଆଁରେ ଘୋଡ଼ାଇ ହୋଇଛି ଦିଲ୍ଲୀ; ଜାହାଙ୍ଗୀରପୁରୀରେ AQI ୪୦୦ ଅତିକ୍ରମ